រាជធានីភ្នំពេញ ៖ យុវជនម្នាក់បានស្លាប់ភ្លាមៗ ចំណែកយុវជន៣នាក់ទៀតរងរបួសធ្ងន់ បន្ទាប់ពីគេសង្ស័យថាយុវជនទាំង២ក្រុមជិះម៉ូតូដេញវាយគ្នា បណ្តាលឲ្យបុកគ្នាពេញទំហឹង កាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២៨ ខែកក្កដា ឆ្នាំ២០១៩ ស្ថិតនៅតាមបណ្ដោយផ្លូវវេងស្រេង ភូមិត្រពាំងថ្លឹង សង្កាត់ចោមចៅទី១ ខណ្ឌពោធិសែនជ័យ។
ភាគីម្ខាងមានគ្នា២នាក់ជិះម៉ូតូមួយគ្រឿងនិច ពណ៌ខ្មៅ ពាក់ស្លាកលេខ កំពង់ចាម ១R-២៤៥៣ បើកបរដោយឈ្មោះផល ប៉ូលី ភេទប្រុស អាយុ២០ឆ្នាំ មុខរបរកម្មកររោងចក្រ មានស្រុកកំណើតនៅស្រុកគងពិសី ខេត្តកំពង់ស្ពឺ បានស្លាប់នៅនឹងកន្លែងកើតហេតុ និងអ្នករួមដំណើរម្នាក់ត្រូវជាមិត្តភក្តិរងរបួសធ្ងន់ ឈ្មោះអូន សុភក្ក្រ អាយុ២១ឆ្នាំ មុខរបរកម្មកររោងចក្រ ។ ចំណែកភាគីម្ខាងទៀតមានគ្នា២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១HL-២០២២ បើកបរដោយបុរសម្នាក់មិនស្គាល់អត្តសញ្ញាណ បានរងរបួសធ្ងន់ និងអ្នករួមដំណើរម្នាក់ មិនស្គាល់អត្តសញ្ញាណ បានរងរបួសធ្ងន់។
តាមប្រភពព័ត៌មានពីកន្លែងកើតហេតុបានដឹងថា មុនពេលកើតហេតុ គេឃើញយុវជនទាំង២ក្រុមជិះម៉ូតូតាមផ្លូវវេងស្រេង ក្នុងទិសដៅពីលិចទៅកើតស្របគ្នាក្នុងល្បឿនលឿនដូចហោះ មកដល់ចំណុចកើតហេតុក៏ជ្រុលទៅបុកគ្នាពេញទំហឹង បណ្ដាលឲ្យយុវជនម្នាក់បោកក្បាល នឹងថ្នល់ស្លាប់ក្នុងថ្លុកឈាម ចំណែកយុវជន៣នាក់ទៀតរងរបួសធ្ងន់ត្រូវបានរថយន្តសង្គ្រោះដឹកយកទៅសង្គ្រោះភ្លាមៗ ។
តាមប្រភពដដែលបានបន្តថា នៅកន្លែងកើតហេតុ គេឃើញមានពិលឆក់នៅក្បែរម៉ូតូហុងដាឌ្រីមចំនួន១ និងដំបងដែករលាស់នៅក្បែរម៉ូតូម៉ាកនិចចំនួន១ ។
សមត្ថកិច្ចមិនដឹងថា ភាគីទាំង២ក្រុមខាងលើនេះជិះម៉ូតូដេញវាយគ្នាតាំងពីចំណុចណាមកទេ លុះមកដល់ចំណុចកើតហេតុបានបុកគ្នាពេញទំហឹងបណ្តាលឲ្យស្លាប់ម្នាក់និងរបួសធ្ងន់៣នាក់ តែម្តង។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងហេតុនិងបានរាយការណ៍ទៅសមត្ថកិច្ចជំនាញចរាចរណ៍ខណ្ឌចុះមកធ្វើការវាស់វែង រួចធ្វើកំណត់ហេតុប្រគល់សពជនរងគ្រោះទៅឲ្យសាច់ញាតិយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ