រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញនារសៀលថ្ងៃទី២៩ ខែកក្កដា នេះបានសម្រេចចេញដីកាឃុំខ្លួនស្ត្រីជាមេអណ្តើក២នាក់ ពាក់ពន្ធករណីនាំនារីខ្មែរបម្រុងឆ្លងដែនដោយខុសច្បាប់ ដើម្បីទៅរៀបការយកប្តីជាជនជាតិចិន ។ ការសម្រេចឃុំខ្លួនជនត្រូវចោទពីសំណាក់ចៅក្រមស៊ើបសួរ គឺយោងតាមការបញ្ចប់នៃការស៊ើបសួរលើជនសង្ស័យនៅដំណាក់កាលអយ្យការដែលបានចោទពីប្រកាន់ពីបទ នាំមនុស្សចេញសម្រាប់ឆ្លងដែនដោយមិនស្របច្បាប់ ។
ការនាំយកចេញដោយមិនស្របច្បាប់សម្រាប់នាំឆ្លងដែនច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទតាមបញ្ញាត្តិមាត្រា១១ ជនជាប់ចោទត្រូវបានផ្តន្ទាទោសដាក់ពន្ធនាគារពី៧ ទៅ១៥ឆ្នាំ ។ស្ត្រីជាមេអណ្តើក២នាក់ កាលពីកាលថ្ងៃទី២៨ កក្កដា ឆ្នាំ២០១៩ ត្រូវបានកម្លាំងសមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញបញ្ជូនទៅកាន់សាលាដំបូងរាជធានីភ្នំពេញពាក់ពន្ធករណីនាំមនុស្សសម្រាប់ឆ្លងដែនដោយខុសច្បាប់ ។
ស្ត្រីម្នាក់ឈ្មោះ សុខា រដ្ឋធានី ហៅយ៉ា អាយុ១៨ឆ្នាំ មុខរបរលក់គ្រឿងក្រអូប និងម្នាក់ឈ្មោះ ថាច់ ដាវី អាយុ៣០ឆ្នាំ មុខរបរលក់ដូរ ពួកគេត្រូវបានឃាត់ខ្លួននៅចំណុចមុខវត្តមហាមេត្រី ស្ថិតតាមបណ្តោយផ្លូវ១៧៣ ក្នុងសង្កាត់អូឡាំពិក ខណ្ឌបឹងកេងកង រាជធានីភ្នំពេញ ។
ទាក់ទិនករណីឃាត់ខ្លួនជនសង្ស័យជាមេអណ្តើកដែលបម្រុងនាំមនុស្សឆ្លងដែនដោយមិនស្របច្បាប់បញ្ជូនទៅសាលាដំបូងរាជធានីភ្នំពេញនេះ លោកវរសេនីយ៍ឯកកែវ ធា នាយការិយាល័យនគរបាលប្រឆាំងការជួញដូរមនុស្ស និងការពារអនីតិជនបានឲ្យដឹងថា កាលពីព្រឹកថ្ងៃទី២៦ ខែកក្កដា កម្លាំងសមត្ថកិច្ចជំនាញការិយាល័យរបស់លោកបានធ្វើការស្រាវជ្រាវ និងឈានដល់ការឃាត់ខ្លួនស្ត្រី២នាក់ ដូចមានឈ្មោះខាងលើ នៅចំណុចមុខវត្តមហាមន្ត្រី ស្ថិតក្នុងសង្កាត់បឹងកេងកង២ ខណ្ឌបឹងកេងកង ខណៈស្ត្រី២នាក់នោះបាន និងកំពុងធ្វើដំណើរនាំនារីរងគ្រោះ ដើម្បីឆ្លងដែនតាមប្រទេសវៀតណាម និងបន្តទៅកាន់ប្រទេសចិន ។ ជាមួយនោះផងដែរសមត្ថកិច្ចក៏បានរំដោះ និងអញ្ជើញជនរងគ្រោះ៤នាក់ទៅធ្វើការបំភ្លឺជុំវិញអ្វីដែលពួកនាងចង់ទៅយកប្តីចិន ។
ការបំភ្លឺរបស់ឈ្មោះ វ.ស ភេទស្រី អាយុ២៤ឆ្នាំ (ជនរងគ្រោះ) បានរៀបរាប់ថា កាលពីខែមុនមានប្អូនជីទូតមួយឈ្មោះ យ៉ា (ជនសង្ស័យ) ដែលគេមានប្តីជាជនជាតិចិន និងរស់នៅប្រទេសចិន ។ ក្រោយមកឈ្មោះ យ៉ា បានមកលេងស្រុកខ្មែរជួបនាងដោយបានឃើញជីវភាពនាងមានការខ្វះខាតគេក៏បានសួរនាងថា ចង់ទៅយកប្តីចិន និងរស់នៅប្រទេសចិនអត់ ? យកប្តីចិន និងមានលុយចាយធូរធា ហើយបើកូនកម្លោះចិនគេពេញចិត្ត គេប្រគល់លុយឲ្យច្រើនៗ នាង និងបានលុយផ្ញើមកឪពុកម្តាយទៀតផង ។
ពេលនោះនារីរងគ្រោះឮថា បានប្តីចិន និងទៅរស់នៅប្រទេសចិនក៏ឆ្លើយយ៉ាងប្រញ៉ាប់ប្រញ៉ាល់(ចង់ទៅ)ទើបអ្វីៗសម្រេចតាមមេអណ្តើកទាំងអស់ គ្រាន់តែដំបូងមេអណ្តើកតម្រូវនាងធ្វើលិខិតឆ្លងដែន ដើម្បីត្រៀមចាំគេនាំចេញពីស្រុកខ្មែរ ។ លុះថ្ងៃទី២៤ ខែកក្កដា ឆ្នាំ២០១៩ ឈ្មោះ យ៉ា បានមកស្រុកខ្មែរ និងបាននាំនាងទៅស្នាក់នៅផ្ទះសំណាក់កាពីតូល ពេលនាងទៅស្នាក់នៅទីនោះក៏បានជួបនារីរងគ្រោះ៣នាក់ទៀត ។ ថ្ងៃទី២៥ ខែកក្កដា ឈ្មោះ យ៉ា បាននាំពួកគេ៤នាក់ដើរទៅលេងផ្សារ និងទិញសម្លៀកបំពាក់ឲ្យគ្រប់គ្នា ដើម្បីរៀបចំខ្លួនទៅយកប្តីចិន ក្នុងនោះក៏មានឈ្មោះ ថាច់ ដាវី (ជនសង្ស័យ) ចូលរួមដែរ ។ លុះព្រឹកថ្ងៃទី២៦ ខែកក្កដា ឈ្មោះ យ៉ា ក៏បាននាំពួកនាងជិះម៉ូតូកង់បីឥណ្ឌាមកដល់មុខវត្តមហាមន្ត្រី បម្រុងជិះរថយន្តម៉ាកហាយឡែនឌ័រ ដើម្បីចេញដំណើរទៅកាន់ប្រទេសវៀត និងបន្តទៅប្រទេសចិន ស្រាប់តែត្រូវសមត្ថកិច្ចចាប់ខ្លួនទាំងអស់គ្នាតែម្តងទៅ ។
ការបំភ្លឺរបស់នារីរងគ្រោះ៣នាក់ទៀត ដែលមានឈ្មោះ ស.ថ អាយុ១៧ឆ្នាំ ឈ្មោះ ថ .ច អាយុ១៦ឆ្នាំ និងឈ្មោះ ន.ម អាយុ១៧ឆ្នាំ បានឆ្លើយប្រហាក់ប្រហែលជនរងគ្រោះខាងលើនេះដែរ ដូច្នោះសមត្ថកិច្ចបានសន្និដ្ឋានថា ជនសង្ស័យជាមេអណ្តើកទាំង២នាក់ ពិតជាបានប្រព្រឹត្តអំពើល្មើស ទាក់ទិនទៅ និងករណីនាំមនុស្សឆ្លងដែនដោយមិនស្របច្បាប់ ទើបជនសង្ស័យត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ចំណែកជនរងគ្រោះដែលចង់បានប្តីចិន សមត្ថកិច្ចប្រគល់ឲ្យអាណាព្យាបាលរបស់ពួកគេវិញ ។ មេអណ្តើកទាំងពីរនាក់នោះ និងត្រូវឃុំខ្លួនដាក់ពន្ធនាគារជាបណ្តោះអាសន្ន ដើម្បីរង់ចាំពេលវេលាបើកសវនាការជំនុំជម្រះទោសតាមច្បាប់នៃព្រះរាជាណាចក្រកម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ