ខេត្តកំពង់ឆ្នាំង ៖ បើតាមសេចក្តីរាយការណ៍បឋមបានឱ្យដឹងថា សត្វស្លាបប្រភេទទោម ចំនួន១៣០ក្បាល ត្រូវកម្លាំងសមត្ថកិច្ចកងរាជអាវុធហត្ថ ល្បាតប្រទះឃើញ ហើយក៏ចាប់ឃាត់ជាមួយនឹងមនុស្ស៦នាក់ កាលពីម៉ោង១ រំលងអធ្រាត្រឈានចូលថ្ងៃទី28…
ខេត្តកំពង់ឆ្នាំង ៖ បើតាមសេចក្តីរាយការណ៍បឋមបានឱ្យដឹងថា សត្វស្លាបប្រភេទទោម ចំនួន១៣០ក្បាល ត្រូវកម្លាំងសមត្ថកិច្ចកងរាជអាវុធហត្ថ ល្បាតប្រទះឃើញ ហើយក៏ចាប់ឃាត់ជាមួយនឹងមនុស្ស៦នាក់ កាលពីម៉ោង១ រំលងអធ្រាត្រឈានចូលថ្ងៃទី28 ខែកក្កដា ឆ្នាំ 2019 ខណៈជនសង្ស័យទាំងនោះដឹកបទល្មើសឆ្លងកាត់ភូមិសាស្ត្រ ឃុំឆ្នុកទ្រូ ស្រុកបរិបូណ៍ ។
សមត្ថកិច្ចកងរាជអាវុធហត្ថបានឲ្យដឹងថា ជនសង្ស័យទាំង៦នាក់ខាងលើរួមមាន ១-ឈ្មោះឡាយ ថងអាយុ២០ឆ្នាំ ២-ឈ្មោះ កា បូលី អាយុ៣៣ឆ្នាំ ៣-ឈ្មោះហុក ឆុង អាយុ៣៦ឆ្នាំ ៤-ឈ្មោះហុក សិត អាយុ២០ឆ្នាំ ៥-ឈ្មោះតូច ស្រ៊ុន អាយុ៣៥ឆ្នាំ និង៦-ឈ្មោះសុខ ខេង អាយុ៣៧ឆ្នាំ ។ ពួកគេទាំង៦នាក់រស់នៅភូមិសេះស្លាប់ ឃុំឆ្នុកទ្រូ ស្រុកបរិបូណ៍ ។
សមត្ថកិច្ចកងរាជអាវុធហត្ថបានឲ្យដឹងថា ខណៈកម្លាំងសមត្ថកិច្ចកំពុងល្បាតតាមផ្លូវទឹក ក៏ប្រទះឃើញកាណូតបាឡាស្មាច់១គ្រឿងមានមនុស្សជិះ៦នាក់ គួរឱ្យសង្ស័យក៏ស្កាត់ហៅឱ្យឈប់ ដើម្បីត្រួតពិនិត្យ ស្រាប់តែឃើញមានសត្វស្លាបប្រភេទទោមជាច្រើនក្បាល ដែលជនល្មើសដាក់ក្នុងលបស្បៃមុង ហើយក៏ ចាប់ឃាត់យកមកស្នាក់ការ ដើម្បីសាកសួរ និងកសាងសំណុំរឿងតែម្តង ។
ប្រភពដដែលបន្តថា លុះព្រឹកថ្ងៃទី២៨ កក្កដា កម្លាំងកងរាជអាវុធហត្ថបានហៅខាងផ្នែករដ្ឋបាលព្រៃឈើមកធ្វើកំណត់ហេតុ រួចប្រគល់ទទួល បន្ទាប់មកយកសត្វស្លាបប្រភេទទោមទាំង១៣០ក្បាល ទៅលែងនៅបឹងធម្មជាតិ ចំណុចទំនប់២០ឧសភា ស្ថិតក្នុងភូមិសាស្ត្រ ឃុំស្វាជ្រុំ ស្រុករលាប្អៀរ ជាប់ព្រំព្រទល់ ឃុំមេលំ ស្រុកបរិបូរណ៍។
ដោយឡែកមនុស្សទាំង៦នាក់ ដោយមានសំណូមពរពីក្រុមគ្រួសារ និងអាជ្ញាធរមូលដ្ឋាន ដោយសារអ្នកទាំង៦នាក់ជាជនក្រីក្រជាខ្លាំងផងនោះ សមត្ថកិច្ច និងមន្ត្រីជំនាញ គ្រាន់តែធ្វើការអប់រំឱ្យបញ្ឈប់សកម្មភាពចាប់សត្វស្លាបប្រភេទទោម ដែលជាសត្វដ៏កម្រចាប់ពីពេលនេះតទៅ ទើបអនុញ្ញាត្តិឱ្យវិលត្រឡប់ទៅលំនៅដ្ឋានវិញ។ (កែសម្រួលដោយ ៖ បុប្ផា)
ចែករំលែកព័តមាននេះ