ខេត្តស្ទឹងត្រែង ៖ ស្ថានភាពទន្លេមេគង្គនៅខេត្តស្ទឹងត្រែងនៅចុងខែកក្កដានេះ មិនទាន់មានសន្ទុះហក់ឡើងដល់កំរិតប្រកាសអាសន្ននៅឡើយទេ ខណៈភ្លៀង ធ្លាក់មានកំរិតមធ្យម និងពេលខ្លះមានភ្លៀងធ្លាក់ច្រើន ។ លោកវ៉ាន់ ខាន់…
ខេត្តស្ទឹងត្រែង ៖ ស្ថានភាពទន្លេមេគង្គនៅខេត្តស្ទឹងត្រែងនៅចុងខែកក្កដានេះ មិនទាន់មានសន្ទុះហក់ឡើងដល់កំរិតប្រកាសអាសន្ននៅឡើយទេ ខណៈភ្លៀង ធ្លាក់មានកំរិតមធ្យម និងពេលខ្លះមានភ្លៀងធ្លាក់ច្រើន ។
លោកវ៉ាន់ ខាន់ មន្ត្រីនៃមន្ទីរធនធានទឹក និងឧតុនិយមបានឱ្យដឹងថា ទន្លេមេគង្គ មានសន្ទុះហក់ឡើងនៅថ្ងៃទី២៩ កក្កដា ទឹកមានកំពស់៣ម៉ែត្រ៩៣ នៅថ្ងៃទី៣០ ខែកក្កដា មានកំពស់៤ម៉ែត្រ០៦ ថ្ងៃទី៣១ ខែកក្កដាទឹកឡើងដល់កំពស់៤ម៉ែត្រ១៧, និងថ្ងៃទី០១ ខែសីហា ទឹកហក់ឡើង ដល់កំពស់ ៤ម៉ែត្រ២៧ ។
លោក វ៉ាន់ ខាន់ បន្តថា កំរិតប្រកាសអាសន្នទន្លេមេគង្គនៃខេត្តស្ទឹងត្រែងខ្ពស់ បំផុតដែលត្រូវប្រកាសអាសន្ន១០.៧០ម៉ែត្រ កម្ពស់ទឹកទន្លេសេសានត្រូវប្រកាសអាសន្ន ១០.៥០ម៉ែត្រ និងកម្ពស់ទឹកទន្លេ សេកុង ត្រូវប្រកាសអាសន្ន ១៤.៥០ម៉ែត្រ ។
ទោះជាទឹកទន្លេមេគង្គហក់ឡើងនៅមានកំរិត តែប្រជាពលរដ្ឋត្រូវតែ មានការប្រុងប្រយ័ត្នខ្ពស់ផងដែរ ព្រោះវា និងអាចហក់ឡើងកំរិតខ្ពស់នៅក្នុងខែសីហា ឆ្នាំ២០១៩នេះ បើសិនអាកាសធាតុមានការប្រែប្រួលខ្លាំង ។ កាលពីថ្ងៃទី២៥ ខែកក្កដា ឆ្នាំ២០១៩ កន្លងទៅនេះគណៈកម្មាធិការ សាខាកាកបាទក្រហមកម្ពុជាខេត្តស្ទឹងត្រែងបានរៀបកិច្ចប្រជុំបូកសរុប លទ្ធផលការការងារប្រចាំឆមាសទី១ និងលើកទិសដៅសម្រាប់ឆមាសទី២ ឆ្នាំ២០១៩ ក្រោមវត្តមាន លោក ឈាង ឡាក់ ប្រធានសាខាកាកបាទក្រហមកម្ពុជាខេត្ត និងសមាជិក សមាជិការ គណៈកម្មារធិការសាខា អនុសាខា មន្ត្រីសាខាកាកបាទក្រហមកម្ពុជា ។
មានប្រសាសន៍នាឱកាសនោះប្រធានសាខាកាកបាទក្រហមកម្ពុជាខេត្ត លោកឈាង ឡាក់ បានលើកឡើងថា សាខាកាកបាទក្រហមកម្ពុជាខេត្តបានត្រៀមលក្ខណៈ គ្រប់បែបយ៉ាងរួចជាស្រេច ដើម្បីជួយសង្គ្រោះប្រជាពលរដ្ឋគ្រប់មូលដ្ឋាន ក្នុងភូមិសាស្ត្រខេត្តដែលបានជួបប្រទះនូវបញ្ហាគ្រោះមហន្តរាយ ដែលយើងមិនអាចដឹងជាមុន ។ ហើយមន្ទីរធនធានទឹក បានដំឡើងម៉ាស៊ីនបូមទឹកចំនួន៣កន្លែង ដើម្បីបូមទឹកទប់ស្កាត់ការហូរ ទឹកចូលក្នុងក្រុងស្ទឹងត្រែង ។
គួររំលឹកថា ថ្ងៃទី២៥ ខែកក្កដា ឆ្នាំ២០១៨ កម្លាំងយោធាបានជម្លៀស ប្រជាពលរដ្ឋចេញពីលំនៅដ្ឋានទៅកាន់ទីទួលសុវត្ថិភាពក្នុងស្រុកសៀមប៉ាង ដែលរងផលប៉ះពាល់ពីទឹកជំនន់ ដោយសារបាក់ទំនប់វារីអគ្គិសនី សេពានសេណាមណយ ស្ថិតនៅខេត្តអត្តពឺ ប្រទេសឡាវ មានចំងាយប្រមាណ៧០គីឡូម៉ែត្រពីព្រំដែនកម្ពុជាឡាវ ធ្វើឱ្យទន្លេនៅក្នុងខេត្តស្ទឹងត្រែងឡើងជិតដល់កំរិតប្រកាសអាសន្ន និងធ្វើឱ្យភូមិមួយចំនួននៅស្រុកសៀមប៉ាងចាប់ផ្តើមលិចចូលប្រជាពលរដ្ឋរក កន្លែងទីទួលសុវត្ថិភាព ៕ កែសម្រួលដោយ ៖ សុឃាក់
ចែករំលែកព័តមាននេះ