សាធុជនណាចម្រើននូវពុទ្ធានុស្សតិជារឿយៗ រមែងជាអ្នកមានសេចក្ដីគោរព មានសេចក្ដីកោតក្រែងក្នុងព្រះសាស្ដា ទាំងបរិបូណ៌ដោយសទ្ធា សតិ បញ្ញា បរិបូណ៌ដោយបុណ្យ និងជាអ្នកសម្បូរដោយបីតិ ជាចិត្តរួចចាកទុក្ខសោកផងទាំងពួង ។
សរីរៈរបស់លោកដែលពុទ្ធគុណប៉ះផ្ទប់ហើយរមែងមានសម្បុរល្អគួរដល់ការបូជានៃពុទ្ធបរិស័ទ ឯចិត្តរបស់លោករមែងបង្អោនទៅក្នុងពុទ្ធភូមិជាម្លប់ដ៏ត្រជាក់ ចំណែកចក្ខុរបស់លោហាក់បីដូចជាបានឃើញព្រះសាស្ដាគង់នៅចំពោះមុខសែនសោមនស្សពេកក្រៃ ។
ដោយអានុភាពនៃការចម្រើនកម្មដ្ឋាននេះបើទោះជាលោកមិនទាន់សម្រេចគុណដ៏ក្រៃលែងក៏ដោយ ក៏រមែងមានសុគតិជាទីប្រព្រឹត្តទៅក្នុងលោកខាងមុខហើយដែរ ។
ព្រោះហេតុនោះឯង អ្នកមានបញ្ញាល្អ គប្បីធ្វើសេចក្ដីមិនប្រមាទ ក្នុងពុទ្ធានុស្សតិ ដែលមានអានុភាពច្រើនយ៉ាងនេះគ្រប់កាលចុះ ចិត្តនឹងត្រជាក់ដូចទឹកអម្រឹតពេញដោយបីតិ ។
នេះជាអានុភាពនៃការចម្រើននូវពុទ្ធានុស្សតិរមែងបានផលដូចពោលមកខាងលើនេះឯង ។
ចែករំលែកព័តមាននេះ