រាជធានីភ្នំពេញ៖ ដើម្បីជំរុញ និងលើកកម្ពស់ដល់វិស័យធានារ៉ាប់រងកាន់តែរីកចម្រើនបន្ថែមទៀតនាពេលខាងមុខ រាជរដ្ឋាភិបាលកម្ពុជានឹងដាក់ឱ្យប្រើប្រាស់នូវការធានារ៉ាប់រងលើយានយន្តឯកជនជាកាតព្វកិច្ច ស្របទៅតាមបទប្បញ្ញត្តិនៃច្បាប់ ខណៈវិស័យមួយនេះរាជរដ្ឋាភិបាលចាត់ទុកជាសរសរស្តម្ភក្នុងការជំរុញកំណើនសេដ្ឋកិច្ចជាតិ ។
នៅក្នុងកម្មវិធី «ទិវាធានារ៉ាប់រង លើកទី ១ កាលពីថ្ងៃទី ២៥ ខែកក្កដា ឆ្នាំ ២០១៩ លោក អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ដើម្បីលើកកម្ពស់វិស័យធានារ៉ាប់រងឱ្យមានការរីកចម្រើនថែមទៀត រាជរដ្ឋាភិបាលកម្ពុជានឹងដាក់ឱ្យប្រើប្រាស់នូវការធានារ៉ាប់រងយានយន្តឯកជនជាកាតព្វកិច្ច ស្របតាមបទប្បញ្ញត្តិនៃច្បាប់ស្តីពីការធានារ៉ាប់រង ដែលជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គមជាតិ ។
លោកបន្តថា «តាមរយៈការធានារ៉ាប់រងដល់ជនរងគ្រោះ ដែលបង្កដោយគ្រោះថ្នាក់ចរាចរណ៍នៅតាមដងផ្លូវក្នុងប្រទេសកម្ពុជា ពោលគឺជួយឱ្យពួកគាត់ទទួលបានសំណងសមស្របសម្រាប់ការព្យាបាលនឹងដោះស្រាយបញ្ហាផ្នែកហិរញ្ញវត្ថុរបស់ខ្លួន» ។ លោកបានបញ្ជាក់ទៀតថា «ផលប្រយោជន៍ក្នុងការដាក់ឱ្យដំណើរការប្រព័ន្ធធានារ៉ាប់រងយានយន្តឯកជនជាកាតព្វកិច្ចនេះនឹងដើរតួនាទីយ៉ាងសំខាន់ក្នុងការពង្រឹង និងពង្រីកប្រព័ន្ធសំណាញ់សុវត្ថិភាពសង្គម ឱ្យដើរទន្ទឹមគ្នានឹងការដាក់ឱ្យអនុវត្តប្រព័ន្ធគាំពារសង្គមរបស់រាជរដ្ឋាភិបាល ដូចមានចែងក្នុងយុទ្ធសាស្ត្រចតុកោណរបស់រាជរដ្ឋាភិបាល» ។
លោក ង៉ែត ប៊ុនធឿន នាយករងប្រតិបត្តិនៃក្រុមហ៊ុនលីហួរអ៊ិនសួរេន ម.ក.បានឱ្យដឹងថា លីហួរអ៊ិនសួរេន ចាប់ផ្តើមប្រតិបត្តិការផ្តល់សេវាធានារ៉ាប់រងបានប្រមាន ២ ឆ្នាំ ប៉ុន្តែសន្ទុះនៃចំណែកទីផ្សារមានការកើនឡើង ដោយសារក្រុមហ៊ុនបុត្រសម្ព័ន្ធជួយគាំំទ្រ ។ ដូចនេះយើងទទួលបានចំណែកទីផ្សារលើការធានារ៉ាប់រងលើយានយន្តមានការកើនឡើង ។ លោកលើកឡើងថា «ទោះបីយើងទើបតែចាប់ផ្តើម តែយើងមានការរីកចម្រើន ហើយយើងសង្ឃឹមថានៅឆ្នាំខាងមុខនេះយើងនឹងឈានទៅចាប់យកចំណែកទីផ្សារបានកាន់តែធំជាងមុនតាមរយៈផ្តោតការយកចិត្តទុកដាក់ទាំងការធានារ៉ាប់រងលើវិស័យអចលនទ្រព្យ និងលើយានយន្ត» ។
បើតាមលោកនាយករង (ថ្នាក់ដឹកនាំជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ) លើកឡើងថារាជរដ្ឋាភិបាលកំពុងសំឡឹងមើលឱ្យយានយន្តទាំងអស់ត្រូវមានធានារ៉ាប់រងជាកាតព្វកិច្ច អីចឹងកាលណាជាកាតព្វកិច្ចមានន័យថាម្ចាស់យានយន្តទាំងអស់ត្រូវតែទិញធានារ៉ាប់រង ។ ដូចនេះដល់ពេលនោះបុព្វលាភនៃចំណែកយានយន្តនឹងមានការកើនឡើងតាមរយៈការជ្រោមជ្រែងរបស់រាជរដ្ឋាភិបាល ។ លើសពីនេះក្រុមហ៊ុនធានារ៉ាប់រងខ្លួនឯងចុះទៅដល់ផ្ទះប្រជាពលរដ្ឋ ពន្យល់អំពីការធានារ៉ាប់រងលើយានយន្ត ។ ដូចនេះខ្ញុំសង្ឃឹមថាទីផ្សាររបស់យើងនៅឆ្នាំក្រោយនឹងមានការកើនឡើង» ។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថាបច្ចុប្បន្នមានក្រុមហ៊ុនធានារ៉ាប់រងចំនួន ៣១ (ក្រុមហ៊ុនធានារ៉ាប់រងទូទៅចំនួន ១៣, ធានារ៉ាប់រងអាយុជីវិត ១១, ធានារ៉ាប់រងខ្នាតតូច ៧, ធានារ៉ាប់រងបន្ត ១, ប្រតិបត្តិករសុខភាព ៣, ក្រុមហ៊ុនវាយតម្លៃហានិភ័យធានារ៉ាប់រងចំនួន ៣, ក្រុមហ៊ុនជើងសាធានារ៉ាប់រងចំនួន ១៦ និងក្រុមហ៊ុនភ្នាក់ងារធានារ៉ាប់រងចំនួន ២២ ។ ក្រុមហ៊ុនធានារ៉ាប់រងទាំងអស់មានទ្រព្យសកម្មចំនួន ៤២៧,៣ លានដុល្លារអាមេរិក និងមូលនិធិភាគហ៊ុនចំនួន ២៤៣,៩ លានដុល្លារអាមេរិកក្នុងឆ្នាំ ២០១៨ ។
លោកជំទាវគូសបញ្ជាក់ថា «ទន្ទឹមនឹងកំណើននៃចំនួនគ្រឹះស្ថានធានារ៉ាប់រង ទំហំទីផ្សារធានារ៉ាប់រងកម្ពុជាក៏រីកធំធាត់យ៉ាងឆាប់រហ័សដោយពុព្វលាភធានារ៉ាប់រងដុលសរុប មានកំណើនប្រមាណ ៣៥% ជាមធ្យមក្នុងមួយឆ្នាំ ក្នុងរយៈពេល ៥ ឆ្នាំចុងក្រោយនេះ ដោយកើនឡើងដល់ចំនួន ១៩៦,៤ លានដុល្លារអាមេរិក ក្នុងឆ្នាំ ២០១៨ ជាមួយនឹងសំណងសម្រាប់ហានិភ័យកើតឡើងដែលក្រុមហ៊ុនធានារ៉ាប់រងទាំងអស់បានទូទាត់ជូនអតិថិជនចំនួន ២៥.៨ លានដុល្លារអាមេរិក ។ ចំនួនបុព្វលាភធានារ៉ាប់រង ព្យាការណ៍ថានឹងកើនឡើងដល់ ២៦០ លានដុល្លារនៅចុងឆ្នាំ ២០១៩» ។
សូមបញ្ជាក់ផងដែរថា យោងតាមក្រសួងសាធារណការ និងដឹកជញ្ជូនបានឱ្យដឹងថា ចំនួនយានយន្តដែលបានចុះបញ្ជីនៅក្រសួងចាប់ពីឆ្នាំ១ ៩៩០ ដល់ខែមេសា ២០១៩ មានជាង ៤លានគ្រឿងក្នុងនោះទោចក្រ ឬត្រីចក្រយានយន្តមានជាង ៣,៨ លានគ្រឿង និង រថយន្តមានជាង ២៥ ម៉ឺនគ្រឿង ៕ កែសម្រួលដោយ ៖ សុឃាក់
ចែករំលែកព័តមាននេះ