រយៈពេល៦ខែ កម្ពុជាប្រមូលពន្ធបានជាង ៣ពាន់លានដុល្លារអាមេរិក
- ភ្នំពេញ
រាជធានីភ្នំពេញ ៖ ក្នុងរយៈពេល ៦ ខែឆ្នាំ ២០១៩ នេះ ស្ថាប័នប្រមូលចំណូលពន្ធជូនរដ្ឋចំនួន ២ គឺអគ្គនាយកដ្ឋានគយ…
រាជធានីភ្នំពេញ ៖ ក្នុងរយៈពេល ៦ ខែឆ្នាំ ២០១៩ នេះ ស្ថាប័នប្រមូលចំណូលពន្ធជូនរដ្ឋចំនួន ២ គឺអគ្គនាយកដ្ឋានគយ…
រាជធានីភ្នំពេញ ៖ ក្នុងរយៈពេល ៦ ខែឆ្នាំ ២០១៩ នេះ ស្ថាប័នប្រមូលចំណូលពន្ធជូនរដ្ឋចំនួន ២ គឺអគ្គនាយកដ្ឋានគយ និងរដ្ឋករកម្ពុជា និង អគ្គនាយកដ្ឋានពន្ធដារ បានរកចំណូលបានប្រមាណជាង ៣ ពាន់លានដុល្លារអាមេរិក ។ នេះបើយោងតាមរបាយការណ៍របស់អគ្គនាយកដ្ឋានទាំងពីរដែលបានប្រកាសនៅក្នុងសប្ដាហ៍នេះ ។
យោងតាមរបាយការណ៍របស់អគ្គនាយកដ្ឋានគយ និងរដ្ឋករកម្ពុជា បានឱ្យដឹងថាក្នុងរយៈពេលកន្លះឆ្នាំ ២០១៩ ស្ថាប័នមួយនេះរកចំណូលបានប្រមាណ ១.៤៧៥ លានដុល្លារអាមេរិក កើនឡើងប្រមាណ ២៥,៥ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៨ កន្លងទៅ ។ បរិមាណទឹកប្រាក់ដែលរកបានក្នុងរយៈពេលកន្លះឆ្នាំនេះសម្រេចបានប្រមាណ ៦៥ ភាគរយនៃផែនការប្រចាំឆ្នាំ កំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ ។
ក្នុងរបាយការណ៍ឱ្យដឹងទៀតថា ចំណូលសំខាន់ដែលអគ្គនាយកដ្ឋានគយ និងរដ្ឋករកម្ពុជា រកបានក្នុងរយៈពេល ៦ ខែនេះ គឺបានមកពីចំណូលពន្ធនាំចូលយានយន្ត និងគ្រឿងចក្រ ដែលទំនិញទាំងនេះមានចំណែករហូតដល់ជាង ៥២ ភាគរយឯណោះ បន្ទាប់ពីនោះជាពន្ធនាំចូលប្រេងឥន្ធនៈ និងថាមពល ដែលមាន ១៧,១ ភាគរយ ហើយក្រៅពីនោះទៀត ជាផលិតផលគ្រឿងសំណង់ និងទំនិញចំរុះផ្សេងទៀត ។
លោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយនិងរដ្ឋករ បានឱ្យដឹងថា លទ្ធផលល្អបែបនេះបានមកដោយសារតែកម្ពុជាមានស្ថិរភាពនយោបាយ និងការកែទម្រង់របស់រាជរដ្ឋាភិបាលការពង្រឹងអភិបាលកិច្ចផ្ទៃក្នុងរបស់អង្គភាពគយ និងការរីកចម្រើនផ្នែកសមត្ថភាពធនធានមនុស្សរបស់កម្ពុជា ។ ដោយឡែកសម្រាប់ការប្រមូលពន្ធក្នុងស្រុកវិញ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ក៏បានប្រមូលបានប្រមាណ ១.៥២៦ លានដុល្លារអាមេរិក កើនឡើងប្រមាណ ២៨,៩៤ ភាគរយធៀបនឹងរយៈពេលកន្លះឆ្នាំដូចគ្នាក្នុងឆ្នាំ ២០១៨ ។ នេះបើយោងតាមអគ្គនាយកដ្ឋានពន្ធដារ ចេញផ្សាយកាលពីពេលថ្មីៗនេះ ។
លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានមានប្រសាសន៍ថា ចំណូលដែលអគ្គនាយកដ្ឋានពន្ធដារទទួលបានក្នុងរយៈពេល ១ ឆមាសឆ្នាំ ២០១៩ នេះសម្រេចបានប្រមាណ ៦៥ ភាគរយនៃផែនការប្រចាំឆ្នាំ ២០១៩ កំណត់ដោយច្បាប់ស្តីពីហិរញ្ញវត្ថុ ។ លោកបន្តថា៖ «ចំណូលសំខាន់ៗដែលយើងប្រមូលបាន និងទទួលបានផលល្អបែបនេះដោយសារតែមានការកើនឡើងនៃពន្ធលើប្រាក់ចំណេញ ពន្ធអាករពិសេស ពន្ធអាករបន្ថែម និងពន្ធលើប្រាក់បៀវត្សរ៍ផងដែរ ។ អ្វីដែលពិសេសនោះ គឺពន្ធប្រថាប់ត្រា បានមកពីការទិញលក់អចលនទ្រព្យ ដែលមានកំណើនរហូតដល់ជាង ៥០ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៩» ។
លោកបន្តទៀតថា ការប្រមូលពន្ធប្រថាប់ត្រាបានកើនឡើងខ្ពស់ដូច្នេះដោយសារតែបច្ចុប្បន្នការទិញលក់អចលនទ្រព្យនៅកម្ពុជាមានកំណើនខ្ពស់ ជាពិសេសនោះ គឺតម្លៃនៃអចលនទ្រព្យក៏កើនឡើងខ្ពស់ដែរ ជាក់ស្ដែងកាលពីប៉ុន្មានឆ្នាំមុនដីមួយកន្លែងតម្លៃត្រឹមតែ ៥០ ដុល្លារអាមេរិកក្នុងមួយម៉ែត្រការ៉េ តែបច្ចុប្បន្នវាបានឡើងដល់ ៥០០ ដុល្លារអាមេរិកក្នុងមួយម៉ែត្រ ដូច្នេះដីមួយកន្លែងនោះនឹងត្រូវបង់ពន្ធប្រថាប់ត្រាខ្ពស់ជាងមុនដែរ ហើយសូមបញ្ជាក់ថា រដ្ឋមិនបានដំឡើងពន្ធប្រថាប់ត្រានេះទេ ។ លោកបញ្ជាក់ថា បើមើលតាមសន្ទុះនៃការប្រមូលពន្ធក្នុងរយៈពេល ៦ ខែនេះ លោករំពឹងថា ចំណូលពន្ធក្នុងឆ្នាំ ២០១៩ ទាំងមូលនឹងអាចលើសផែនការដែលកំណត់ដោយច្បាប់ស្តីពីហិរញ្ញវត្ថុក្នុងឆ្នាំ ២០១៩ ។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅតែជំរុញឱ្យមន្ត្រីប្រមូលពន្ធត្រូវខិតខំប្រឹងប្រែងប្រមូលពន្ធបន្ថែមទៀត និងត្រូវប្រាកដថាម្ចាស់អាជីវកម្ម និងធុរជនទាំងអស់ដែលរកទទួលទាននៅក្នុងប្រទេសកម្ពុជាបានបំពេញកាតព្វកិច្ចបង់ពន្ធជូនរដ្ឋតាមច្បាប់ ៕កែសម្រួលដោយ ៖ សុឃាក់
ចែករំលែកព័តមាននេះ