សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី២៤កក្កដាបានប្រើវេតូប្រឆាំងបណ្ដាសេចក្ដីសម្រេចរបស់សភា ដែលរាំងខ្ទប់ការលក់អាវុធដ៏ចម្រូងចម្រាស់ឲ្យអារ៉ាប៊ីសាអូឌីតនិងសម្ព័ន្ធមិត្តឯទៀតៗ។
ក្នុងសារលិខិតមួយផ្ញើជូនព្រឹទ្ធសភាហើយចេញផ្សាយដោយសេតវិមាន លោកត្រាំរៀបរាប់ថា សេចក្ដីសម្រេចទាំងនេះដែលអនុម័តកាលពីសប្ដាហ៍មុន នឹងធ្វើឲ្យខ្សោយដល់ការប្រកួតប្រជែងរបស់អាមេរិកលើពិភពលោក ហើយនឹងបំផ្លាញទំនាក់ទំនងសំខាន់ៗ ដែលយើងមានជាមួយបណ្ដាសម្ព័ន្ធមិត្តនិងដៃគូយើង។ វាក៏បំផ្លាញផងដែរជំនឿលើសហរដ្ឋអាមេរិក ក្នុងនាមជាដៃគូដ៏គត់មត់ដោយបញ្ជូនសារ បង្ហាញថាយើងត្រៀមបោះបង់ចោលបណ្ដាដៃគូនិងសម្ព័ន្ធមិត្តយើង ពេលដែលការគំរាមកំហែងនានាចំពោះពួកគេមានការកើនឡើង។
លោកត្រាំបន្តទៀតថា អារ៉ាប៊ីសាអូឌីតនិងអេមីរ៉ាត់អារ៉ាប់រួម ជាកំផែងមួយប្រឆាំងបណ្ដាសកម្មភាពអាក្រក់របស់អុីរ៉ង់និងពួកអ្នករួមដៃរបស់គេក្នុងតំបន់។ ការលក់អាវុធដែលរាំងខ្ទប់ដោយសភា ជាការបង្កើនសមត្ថភាពរបស់ប្រទេសជាសម្ព័ន្ធមិត្តទាំង២ ក្នុងការបង្ការការគំរាមកំហែងហើយការពារប្រឆាំងពួកសត្រូវ។ ដោយសារហេតុផលនេះ វាជាកាតព្វកិច្ចរបស់ខ្ញុ្ំដែលប្រើវេតូប្រឆាំងសេចក្ដីសម្រេចទាំងនោះរបស់សភា។
ការលក់អាវុធដែលមានតម្លៃជាច្រើនពាន់លានដុល្លារ ត្រូវបានអនុញ្ញាតកាលពីដំណាច់ខែឧសភាដោយរដ្ឋការលោកត្រាំ ដែលវាងសភាដោយលើកពីសភាពការណ៍បន្ទាន់បង្កឡើងដោយអីុរ៉ង់៕ (កែសម្រួលដោយ ៖ បុប្ផា)
ចែករំលែកព័តមាននេះ