ខេត្តព្រៃវែង ៖ បើតាមសេចក្តីរាយការណ៍បឋមបានឱ្យដឹងថា ដីចំណីផ្លូវជាតិលេខ៨ ត្រង់ចំណុចផ្លូវកែងបំបែកជា៣ ក្នុងភូមិក្របៅជ្រៅ ឃុំក្របៅស្រុកកំចាយមារ ខេត្តព្រៃវែង ត្រូវបានគេល្បីតៗគ្នាថា ជាប្រពន្ធលោក សឿន សុជាតិ អភិបាលស្រុកកំចាយមារ រំលោភយកដីហើយសាងសង់ជាតូបលក់ដូរ ជួលឱ្យអ្នកស្រុកយកលុយបានរាប់ពាន់ដុល្លារក្នុង១ឆ្នាំៗ ធ្វើឱ្យអ្នកដែលមិនបានប្រយោជន៍នាំគ្នាទើសភ្នែក ហើយរិះគន់យ៉ាងខ្លាំង។
ប្រភពពីក្រុមអាជីវករ ដែលបានជួលតូបនៅទីតាំងនោះបានឲ្យដឹងថា ពួកគាត់ជួលតូបនេះពីថៅកែស្រីជាប្រពន្ធលោកអភិបាលស្រុក ដោយជួលជាឆ្នាំក្នុង១ឆ្នាំ ខ្លះ៤០០ដុល្លារ ខ្លះ៥០០ដុល្លារ និងខ្លះទៀត៨០០ដុល្លារ ទៅតាមទីតាំងទំហំតូប និងធំ។
ប្រភពដដែលនេះបញ្ជាក់ថា អ្នកជួលតូបនេះភាគច្រើន លក់ដូរ និងរស់នៅក្នុងតូបនេះតែម្តង។ ចំណែកមួយចំនួនទៀត គ្រាន់តែមកលក់ដូរពេលថ្ងៃ យប់ឡើងត្រឡប់ទៅផ្ទះវិញ ព្រោះតូបជួលតូចមិនអាចរស់នៅបាន។
ប្រភពពីមន្ត្រីតូចតាចមួយចំនួនបានលួចបង្ហើបប្រាប់ថា ទីតាំងដែលគេសង់ធ្វើតូបជួលនោះ គឺជាដីចំណីផ្លូវសុទ្ធសាធ ដែលមានជំរៅតែ៤ម៉ែត្រប៉ុណ្ណោះពីចិញ្ចើមថ្នល់ ដោយគេប្រើពេលវេលាសាងសង់ប្រមាណជា៣ខែ ហើយទើបតែសាងសង់រួច និងដាក់ជួលឱ្យអ្នកស្រុកបានប្រមាណជាកន្លះឆ្នាំប៉ុណ្ណោះ។ ប្រភពដដែលនេះបញ្ជាក់ថា នរណាក៏ដឹងដែរថា ទីតាំងនេះជាដីចំណីផ្លូវ ប៉ុន្តែនៅពេលគេចាប់សាងសង់ដំបូង ឃើញមានតែអ្នកទៅសួរនាំ អ្នកណាជាម្ចាស់សំណង? ដល់ពេលដឹងថា ជាប្រពន្ធលោកអភិបាលស្រុក ម្នាក់ៗក៏លឹបរួញទៅវិញអស់ ហើយគ្មានអ្នកណាហ៊ានទៅហាមឃាត់ឡើយ ទើបធ្វើឱ្យមានការរិះគន់យ៉ាងខ្លាំងពីមជ្ឈដ្ឋានអ្នកគួរបានប្រយោជន៍ តែបែរជាមិនបានទៅវិញ។
ឆ្លើយតបនឹងបញ្ហាខាងលើនេះ លោក សឿន សុជាតិ អភិបាលស្រុកកំចាយមារ បានឲ្យដឹងថា ករណីនេះលោកក៏បានដឹងដែរ ហើយរូបលោកធ្លាប់បានចាត់ឱ្យអាជ្ញាធរឃុំ ចុះទៅហាមឃាត់ដែរ ប៉ុន្តែមិនដឹងជាយ៉ាងម៉េចលោកមេឃុំ នៅតែបណ្តោយឱ្យគេសាងសង់រហូតទាល់តែហើយ និងដាក់ជួលបានរបៀបនេះ។
ដោយឡែករឿងដែលគេចោទថា ម្ចាស់សំណង់រំលោភយកដីចំណីផ្លូវនេះ ជាប្រពន្ធរបស់លោកអភិបាលស្រុក លោកបានបដិសេធថា មិនមែនជាការពិតនោះទេ ម្ចាស់សំណង់នោះគឺជាប្អូនរបស់លោកទៅវិញទេ ហើយលោកក៏ធ្លាប់បានប្រាប់ប្អូនដែរថា កុំសាងសង់សំណង់ខុសច្បាប់បែបនេះ តែប្អូនលោកមិនស្តាប់លោក នៅតែរឹងធ្វើ ព្រោះគាត់ចង់មាន ចង់បានដែរ។
ទោះជាយ៉ាងណាក៏ដោយ លោកបានបញ្ជាក់ថា លោកនឹងកោះប្រជុំគណៈបញ្ជាការឯកភាពស្រុក ដើម្បីដាក់ចេញនូវវិធានការច្បាប់ ហើយនឹងហៅប្អូនជាម្ចាស់សំណង់ឱ្យធ្វើកិច្ចសន្យារុះរើសំណង់នេះចេញវិញ ឲ្យខាងតែបាន។ ចាំមើលទៀត តើលោកម្ចាស់ស្រុកហ៊ានជាមួយម្ចាស់សំណង់ដែរឬអត់? ឬមួយបានតែថា ដូចគេថា «ផោមឱ្យក្របីហិត» ។ (កែសម្រួលដោយ ៖ បុប្ផា)
ចែករំលែកព័តមាននេះ