ខេត្តពោធិ៍សាត់ ៖ តាមសេចក្តីរាយការណ៍ពីខេត្តពោធិ៍សាត់ឱ្យដឹងថា សព្វថ្ងៃនេះ គេសង្គេតឃើញមុខរបរចិញ្ចឹមសត្វត្រចៀកកាំយកសម្បុក ហាក់បីដូចជារីកដុះដាលច្រើននៅតាមបណ្ដាខេត្តមួយចំនួនក្នុងព្រះរាជាណាចក្រកម្ពុជា ព្រោះមានទីផ្សារល្អ ទោះមានសម្បុកប៉ុន្មានក៏លក់អស់ដែរ ។ ដោយឡែក នៅខេត្តពោធិ៍សាត់ ក៏មានប្រជាពលរដ្ឋចិញ្ចឹមច្រើនគួរសមដែរ ទាំងនៅក្នុងទីប្រជុំជន និងតាមទីវាលមាត់បឹងជាដើម ។ គួររំលឹកថា៖ មិនធម្មតា..! សត្វត្រចៀកកាំអ្នកខ្សត់ជីវភាពចង់ចិញ្ចឹមវាលក់ គឺមិនអាចឡើយ
តាមការកត់សម្គាល់ នៅខេត្តពោធិ៍សាត់ ការចិញ្ចឹមសត្វត្រចៀកកាំនេះ មានពីរបីឆ្នាំមកហើយ ប៉ុន្តែទើបតែរីកដុះដាលច្រើននៅឆ្នាំ២០១៩នេះប៉ុណ្ណោះ ។ ត្រចៀកកាំដែលគេចិញ្ចឹមនេះគឺគេធ្វើផ្ទះឲ្យវានៅ ខ្លះធ្វើនៅលើដំបូលផ្ទះថ្មចាស់ៗដែលមានស្រាប់ និងខ្លះទៀតគេធ្វើផ្ទះថ្មថ្មីកម្ពស់បួនប្រាំជាន់សម្រាប់វារស់នៅតែម្ដង ដោយចាក់សំឡេងសត្វដើម្បីអន្ទងហៅវាឲ្យចូលមករស់នៅយ៉ាងសុខសាន្ត ។
អ្នកចិញ្ចឹមសត្វត្រចៀកកាំម្នាក់នៅភូមិអូរស្ដៅ សង្កាត់ផ្ទះព្រៃ ក្រុងពោធិ៍សាត់ ដែលលោកសុំមិនឲ្យបញ្ចេញឈ្មោះបាននិយាយប្រាប់កោះសន្តិភាពថា គាត់ចាប់ផ្ដើមចិញ្ចឹមសត្វត្រចៀកកាំនៅឆ្នាំ២០១៦ដែលកាលនោះក្នុងខេត្តពោធិ៍សាត់មានតែ២កន្លែងប៉ុណ្ណោះ ។ មុនដំបូងមានត្រចៀកកាំតែបួនដប់ម្ភៃក្បាលប៉ុណ្ណោះមករស់នៅ ។
លុះកន្លះឆ្នាំក្រោយមកមានជាង១០០ក្បាល ហើយឥឡូវនេះមានប្រមាណ៣០០០ក្បាល ព្រោះគាត់ធ្វើផ្ទះពីរទន្ទឹមគ្នាឲ្យវារស់នៅ ។ ការចិញ្ចឹមសត្វត្រចៀកកាំនេះគឺដើម្បីយកសំបុកដែលកើតចេញពីទឹកមាត់របស់វាលក់ទៅឲ្យក្រុមហ៊ុនចិននៅភ្នំពេញ ។ ពីរខែឬបីខែទើបយកម្ដង ម្ដងបានពី៣ទៅ៤គីឡូក្រាម ទៅតាមត្រចៀកកាំតិចឫច្រើន ហើយតម្លៃលក់ក្នុងមួយគីឡូក្រាមពី៦០០ទៅ៧០០ដុល្លាសហរដ្ឋអាមេរិក ។
សំបុកត្រចៀកកាំដែលកើតចេញពីទឹកមាត់របស់វានេះ គាត់បានរៀបរាប់តាមដឹងដោយខ្លួនឯងថា គេយកវាទៅធ្វើជាទឹកត្រចៀកកាំដប ធ្វើបង្អែម និងធ្វើជាម្ហូបហូបបាយក៏បានដែរ ។ ការចំណាយបើយើងធ្វើតូចអស់តិច បើយើងធ្វើធំអស់ច្រើន ហើយការទទួលផលក៏ទៅតាមនោះដែរ ។ លោកថា សត្រូវរបស់សត្វត្រចៀកកាំគឺសត្វស្ទាំង តុកកែ ជីងចក់ និងស្រមោចជាដើម ដែលរំខានវាមិនឲ្យចូលរស់នៅដោយមានសេចក្តីសុខទេ ។
មន្ត្រីមន្ទីរកសិកម្មម្នាក់ប្រាប់អ្នកយកព័ត៌មានកោះសន្តិភាពយើងថា សត្វត្រចៀកកាំប្រជាពលរដ្ឋបានចិញ្ចឹមទាំងនៅក្នុងទីរួមខេត្ត ទាំងនៅតាមបណ្ដាស្រុកសូម្បីតែនៅជុំវិញផ្សារពោធិ៍សាត់ក៏មានអ្នកចិញ្ចឹមជិត១០ផ្ទះទៅហើយ ។ លោកសន្និដ្ឋានថា ដូច្នេះទូទាំងខេត្តពោធិ៍សាត់មានមិនតិចជាង៧០ផ្ទះនោះទេ ក្នុងនោះស្រុកកណ្ដៀងច្រើនជាងគេ ។
ប្រភពព័ត៌មាននិយាយថា ដោយសារតែការចិញ្ចឹមសត្វត្រចៀកកាំកំពុងតែរីកដុះដាលច្រើននៅតាមបណ្ដាខេត្តក្រុងមួយចំនួននោះ ដូច្នេះសព្វថ្ងៃនេះគេតម្រូវឲ្យអ្នកចិញ្ចឹមត្រូវសុំច្បាប់អនុញ្ញាត ព្រោះវាប៉ះពាល់បរិស្ថាន ហើយការចាក់សំឡេងទាក់ទាញក៏មានការរំខានដល់អ្នកដ៏ទៃផងដែរ ។
ខេត្តវកំពត ៖ ដោយឡែក នៅខេត្តកំពតក៏មានសេចក្តីរាយការណ៍ពីមុខរបរចិញ្ចឹមត្រចៀកកាំនេះដែរ ។ ចំណែកផលដែលបានមក ក៏មានទីផ្សារលក់មិនសល់ដែរ ។ តាមសេចក្តីរាយការណ៍ពីខេត្តកំពតបញ្ជាក់ថា សំបុកសត្វត្រចៀកកាំមានតម្លៃខ្ពស់ និងមានទីផ្សារល្អ ខណៈពេលអ្នកចិញ្ចឹមមានតិចតួចក្នុងខេត្តកំពត ។
បានសម្គាល់ឃើញថាក្នុងខេត្តកំពត អ្នកមានទ្រព្យធនច្រើន បានធ្វើអគារខ្ពស់ៗ នៅដាច់ស្រយាលតាមតំបន់ភ្នំដើម្បីទាក់ទាញឱ្យវារស់នៅ ។ ការចិញ្ចឹមសត្វត្រចៀកកាំ ដើម្បីយកសំបុកទៅលក់ ដែលតាមអ្នកចិញ្ចឹមប្រាប់ថាមានតម្លៃខ្ពស់បំផុតក្នុង១គីឡូក្រាម៥០០ដុល្លារទៅ៦០០ដុល្លារសហរដ្ឋអាមេរិក នេះបើយោងតាមការអះអាងពីអ្នកចិញ្ចឹមសត្វត្រចៀកកាំយកសំបុកលក់នៅភូមិ១ឧសភា សង្កាត់កំពង់កណ្ដាល ក្រុងកំពត ។
អ្នកចិញ្ចឹមសត្វត្រចៀកកាំយកសំបុកលក់បាននិយាយថា ការចិញ្ចឹមត្រចៀកកាំពិបាកមើលថែដែរ ទី១ការពារខ្លាចមានសត្វអ្វីទៅបង្អើលធ្វើឱ្យសត្វត្រចៀកកាំមិនហ៊ានចូលសំបុក ។ អ្នកចិញ្ចឹមត្រចៀកកាំដែលមានវ័យចំណាស់នៅភូមិ១ឧសភា បាននិយាយប្រាប់ថា សំបុកត្រចៀកកាំកំពុងមានតម្លៃខ្ពស់១គីឡូក្រាមពី៥០០ ទៅ៦០០ដុល្លារ ហើយរកមិនបានទៀតផង ។
អ្នកចិញ្ចឹមសត្វត្រចៀកកាំនិយាយថា ការប្រមូលសំបុកយកទៅលក់ឱ្យគេនៅរាជធានីភ្នំពេញមិនបានកំណត់ទេ គឺក្នុង១ខែប្រមូលលក់ម្តងឬ២ដងក៏មាន អាស្រ័យទៅលើសត្វត្រចៀកកាំនៅតិចឬច្រើនតែប៉ុណ្ណោះ ។ អ្នកចិញ្ចឹមនិយាយប្រាប់ថា គ្រាន់តែនៅក្រុងកំពតមានអ្នកចិញ្ចឹមត្រចៀកកាំយកសំបុកលក់ប្រហែលជា១០គ្រួសារ តែបើទូទាំងខេត្តកំពតមានមិនលើសពី៧០គ្រួសារទេ ។
លោក ជួន សារ៉ា នាយខណ្ឌរដ្ឋបាលព្រៃឈើខេត្តកំពតបានប្រាប់អោយដឹងថាអ្នកចិញ្ចឹមសត្វត្រចៀកកាំទូទាំងខេត្តកំពតមានប្រហែល៥០គ្រួសារប៉ុណ្ណោះ ។ ទោះជាបែបណាសំបុកសត្វត្រចៀកកាំកំពុងមានហាងឆេងខ្ពស់ ហើយបើតាមប្រភពដែលប្រាប់ឱ្យដឹងនោះ គឺសំបុករបស់សត្វត្រចៀកកាំគេអាចច្នៃ្នធ្វើជាថ្នាប៉ូវកម្លាំងបាន ។
ចំណែកអគារគេសាងសង់ ជាកន្លែងចិញ្ចឹមសត្វត្រចៀកកាំនេះ ច្រើនតែធ្វើនៅតំបន់ភ្នំនិងមាត់សមុទ្រ ជាតំបន់ស្ងប់ស្ងាត់មិនរំខានដល់ការរស់នៅរបស់អ្នកស្រុកផង និងជាតំបន់ស្ងប់ស្ងាត់ងាយស្រួលត្រចៀកកាំរស់នៅផង ៕ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ