ក្រុមហ៊ុន ភ្នំពេញ លែន ឃែភីថល និងក្រុមហ៊ុន ម៉ារីន បេ ឃែភីថល បានចុះហត្ថលេខាជាមួយគ្នាលើការវិនិយោគវិស័យដឹកជញ្ជូន នៅថ្ងៃទី២៩ ខែកក្កដា ឆ្នាំ២០១៩ នៅសណ្ឋាគារ Raffles Hotel Le Royal ។ ពិធីនេះត្រូវបានចុះហត្ថលេខាដោយលោកជំទាវ សែ លីលី ជាសហស្ថាបនិក និងជាប្រធានក្រុមប្រឹក្សាភិបាលនៃក្រុមហ៊ុនភ្នំពេញ លែន ឃែភីថល និងលោក ថៃ ឧត្តម ជាប្រធានក្រុមប្រឹក្សាភិបាល និងជាអគ្គនាយក ក្រុមហ៊ុនម៉ារីន បេ ឃែភីថល ព្រមទាំងមានការចូលរួមពីភ្ញៀវកិត្តិយសជាច្រើននាក់ធ្វើជាសាក្សីផងដែរ ។
ក្រុមហ៊ុន ភ្នំពេញ លែន ឃែភីថល ដែលជាក្រុមហ៊ុនមានសក្តានុពលមួយនៅកម្ពុជា លើការអភិវឌ្ឍន៍អចលនទ្រព្យ និងគម្រោងទីក្រុងវ័យឆ្លាត (Smart City) បានធ្វើការវិនិយោគ និងបណ្តាក់ទុនជាបន្តបន្ទាប់ជាមួយក្រុមហ៊ុនជាច្រើនទាំងក្នុង និងក្រៅប្រទេស ។ ក្នុងដំណើរការដើម្បីត្រៀមចូលក្នុងទីផ្សារភាគហ៊ុននៅញូវយ៉ក នៅក្នុងឆ្នាំ ២០២៥ ខាងមុខ។
ក្រុមហ៊ុន ភ្នំពេញ លែន ឃែភីថល មិនត្រឹមតែជាក្រុមហ៊ុនអភិវឌ្ឍលើអចលនទ្រព្យតែមួយមុខនោះទេ តែក្រុមហ៊ុនកំពុងពង្រីកសក្តានុពលរបស់ខ្លួនដោយបន្តវិនិយោគលើសេវាកម្មដឹកជញ្ជូន, បច្ចេកវិទ្យា និងហិរញ្ញវត្ថុ ។
ក្រុមហ៊ុនមានចក្ខុវិស័យបង្កើតទីក្រុងវៃឆ្លាតដំបូងគេនៅកម្ពុជា ដែលជាទីក្រុង ពាណិជ្ជកម្ម មានទេសចរណ៍ធម្មជាតិ ជាទីក្រុងវប្បធម៌មានបរិស្ថានពណ៌បៃតង គាំទ្រដល់គោលនយោបាយរបស់រាជរដ្ឋាភិបាលលើផ្នែកទេសចរណ៍ វប្បធម៌ បរិស្ថាន និងលំនៅដ្ឋាន។ ម៉ារីន បេ ឃែភីថល ជាក្រុមហ៊ុនទី ១៨ ដែលជាក្រុមហ៊ុន ភ្នំពេញ លែន ឃែភីថល បានចុះហត្ថលេខាវិនិយោគជាមួយ ។
ក្រុមហ៊ុន ម៉ារីន បេ ឃែភីថល ជាក្រុមហ៊ុនដឹកជញ្ជូន និង ភស្តុភាបែបទំនើបនៅកម្ពុជា ដោយប្រើប្រាស់បច្ចេកវិទ្យា និងឧស្សាហកម្មជំនាន់ថ្មី ។ ក្រុមហ៊ុនមានប្តេជ្ញាថា នៅថ្ងៃអនាគតនឹងក្លាយទៅជាក្រុមហ៊ុនដឹកជញ្ជូនធំជាងគេបង្អស់នៅអាស៊ី ។ ក្រុមហ៊ុនទាំងពីរជឿជាក់ថា ពិធីចុះហត្ថលេខា និងចាប់ដៃគូវិនិយោគរវាងក្រុមហ៊ុនទាំងពីរនឹងធ្វើឱ្យមានការរីកចម្រើនដល់វិស័យដឹកជញ្ជូនក្នុងប្រទេសថែមមួយកម្រិតទៀត ។
សូមបញ្ជាក់ផងដែរថា លោកជំទាវ សែ លីលី ជាសហស្ថាបនិក និងជាប្រធានក្រុមប្រឹក្សាភិបាលនៃក្រុមហ៊ុន ភ្នំពេញ លែន ឃែភីថល និងជាសមាជិកវ័យក្មេងជាងគេនៃសមាគមនាយកប្រតិបត្តិវ័យក្មេងហៅកាត់ថា YPO Cambodia ដែលសមាគមនេះ បានបង្កើតឡើងតាំងពីឆ្នាំ ១៩៥០ ហើយសព្វថ្ងៃមានបណ្តាញថ្នាក់នាយកក្រុមហ៊ុនធំៗមកពី ១៣០ ប្រទេសដែលមានប្រាក់ចំណូលប្រចាំឆ្នាំ ៩ សែនកោដិដុល្លារសហរដ្ឋអាមេរិក ។ អ្វីដែលគួរឱ្យចាប់អារម្មណ៍ទៀតនោះគឺថ្មីៗនេះ ក្រុមហ៊ុនភ្នំពេញ លែន ឃែភីថល ក៏បានរៀបចំគម្រោងថ្មីមួយហៅថា អៃ ស៊ីធី ផងដែរ ។
លោក ថៃ ឧត្តម ជាប្រធានក្រុមប្រឹក្សាភិបាល និង ជាអគ្គនាយក ក្រុមហ៊ុនម៉ារីន បេ ឃែភីថល ។ លោកមានបទពិសោធន៍ជាង ១០ ឆ្នាំក្នុងវិស័យដឹកជញ្ជូន ។ លោកក៏ត្រូវបានគេស្គាល់ថាជាអ្នកដឹកនាំធ្វើឱ្យមានការផ្លាស់ប្តូរក្នុងការអភិវឌ្ឍន៍មនុស្ស និងបង្កើតនូវក្រុមវប្បធម៌ចម្រុះប្រកបដោយសក្កានុពល ហើយលោកក៏ជាសមាជិកមួយរូបនៃសមាគមនាយកប្រតិបត្តិវ័យក្មេងផងដែរ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ