រាជធានីភ្នំពេញ ៖ ក្នុងពេលតារាហង្សមាសជាច្រើនកំពុងមមាញឹកជាមួយការសម្តែងតាមឆាកតន្ត្រីចុងសប្តាហ៍ ស្រាប់តែគេឃើញតារាចម្រៀងឆន សុវណ្ណារាជ ទៅដល់ប្រទេសកាណាដា ឯណោះ ហើយបានជួបជាមួយអ្នកនាងមាស សុខសោភា ដែលកំពុងនៅទីនោះស្រាប់ ។ តើលោកឆន សុវណ្ណរាជ ស្កាត់ទៅជួបមាស សុខសោភា ឬទៅក្នុងបំណងអ្វី ?
បើនិយាយពីការចេញទៅសម្តែងនៅក្រៅប្រទេស ឆន សុវណ្ណារាជ កន្លងមកកម្រឃើញចេញទៅណាស់ ។ មិនសូវចេញទៅក្រៅប្រទេសមិនដឹងមកពីហេតុអ្វីទេ តែនៅក្នុងស្រុកលោកមមាញឹកណាស់នឹងអាជីពចម្រៀងរបស់ខ្លួន ។ ទើបតែពេលនះលោកសុវណ្ណរាជ ចេញទៅសម្តែងនៅកាណាដា ។
ចំណែកអ្នកនាងមាស សុខសោភា បានចេញទៅច្រៀងនៅប្រទេសកាណាដាជាលើកទី៤ កាលពីថ្ងៃទី១៨ ខែមេសា រួមដំណើរតែ២នាក់ស្វាមីប៉ុណ្ណោះ ។ សោភា សម្តែងខុសពីតារា ផ្សេងៗទៀត ព្រោះនាងមិនយកប្រាក់កម្រៃផ្ដាច់ពីម្ចាស់ Sponsor ទេ គឺចែកពាក់កណ្តាលជាមួយតម្លៃលក់សំបុត្របានរបស់Sponsor តែម្តង ។
មានប្រភពបានឱ្យដឹងថា ពេលនេះមាស សុខសោភា កំពុងតែពិចារណាក្នុងការពន្យារពេលមកស្រុកវិញ ដោយបន្តស្នាក់នៅកាណាដា រយៈពេល៣ខែថែមទៀត ហើយអាចនឹងវិលមកវិញនៅអំឡុងខែតុលាខាងមុខ ប្រសិនបើសាច់ញាតិកាន់តែច្រើនព្យាយាមឃាត់មិនទាន់ចង់ឱ្យនាងវិលវិញនោះ ។
មាស សុខសោភា ដែលត្រូវវិលត្រឡប់មកស្រុកខ្មែរនៅពាក់កណ្តាលខែកក្កដានេះ គម្រប់ការច្រៀងសម្តែងនៅប្រទេសកាណាដា៣ខែនោះ ពេលនេះនាងបានសម្រេចចិត្តពន្យារពេលចូលស្រុកវិញ បន្ទាប់ពីការទៅដល់របស់តារាចម្រៀងផលិតកម្មរស្មីហង្សមាសលោកឆន សុវណ្ណរាជ ដែលពួកគេគ្រោងចាប់ដៃគ្នាសម្តែង ជាពិសេសនៅថ្ងៃទី២៧ ខែកក្កដា នៅរដ្ឋ Montreal ក្នុងភោជនីយដ្ឋានតុងប៉ោ ។ អ្វីដែលគួរឱ្យចាប់អារម្មណ៍ថែមទៀតនោះមាស សុខសោភា ត្រូវស្វាមីរបស់នាងលោកអុិត រ៉ាដា តាមជាមួយគ្រប់ជំហាន ទើបធ្វើឱ្យនាងមានភាពកក់ក្តៅ ។
រវាងឆន សុវណ្ណារាជ និងមាស សុខសោភាទោះបីមិននៅក្នុងផលិតកម្មតែមួយ ក៏សកម្មភាពច្រៀងក្នុងកម្មវិធី ផ្សេងៗជាមួយគ្នាមានលក្ខណៈស្និទ្ធស្នាល ។ ដូចនេះការសម្ដែងនៅប្រទេសកាណាដារបស់តារាចម្រៀងល្បីឈ្មោះ២ដួងនេះ ពិតជាត្រូវចិត្តជនរួមជាតិខ្មែរនៅទីនោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ