រាជធានីភ្នំពេញ៖ ស្ថិតក្នុងបរិបទវិស័យសំណង់ និងអចលនទ្រព្យកាន់តែរីកចម្រើន អ្នកជំនាញមើលឃើញថាក្រុមហ៊ុនផ្តល់ការវាយតម្លៃលើអចលនទ្រព្យដើរតួនាទីកាន់តែសំខាន់ក្នុងការផ្តល់តម្លាភាពទៅដល់អ្នកពាក់ព័ន្ធរាប់ទាំងអ្នកវិនិយោគិន ធនាគារ និងអ្នកមានតម្រូវការទិញ-លក់ ខណៈវិស័យមួយនេះកាន់តែរីកចម្រើន ។ អ្នកជំនាញ និងជានាយកក្រុមហ៊ុន…
រាជធានីភ្នំពេញ៖ ស្ថិតក្នុងបរិបទវិស័យសំណង់ និងអចលនទ្រព្យកាន់តែរីកចម្រើន អ្នកជំនាញមើលឃើញថាក្រុមហ៊ុនផ្តល់ការវាយតម្លៃលើអចលនទ្រព្យដើរតួនាទីកាន់តែសំខាន់ក្នុងការផ្តល់តម្លាភាពទៅដល់អ្នកពាក់ព័ន្ធរាប់ទាំងអ្នកវិនិយោគិន ធនាគារ និងអ្នកមានតម្រូវការទិញ-លក់ ខណៈវិស័យមួយនេះកាន់តែរីកចម្រើន ។
អ្នកជំនាញ និងជានាយកក្រុមហ៊ុន Key Real Estate បានឱ្យដឹងថា ក្រុមហ៊ុនវាយតម្លៃអចលនទ្រព្យនៅកម្ពុជាសព្វថ្ងៃទាំងជាង ៣០ ក្រុមហ៊ុនដើរតួនាទីសំខាន់ក្នុងផ្តល់តម្លាភាពទៅដល់អ្នកវិនិយោគិន វិស័យធនាគារ និងក្រុមអ្នកមានតម្រូវការទិញលក់ក៏ដូចជាប្រជាពលរដ្ឋផ្សេងទៀត ។
លោក សន សៀប នាយកក្រុមហ៊ុន Key Real Estate មានប្រសាសន៍ថា ក្រុមហ៊ុនវាយតម្លៃអចលនទ្រព្យមានតួនាទីសំខាន់៖
១- ក្នុងវិស័យហិរញ្ញវត្ថុ នៅពេលយើងវាយតម្លៃអចលនទ្រព្យខុសវានឹងធ្វើឱ្យមានបញ្ហាដល់កម្ចីអ៊ីចឹងវានឹងផ្តល់បញ្ហាដល់ធនាគារ ។ នៅពេលណាមានបញ្ហាពីធនាគារមួយទៅធនាគារមួយផ្សេងទៀតដែលឱ្យកម្ចីលើសវាធ្វើឱ្យវិស័យហិរញ្ញវត្ថុទាំងមូលអាចដួលរលំបាន ។ ឧទាហរណ៍មនុស្សម្នាក់គាត់អត់មានលទ្ធភាពសងប្រាក់ទៅធនាគារវិញ អ៊ីចឹងអចលនទ្រព្យគាត់ត្រូវគេលក់លៃឡុង ហើយទីផ្សារអលនទ្រព្យវានឹងធ្លាក់តម្លៃ»។
២- សម្រាប់វិនិយោគិន គាត់ត្រូវការទិញ-លក់នៅតាមទីផ្សារគឺពួកគាត់អាចរកសេវាកម្មវាយតម្លៃ ដើម្បីពួកគាត់ដាក់តម្លៃ ឬវាយតម្លៃមួត្រឹមត្រូវ ។ អ្នកវិនិយោគខ្លះសហការគ្នាសាងសង់អគារអ្វីមួយដើម្បីជាមូលដ្ឋានគ្រឹះក្នុងការវិនិយោគទាមទារឱ្យមានការវាយតម្លៃលើគម្រោងពីអ្នកជំនាញ ។ មួយផ្នែកទៀត អ្នកវិនិយោគ ឬក្រុមហ៊ុនធំៗចង់ដឹងពីតម្លៃអចលនទ្រព្យរបស់ពួកគាត់ថាមានតម្លៃប៉ុន្មាននៅពេលឈានជើងចូលទីផ្សារភាគហ៊ុនជាដើម» ។
បើតាមអ្នកជំនាញ ដើម្បីទទួលបានការជឿទុកចិត្តពីអតិថិជន និងកុំឱ្យមានបញ្ហាបន្ទាប់ពីក្រុមហ៊ុនធ្វើការវាយតម្លៃរួច អ្នកវាយតម្លៃត្រូវមានវិជ្ជាជីវៈ តាមរយៈការផ្តល់ជូនពីក្រសួងពាក់ព័ន្ធ ឬមានការបញ្ជាក់ជំនាញពីក្រុមហ៊ុនខាងក្រៅប្រទេសណាមួយ ។
ទន្ទឹមនឹងវិស័យអចលនទ្រព្យកម្ពុជាកំពុងមានការរីកចម្រើននោះបើតាមលោក សន សៀប មានប្រសាសន៍ថា «ការវាយតម្លៃអចលនទ្រព្យក្នុងទំហំប៉ុន្មានក៏អ្នកវាយតម្លៃធ្វើដែរ សំខាន់គឺតម្លៃសេវាកម្មនោះទេ ។ តម្លៃសេវាកម្មទាបបំផុតត្រឹម ១៧០ ដុល្លារអាមេរិក ហើយតម្លៃនេះយើងបានព្រមព្រៀងចូលរួមធ្វើជាមួយសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជាដែលមានការទទួលស្គាល់ពីក្រសួងសេដ្ឋកិច្ចនិងហិរញ្ញវត្ថុ» ។
ស្រដៀងគ្នានេះដែរលោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសន៍ថា« ក្រុមហ៊ុនវាយតម្លៃជាផ្នែកមួយក្នុងវិស័យអចលនទ្រព្យ ។ ក្រុមហ៊ុនវាយតម្លៃអចលនទ្រព្យមានសារៈសំខាន់វាយតម្លៃសម្រាប់វិនិយោគិនធំៗដែលគាត់ចង់ដឹងលើគម្រោងណាមួយ, ក្រុមហ៊ុនវាយតម្លៃដើរតួនាទីវាយតម្លៃសម្រាប់ការផ្តល់ប្រាក់កម្ចី ព្រោះខាងធនាគារត្រូវការក្រុមហ៊ុនទាំងនោះវាយតម្លៃលើអចលនទ្រព្យ និងសម្រាប់ពលរដ្ឋផ្សេងទៀតក៏គាត់ចង់ដឹងថាអចលនទ្រព្យរបស់ពួកគាត់បើលក់ ឬទិញមានតម្លៃប៉ុន្មាន ។ ដូចនេះពួកគាត់ត្រូវការក្រុមហ៊ុនវាយតម្លៃជួយពួកគាត់ បើទោះបីវាមិនត្រឹមត្រូវទាំងស្រុងក៏ដោយតែអាចឱ្យអ្នកមានតម្រូវអាចធ្វើការសម្រេចចិត្តបានក្នុងការទិញ និងលក់របស់ខ្លួន» ។
តាមលោក វ៉ា វីរៈ បន្តថាជារួមក្រុមហ៊ុនវាយតម្លៃអចលនទ្រព្យមានសារសំខាន់សម្រាប់ទាំងវិនិយោគិនបរទេស, ខាងធនាគារ និងអ្នកប្រើប្រាស់ទៅតាមតម្រូវការផ្សេងៗគ្នា។ ដើម្បីកុំឱ្យអតិថិជនប្រើប្រាស់សេវាវាយតម្លៃពីក្រុមហ៊ុនប្រឈមនឹងបញ្ហា ក្រុមហ៊ុនវាយតម្លៃត្រូវឈរលើក្រមសីលធម៌ មើលឃើញតាមការវិភាគបែបណាត្រូវដាក់តម្លៃបែបនោះ បើអ្នកទិញពេញចិត្ត ឬមិនពេញចិត្តអ្វីតាមរយៈការវិភាគក៏ដោយ ។
លោក សន សៀប មានប្រសាសន៍ថា «មកដល់បច្ចុប្បន្នក្រុមហ៊ុនវាយតម្លៃអចលនទ្រព្យ សម្រាប់ទីផ្សារកម្ពុជាសព្វថ្ងៃមានគ្រប់គ្រាន់ ហើយក្រុមហ៊ុនប្រមាណ ៣០ ក្រុមហ៊ុនត្រូវបានទទួលស្គាល់ពីក្រសួងសេដ្ឋកិច្ច ។ ក្នុងចំណោមក្រុមហ៊ុនទាំង ៣០ គឺក្រុមហ៊ុនដែលមានសកម្មភាសកម្មច្រើនជាងគេមានប្រហែលតែ ១០ ក្រុមហ៊ុនប៉ុណ្ណោះ ចំណែកក្រុមហ៊ុនផ្សេងទៀតហាក់នៅមានកម្រិតនៅឡើយដោយសារពួកគាត់មិនសូវជាផ្តោតខ្លាំងនៅលើសេវាកម្មវាយតម្លៃលើអចលនទ្រព្យ» ៕ កែសម្រួលដោយ ៖សុឃាក់
ចែករំលែកព័តមាននេះ