ខេត្តកណ្តាល ៖ អំពើហិង្សាមួយបានកើតឡើង បណ្តាលឱ្យបុរសម្នាក់រងរបួសឈាមហូរស្រោចខ្លួន ខណៈពេលជនរងគ្រោះឃើញជនសង្ស័យស្រវឹងស្រាយកសំរាមមកដុតក្បែរព្រំដីរបស់ជនរងគ្រោះ លុះពេលជនរងគ្រោះសួរនាំក៏កើតជាអំពើហិង្សាតែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២៨ ខែកក្កដា ឆ្នាំ២០១៩ ចំណុចភូមិជ័យតូច ឃុំជ័យធំ ស្រុកខ្សាច់កណ្ដាល ខេតកណ្ដាល ។
ជនរងគ្រោះឈ្មោះ ទូច ឈាងលីម ភេទប្រុស អាយុ២៩ឆ្នាំ មុខរបរកសិករ ទីលំនៅភូមិឃុំកើតហេតុ បានរងរបួសត្រចៀកខាងស្ដាំមួយកន្លែងដាច់ចេញឈាម។ ចំណែកជនសង្ស័យឈ្មោះ ឡែម ឥស្សារៈ (ហៅរ៉ា) ភេទប្រុស អាយុ៣៥ឆ្នាំ មុខរបរកសិករ ទីលំនៅភូមិ-ឃុំកើតហេតុ។ វត្ថុតាងចាប់យកបន្ទះហ្វ៊ីប្រូស៊ីម៉ង់ត៍ចំនួន១ចម្រៀក ។
នគរបាលស្រុកខ្សាច់កណ្តាលបានអោយដឹងថា នៅវេលាម៉ោងកើតហេតុ ជនសង្ស័យមានសភាពស្រវឹងស្រា ហើយយកសំរាមទៅដុតនៅក្បែរព្រំដីរបស់ជនរងគ្រោះ លុះជនរងគ្រោះបានចេញមកសួរថា «ម៉េចបានដុតសំរាមនៅកន្លែងហ្នឹង» ក៏ស្រាប់តែមានទំនាស់ពាក្យសំដីគ្នា ។
តាមប្រភពដដែលបានបន្តថា ពេលនោះជនសង្ស័យបានស្ទុះទៅយកបន្ទះក្បឿងហ្វ៊ីប្រូស៊ីម៉ង់ត៍មួយចម្រៀកមកវាយជនរងគ្រោះចំស្លឹកត្រចៀកខាងស្តាំ បណ្តាលឲ្យដាច់រយះចេញឈាម បន្ទាប់មកជនរងគ្រោះបានមកប្ដឹងសមត្ថកិច្ចនគរបាលប៉ុស្តិ៍ជ័យធំចុះអន្តរាគមន៍ឃាត់ខ្លួនជនសង្ស័យ ដើម្បីកសាងសំណុំរឿងចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ