ខេត្តមណ្ឌលគិរី ៖ ដើម្បីស្តារនូវចំនួនសត្វខ្លាធំនៅក្នុងព្រៃនៃប្រទេសកម្ពុជាឡើងវិញ មន្ទីរបរិស្ថានខេត្ត មណ្ឌលគិរី ក្រោមការគាំទ្រពីក្រសួងបរិស្ថានបានសិក្សានាំមេពូជខ្លាធំពីប្រទេសឥណ្ឌា ដើម្បីលែងចូលទៅព្រៃធម្មជាតិក្នុងដែនជម្រកការពារសត្វព្រៃក្នុងខេត្តមណ្ឌលគិរី ។ ជាក់ស្តែង នារសៀលថ្ងៃទី២៩…
ខេត្តមណ្ឌលគិរី ៖ ដើម្បីស្តារនូវចំនួនសត្វខ្លាធំនៅក្នុងព្រៃនៃប្រទេសកម្ពុជាឡើងវិញ មន្ទីរបរិស្ថានខេត្ត មណ្ឌលគិរី ក្រោមការគាំទ្រពីក្រសួងបរិស្ថានបានសិក្សានាំមេពូជខ្លាធំពីប្រទេសឥណ្ឌា ដើម្បីលែងចូលទៅព្រៃធម្មជាតិក្នុងដែនជម្រកការពារសត្វព្រៃក្នុងខេត្តមណ្ឌលគិរី ។ ជាក់ស្តែង នារសៀលថ្ងៃទី២៩ កក្កដា នេះ មន្ទីរបរិស្ថានខេត្តមណ្ឌលគិរី បានរៀបចំប្រារព្ធពិធីទិវាសត្វខ្លាធំ ដើម្បីអំពាវនាវដល់អ្នកប្រមាញ់គ្រប់រូបទាំងអស់ មេត្តាបញ្ឈប់ជាបន្ទាន់នូវសកម្មភាពដាក់អន្ទាក់ និងការសម្លាប់សត្វព្រៃគ្រប់ប្រភេទ ។
សូមបញ្ជាក់ថា សត្វខ្លាធំបានបាត់វត្តមានពីទឹកខេត្តមណ្ឌលគិរី កាលពីអំឡុងឆ្នាំ២០០៧ ខណៈនៅឆ្នាំ២០១០ចំនួនសត្វខ្លាធំនៅទូទាំងពិភពលោក មានប្រហែល៣.២០០ក្បាល ដែលចំនួននេះ មានការថយចុះប្រហែល៩៥% បើធៀបទៅនឹងចំនួនរបស់វាធ្លាប់មានក្នុងដើមទស្សវត្សទី២០ ដែលមានចំនួនប្រហែល១០ម៉ឺនក្បាល ។
លោក សេង ទៀក តំណាងអង្គការWWFប្រចាំប្រទេសកម្ពុជា បានឲ្យដឹងថា ខ្លាធំជាសត្វស៊ីសាច់ជាអាហារលំដាប់លើគេ ក្នុងចំណោមសត្វព្រៃទាំងអស់ ហើយវាមានតួនាទីយ៉ាងសំខាន់បំផុត ក្នុងការធ្វើឲ្យមានតុល្យភាព និងរក្សាលំនឹងប្រព័ន្ធអេកូឡូស៊ី និងបរិស្ថានដែលផ្តល់ប្រយោជន៍ ដល់សត្វព្រៃដទៃទៀត ព្រម ទាំងប្រជាពលរដ្ឋរាប់លាននាក់។
លោក សេង ទៀក បន្តថា ក្នុងឆ្នាំ២០១៦ ចំនួនសត្វខ្លាធំនៅទូទាំងពិភពលោក បានត្រូវប៉ាន់ប្រមាណថា មានការកើនឡើងបន្តិច បើប្រៀបធៀបនិងឆ្នាំ២០១០ គឺមានចំនួន៣.៩០០ក្បាល។ នេះគឺជាការកើនឡើងបន្តិច និងជាលើកដំបូងបង្អស់ ក្នុងពេលដែលថ្នាក់ដឹកនាំនៃប្រទេសទាំង១៣ ដែលមានសត្វខ្លាធំក្នុងរយៈ ពេលប៉ុន្មានឆ្នាំកន្លងទៅនេះ។
ចំនួនសត្វខ្លាធំដែលបានកើនឡើង ជាពិសេស មានក្នុងប្រទេសឥណ្ឌា នេប៉ាល់ និងរុស្សី។ ជាមួយកំណើនបន្តិចនេះ ក្រុមអ្នកស្រឡាញ់បរិស្ថានក៏បានបង្ហាញពីការព្រួយបារម្ភយ៉ាងខ្លាំង លើការគំរាមគំហែង ជាសាកលដល់សត្វខ្លាធំនៅលើពិភពលោក ដោយសារតែការបាត់បង់ទីជម្រក ការបរបាញ់ នឹងការជួញដូរ ជាបណ្តាញ និងជាប្រព័ន្ឋក្នុងពិភពលោក។
ដោយឡែក នៅក្នុងប្រទេសកម្ពុជាសត្វខ្លាធំ ដែលថតបានចុងក្រោយគេ នៅដែនជម្រកសត្វព្រៃស្រែពកខេត្តមណ្ឌលគិរី គឺនៅឆ្នាំ២០០៧ ។ បើតាមអ្នកស្រាវជ្រាវគេបានសន្និដ្ឋានថា ចំនួនខ្លាធំដែលអាចបន្តពួជបាននៅក្នុងតំបន់ គឺអាចបាត់បង់ហើយ។ មូលហេតុចម្បងបំផុត គឺដោយសារតែការបរបាញ់នឹងការដាក់អន្ទាក់។ (សម្រួលដោយ៖ ស្រីណា)
ចែករំលែកព័តមាននេះ