រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់ស្រាបៀរកម្ពុជាក្នុងប្រភេទទម្ងន់៦០គីឡូក្រាម សម្រាប់ពូលAបានឈានចូលដល់វគ្គផ្ដាច់ព្រ័ត្រនៅថ្ងៃសៅរ៍ ទី២៧ កក្កដា សប្ដាហ៍នេះហើយ ។ ព្រឹត្តិការណ៍ប្រកួតដ៏កក្រើកនេះមានផ្សាយនៅលើបណ្ដាញទូរទស្សន៍ចំនួន៣គឺ CTN, MyTVនិងCNC។
កីឡាករ ម៉ឺន មេឃា មកពីក្លិបក្រសួងសេដ្ឋកិច្ច និងហិរញ្ញវត្ថុ ត្រូវជួបប្រកួតជាមួយកីឡាករថៃ ភីតណាំអេក ស.ស.ប៉ាកន ដណ្ដើមចំណាត់ថ្នាក់លេខ១ប្រចាំពូលA ខណៈកីឡាករថៃ ភីត ដាំ ស៊ីតចាថង ត្រូវជួបប្រកួតជាមួយកីឡាករថៃដូចគ្នា ណាក់រ៉ុប វីរិវ៉ាត់យោធិន ដណ្ដើមយកចំណាត់ថ្នាក់លេខ៣។
ម៉ឺន មេឃា និងកីឡាករថៃ ភីតណាំអេក សុទ្ធតែមិនធ្លាប់ចាញ់ដូចគ្នា សម្រាប់ការប្រកួតវគ្គជម្រុះវិលជុំកកន្លងមក ។ ប៉ុន្តែបើនិយាយពីបទពិសោធន៍ប្រកួតនៅលើសង្វៀនវិញនោះ ម៉ឺន មេឃា មិនអាចប្រៀបផ្ទឹមជាមួយកីឡាករថៃម្នាក់នេះបានឡើយ ។ អ្នកប្រដាល់ជើងថ្មី ម៉ឺន មេឃា ទើបតែប្រកួតបាន៣៨ដងប៉ុណ្ណោះ ក្នុងនោះចាញ់តែ៤ដងគត់ និងធ្លាប់ផ្ដួលគូប្រកួតឱ្យសន្លប់បានរហូតដល់ទៅ១២ដង។
ចំណែកកីឡាករថៃ ភីតណាំអេក វិញធ្លាប់ប្រកួតបានរហូតដល់ទៅ៧៥ដង ឈ្នះ៥៥ដង ស្មើ៥ដងចាញ់១៥ដង និងធ្លាប់ផ្ដួលគូប្រកួតឱ្យសន្លប់បាន៩ដង។ ទោះជាយ៉ាងណាសម្រាប់ការប្រកួតលើកនេះគឺជារឿងសំខាន់បំផុត ព្រោះអ្នកឈ្នះដណ្ដើមបានចំណាត់ថ្នាក់លេខ១ប្រចាំពូលទើបមានឱកាសឡើងទៅឈរចាំប្រកួតជាមួយអ្នកលេខ១ក្នុងពូលB ដែលនឹងត្រូវធ្វើឡើងបន្ទាប់ពីបញ្ចប់ការប្រកួតនេះទៅ។
ចំណែកប្រាក់រង្វាន់ដែលត្រូវប្រគល់ជូនវិញសម្រាប់ចំណាត់ថ្នាក់លេខ១ទទួលបានរង្វាន់ម៉ូតូZoomer X១គ្រឿង និងប្រាក់រង្វាន់អម៥០០ដុល្លារ លេខ២ទទួលបានប្រាក់រង្វាន់២០០០ដុល្លារ លេខ៣ទទួលបានប្រាក់រង្វាន់១៥០០ដុល្លារ និងលេខ៤ទទួលបាន១០០០ដុល្លារ។
សម្រាប់លទ្ធផលគូប្រកួតមិត្តភាពប្រចាំសប្ដាហ៍នេះវិញ ឡៅ ចិត្រា មកពីក្លិបទ័ពពិសេសឆត្រយោង៩១១ប្រកួតមិត្តភាពជាមួយកីឡាករថៃ ហ្វុនលួង សាធានមួយថៃយីម ក្នុងប្រភេទទម្ងន់៦០គីឡូក្រាម ខណៈពុយ ឡាយមកពីក្លិបឃ្លាំងមឿងកីឡាប្រកួតជាមួយ ខាំ សិលា មកពីក្លិបរ៉ាហាប់ស្វាយប៉ាក៕ (កែសម្រួលដោយ ៖ បុប្ផា)
ចែករំលែកព័តមាននេះ