រាជធានីភ្នំពេញ ៖ សេចក្តីរាយការណ៍បឋម រថយន្ត Mazda CX-5 មួយគ្រឿង បើកបរដោយនារីវ័យក្មេងក្នុងល្បឿនលឿនដូចហោះដោយខ្វះការប្រុងប្រយ័ត្នក៏ជ្រុលទៅបុកម៉ូតូហុងដាឌ្រីម ស៊េរី២០១៩ មួយគ្រឿងពីក្រោយពេញទំហឹងខ្ទាតទៅបុកផ្ទប់កង់បីឥណ្ឌាមួយគ្រឿងទៀត…
រាជធានីភ្នំពេញ ៖ សេចក្តីរាយការណ៍បឋម រថយន្ត Mazda CX-5 មួយគ្រឿង បើកបរដោយនារីវ័យក្មេងក្នុងល្បឿនលឿនដូចហោះដោយខ្វះការប្រុងប្រយ័ត្នក៏ជ្រុលទៅបុកម៉ូតូហុងដាឌ្រីម ស៊េរី២០១៩ មួយគ្រឿងពីក្រោយពេញទំហឹងខ្ទាតទៅបុកផ្ទប់កង់បីឥណ្ឌាមួយគ្រឿងទៀត បណ្ដាលឲ្យអ្នកបើកម៉ូតូផ្លោងចេញពីម៉ូតូចម្ងាយជាង១០ម៉ែត្ររងរបួសធ្ងន់ ដែលហេតុការណ៍នេះកើតឡើងកាលពីវេលាម៉ោង៧និង៤០នាទីយប់ថ្ងៃទី២៨ ខែកក្កដា នៅទល់មុខក្រុមហ៊ុនលក់រថយន្ត Mercedez ចំនុចផ្លូវ60ម៉ែត្រ កែងនឹងផ្លូវ30ម៉ែត្រ ស្ថិតក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
គ្រោះថ្នាក់ចរាចរណ៍នេះបង្កឡើងដោយរថយន្ត Mazada CX-5 មួយគ្រឿង ពណ៌ស ពាក់ស្លាកលេខភ្នំពេញ 2AD- 7243 បើកបរដោយនារីវ័យក្មេងម្នាក់មិនស្គាល់អត្តសញ្ញាណ ។ ប្រភពព័ត៌មានពីអ្នកបើកម៉ូតូកង់បីឥណ្ឌារងគ្រោះបានប្រាប់អោយដឹងថា មុនកើតហេតុគាត់កំពុងធ្វើដំណើរតាមបណ្តោយផ្លូវ30ម៉ែត្រ ក្នុងទិសដៅពីកើតទៅលិចក្នុងល្បឿនធម្មតាដល់ផ្លូវបំបែកជាបួនក៏ឆ្លង ខណៈនោះក៏មានម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ2019 ពណ៌ខ្មៅអត់មានស្លាកលេខ បើកបរដោយបុរសម្នាក់ធ្វើដំណើរតាមបណ្តោយផ្លូវ60ម៉ែត្រ ក្នុងទិសដៅពីត្បូងទៅជើង មានរថយន្តបង្កធ្វើដំណើរស្របទិសគ្នាជាមួយម៉ូតូរងគ្រោះក្នុងល្បឿនលឿនដូចហោះបុកម៉ូតូពីក្រោយពេញទំហឹង បណ្តាលអោយម៉ូតូខ្ទាតមកបុកផ្ទប់នឹងម៉ូតូកង់បីគាត់ពេញទំហឹងទៀតក៏ផ្លោងអ្នកបើកម៉ូតូជាង10ម៉ែត្រទៅបោកនឹងថ្នល់ បណ្ដាលអោយរបួសធ្ងន់ ចំណែករថយន្តបង្កមិនទាន់អស់ល្បឿនក៏រ៉េចង្កូតទៅបុកផ្ទប់នឹងបង្គោលភ្លើងបំភ្លឺផ្លូវបាក់មួយដើមទៀតរងការខូចខាតយ៉ាងដំណំ ចំណែកអ្នកបើកមិនមានរងរបួសអ្វីនោះទេនឹងបណ្តាលអោយរថយន្តបង្ករងការខូចខាតមួយកំណាត់មុខ ។
ចំណែកម៉ូតូរងគ្រោះរងការខូចខាតមួយកំណាត់ក្រោយទាំងស្រុង រីឯម៉ូតូកង់បីរងការខូចខាតមួយកំណាត់ស្ទើរតែទាំងស្រុងដូចគ្នា ចំណែកម្ចាស់ម៉ូតូកង់បីរងរបួសស្រាល នឹងបង្កជាការភ្ញាក់ផ្អើលដល់ប្រជាពលរដ្ឋដែលធ្វើដំណើរឆ្លងកាត់ទីនោះចោមរោមមើលគ្រប់គ្នា មានអ្នកខ្លះបានជួយសង្គ្រោះជនរងគ្រោះដែលរបួសធ្ងន់ និងមានអ្នកខ្លះឃាត់អ្នកបើកបររថយន្ដបង្កមិនរត់ទៅណា ហើយរាយការណ៍ទៅសមត្ថកិច្ចមូលដ្ឋានចុះមកអន្តរាគមន៍ភ្លាមៗនៅកន្លែងកើតហេតុ ដោយឃាត់អ្នកបើកបររថយន្ដបង្កនាំទៅកាន់ប៉ុស្តិ៍នគរបាលចាក់អង្រែក្រោមភ្លាមៗដែរ ទុកប្រគល់ទៅជំនាញចរាចរណ៍ក្រុងចាត់ការតាមនីតិវិធី ។
ក្រោយកើតហេតុជនរងគ្រោះត្រូវបានសមត្ថកិច្ចទាក់ទងហៅរថយន្តសង្គ្រោះបន្ទាន់មកដឹកជនរងគ្រោះទៅសង្គ្រោះភ្លាមៗនៅមន្ទីរពេទ្យផងដែរ ចំណែករថយន្តបង្ក និងម៉ូតូរងគ្រោះ និងម៉ូតូកង់បីឥណ្ឌា រួមទាំងអ្នកបើកបររថយន្ដបង្កត្រូវបានសមត្ថកិច្ចជំនាញមូលដ្ឋានប្រគល់ទៅអោយខាងជំនាញចរាចរណ៍ក្រុងនាំទៅកាន់ការិយាល័យនរគរបាលចរាចរណ៍ផ្លូវគោកនៃស្នងការនគរបាលរាជធានីភ្នំពេញចាត់ការតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ