រាជធានីភ្នំពេញ ៖ យុវជនម្នាក់សង្ស័យបើកបរម៉ូតូមួយគ្រឿងក្នុងស្ថានភាពស្រវឹងដួលកណ្ដាលផ្លូវ លុះជនរងគ្រោះខំប្រឹងស្ទុះងើបលើកម៉ូតូស្រាប់តែត្រូវរថយន្តកុងតឺន័រមកពីក្រោយកិនបែកក្បាលធ្លាយខួរស្លាប់ភ្លាមៗនៅកន្លែងកើតហេតុយ៉ាងអាណោចអាធ័ម បន្ទាប់ពីកើតហេតុរថយន្តបង្កបើកគេចបាត់ស្រមោល ។
ហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៨ ខែកក្កដា ឆ្នាំ២០១៩ តាមបណ្ដោយផ្លូវវ៉េងស្រេង ត្រង់ចំណុចមុខក្លឹបសេះមាស ក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ ។
យុវជនជនរងគ្រោះដែលស្លាប់ខាង មិនស្គាល់អត្តសញ្ញាណនោះទេ ជាអ្នកបើកបរម៉ូតូមួយគ្រឿងម៉ាកស៊ុយហ្ស៊ុយគីស្មាសវី ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ ភ្នំពេញ ១CQ-៥៥២៦ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញយុវជនរងគ្រោះខាងលើបើកបរម៉ូតូមួយគ្រឿងក្នុងស្ថានភាពស្រវឹងស្រា ធ្វើដំណើរតាមបណ្ដោយផ្លូវវេងស្រេង ក្នុងទិសដៅពីកើតទៅលិច លុះមកដល់ចំណុចកើតហេតុ ក៏បានដួលម៉ូតូនៅកណ្ដាលផ្លូវ ។ ភ្លាមៗនោះជនរងគ្រោះបានងើបរត់ទៅលើកម៉ូតូបណ្ដើរបានបន្តិច ស្របពេលនោះក៏មានរថយន្តមួយគ្រឿងម៉ាកកុងតឺន័រ មិនចាំស្លាកលេខ បើកមកពីក្រោយបានកិនជនរងគ្រោះ បណ្ដាលឲ្យបែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធ័ម។
ប្រភពព័ត៌មាននៅកន្លែងកើតហេតុបានបន្តឲ្យដឹងទៀតថា ក្រោយពេលកើតហេតុ រថយន្តបង្កបានបើកគេចខ្លួនបាត់ បន្សល់ទុកសពជនរងគ្រោះនិងម៉ូតូនៅកន្លែងកើតហេតុ។
បច្ចុប្បន្នម៉ូតូត្រូវបានសមត្ថកិច្ចជំនាញចរាចណ៍ដឹកយកទៅរក្សាទុកនៅចរាចរណ៍ខណ្ឌមានជ័យ រង់ចាំក្រុមគ្រួសារមកទទួលយក ។ រីឯសពត្រូវបានសមត្ថកិច្ចយកទៅតម្កល់ទុកនៅវត្តទឹកថ្លា សង្កាត់ទឹកថ្លា ខណ្ឌសែនសុខ កំពុងស្រាវជ្រាវរកសាច់ញាតិមកទទួលសពយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ