ខេត្តកំពង់ធំ ៖ តាមសេចក្តីរាយការណ៍បឋមបានឱ្យដឹងថា បុរសជាអ៊ំដើរបង់សំណាញ់ ដោយទុកក្មួយប្រុសអាយុ៥ឆ្នាំឱ្យអង្គុយចាំនៅលើម៉ូតូ ស្រាប់តែក្មួយប្រុសលង់ទឹកស្លាប់ ហើយរកឃើញសពឃើញនៅចំណុចប្រឡាយអាងទឹក៣០កញ្ញា ស្ថិតក្នុងភូមិគ្រួស ឃុំដូង ស្រុកប្រាសាទបល្ល័ង្ក ខេត្តកំពង់ធំ កាលពីព្រឹកថ្ងៃទី២៧ ខែកក្កដា ឆ្នាំ២០១៩ ។
ក្មេងប្រុសដែលស្លាប់ខាងលើឈ្មោះ នឿន ផាត់ថាយ៉ា អាយុ៥ឆ្នាំ រស់នៅភូមិដូង ឃុំដូង ស្រុកប្រសាទបល្ល័ង្ក ។
តាមការបំភ្លឺរបស់ឈ្មោះ ឈួន ឆាត់ ភេទប្រុស អាយុ៣៧ឆ្នាំ ត្រូវជាអ៊ំបង្កើតរបស់ក្មេងប្រុសរងគ្រោះ បានប្រាប់ឱ្យដឹងថា មុនពេលកើតហេតុ កាលពីវេលាម៉ោងប្រហែល៤និង២៥នាទីរសៀលថ្ងៃទី២៦ កក្កដា ២០១៩ គាត់បាននាំក្មួយប្រុសអាយុ៥ឆ្នាំទៅបង់សំណាញ់ជាមួយនៅចំណុចកើតហេតុខាងលើ ដោយទុកក្មួយប្រុសឱ្យអង្គុយចាំនៅលើម៉ូតូ ។
តាមប្រភពដដែលបានបន្តថា ពេលគាត់កំពុងតែបង់សំណាញ់បានប្រហែលកន្លះម៉ោង ស្រាប់តែមិនឃើញក្មួយនៅចាំលើម៉ូតូ ហើយគាត់ក៏មករកនៅឯភូមិវិញ ក្រែងក្មួយប្រុសមកផ្ទះមុន តែមិនឃើញ ក៏នាំបងប្អូនមកមុជទឹករាវរកក្នុងស្ទឹង៣០កញ្ញាវិញ នៅតែរកមិនឃើញទៀត ដោយសារមេឃភ្លៀង និងមានខ្យល់ខ្លាំងផង គាប់ជួនមេឃងងឹតទៀតផង ពួកគាត់ក៏នាំគ្នាឈប់រក លុះព្រឹកឡើងថ្ងៃទី២៧ កក្កដា ២០១៩ ក៏នាំគ្នាចុះទៅរាវរកទៀត ស្រាប់តែប្រទះឃើញសពក្មេងប្រុសអណ្ដែតទឹកឃ្លាតពីកន្លែងចាំម៉ូតូចំងាយប្រហែល២០០ម៉ែត្រ ។
ពេលទទួលបានព័ត៌មានខាងលើនេះភ្លាម កម្លាំងជំនាញនគរបាលស្រុក និងប៉ុស្ដិ៍នគរបាលឃុំដូង និងអាជ្ញាធរភូមិបានចុះមកដល់កន្លែងកើតហេតុនិងពិនិត្យសព រកពុំឃើញមានស្លាកស្នាមអ្វីគួរឱ្យកត់សម្គាល់នោះទេ ទើបសមត្ថកិច្ចសន្និដ្ឋានថា ក្មេងប្រុសរងគ្រោះពិតជាស្លាប់ដោយសារលង់ទឹកប្រាកដមែន ។
ក្រោយពីពិនិត្យរួច សមត្ថកិច្ចបានប្រគល់សពក្មេងប្រុសរងគ្រោះជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ