ខេត្តឧត្តរមានជ័យ ៖ តាមសេចក្តីរាយការណ៍បឋមបានឱ្យដឹងថា លោកព្រះរាជអាជ្ញាបានដឹកនាំកំលាំងចុះអនុវត្តន៍ដីកាបញ្ជាឱ្យចូលខ្លួនលេខ០១៣ និងលេខដីការលេខ០១៤ ចុះថ្ងៃទី៨ កក្កដា ឆ្នាំ២០១៩ ដែលជនសង្ស័យទាំង២នាក់ប្តីប្រពន្ធមិនព្រមចូលខ្លូនទៅតាមការកំណត់របស់តុលាការអមសាលាដំបូងខេត្តឧត្តរមានជ័យ ហើយជនសង្ស័យទាំង២នាក់ប្តីប្រពន្ធត្រូវបានឃាត់ខ្លួនកាលពីវេលាម៉ោង៦ល្ងាចថ្ងៃទី២៦ កក្កដា ឆ្នាំ២០១៩ ពីបទរំលោភលើទំនុកចិត្ត (ខ្ចីលុយជាង២ម៉ឺនដុល្លារអាមេរិក) ដោយមិនព្រមសង ហើយនាំគ្នារត់គេចខ្លួន។ ហេតុការណ៍នេះបានកើតឡើងក្នុងភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ។
ជនសង្ស័យទាំង២នាក់ប្តីប្រពន្ធខាងលើ ក្នុងនោះប្តីឈ្មោះម៉ា ភារុន អាយុ៣២ឆ្នាំ មុខរបរមិនពិតប្រាកដ មានស្រុកកំណើតភូមិប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ និងប្រពន្ធឈ្មោះចែ ស្រី អាយុ៥០ឆ្នាំ មុខរបរមិនពិតប្រាកដ មានស្រុកកំណើតនៅឯខេត្តព្រៃវែង ។ ទាំង២នាក់ប្តីប្រពន្ធមកស្នាក់នៅក្នុងភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ។
ទាក់ទិននឹងការចុះអនុវត្តន៍ដីកាឃាត់ខ្លួនជនសង្ស័យទាំង២នាក់ប្តីប្រពន្ធខាងលើនេះ លោកកូយ កាន់យ៉ា ព្រះរាជអាជ្ញាអមសាលាដំបូងខេត្តឧត្តរមានជ័យបានឱ្យដឹងថា យោងទៅលើពាក្យបណ្តឹងរបស់ជនរងគ្រោះចំនួន៣នាក់ រស់នៅឯភូមិត្រពាំងធំ ឃុំត្រពាំងធំ ស្រុកទឹកឈូ ខេត្តកំពត បានប្តឹងចោទប្រកាន់ទៅលើជនសង្ស័យទាំងពីនាក់ប្តីប្រពន្ធពីបទរំលោភលើទំនុកចិត្ត (ខ្ចីលុយជាង២ម៉ឺនដុល្លារអាមេរិក) ដោយមិនព្រមសង ហើយនាំគ្នារត់គេចខ្លួន។
លោកព្រះរាជអាជ្ញាបានបន្តថា មុននឹងឃាត់ខ្លួនជនសង្ស័យ គឺមានការសហការជាមួយកំលាំងនាយកដ្ឋាននគបាលព្រហ្មទណ្ឌក្រសួងមហាផ្ទៃ និងកំលាំងនៃស្នងការដ្ឋាននគបាលខេត្តកំពត រួមទាំងកំលាំងសមត្ថកិច្ចក្នុងមូលដ្ឋានផងដែរ ខណៈនោះកំលាំងសមត្ថកិច្ចបានធ្វើការឃាត់ខ្លួន និងធ្វើការដកហូតរថយន្តមួយគ្រឿងម៉ាកកាមរី ស៊េរីឆ្នាំ២០០០ ពណ៌ត្រីឆ្លូញ ពាក់ស្លាកលេខ ១G.១១.៨៧ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ