បន្ទាយមានជ័យ ៖ សេចក្តីរាយការណ៍បឋមបានឲ្យដឹងថា គ្រោះរាំងស្ងួតបានអូសបន្លាយរហូតដល់ថ្ងៃទី២២ ខែកក្កដានេះ បានប៉ះពាល់ស្រូវកើនឡើង២៥.២៨៤ហិកតា នេះយោងតាមរបាយការណ៍មន្ទីរកសិកម្មរុក្ខាប្រម៉ាញ់ និងនេសាទខេត្តបន្ទាយមានជ័យ ។
លោក ប៉ាង វណ្ណាសេដ្ឋ ប្រធានមន្ទីកសិកម្មរុក្ខាប្រម៉ាញ់ និងនេសាទខេត្តបានរាយការណ៍ជូនគណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ នៅថ្ងៃទី២៤ ខែកក្កដា ឆ្នាំ២០១៩ ដោយគ្រោះរាំងស្ងួតបានអូសបន្លាយប៉ះពាល់មានចំនួន២៥.២៨៤ហិកតា នៃផ្ទៃដីដែលបានដាំដុះសរុបចំនួន២៤៣.៩៦៤ហិកតា មានស្រូវស្រាល៩.៣៦៥ហិកតា ស្រូវស្រាលដើមរដូវមានចំនួន៨.៣៩១ហិកតា ស្រូវកណ្តាលមានចំនួន១៤.៥៧៦ហិកតា ស្រូវធ្ងន់ចំនួន១.៣៤៣ហិកតា ។
លោកបានបញ្ជាក់ថា ខេត្តបន្ទាយមានជ័យមាន៩ស្រុក-ក្រុងដែលជួបគ្រោះរាំងស្ងួតប៉ះពាល់មាន១-ស្រុកមង្គលបូរី ប៉ះពាល់៥ឃុំ មានផ្ទៃដីចំនួន៨.១៧៧ហិកតា ២-ស្រុកភ្នំស្រុកព្រះនេត្រព្រះប៉ះពាល់៣ឃុំ មានផ្ទៃដីចំនួន២.២៤៣ហិកតា ៣-ស្រុកអូរជ្រៅប៉ះពាល់៧ឃុំ មានផ្ទៃដីចំនួន៧.៤៧៨ហិកតា ៤-ក្រុងសិរីសោភ័ណប៉ះពាល់២សង្កាត់ មានផ្ទៃដីចំនួន២.៦៥០ហិតា ៥-ស្រុកថ្មពួកប៉ះពាល់៦ឃុំ មានផ្ទៃដីចំនួន៣០១ហិកតា ៦-ស្រុកស្វាយចេកប៉ះពាល់៣ឃុំ មានផ្ទៃដីចំនួន៦០ហិកកតា ៧-ក្រុងប៉ោយប៉ែតប៉ះពាល់១សង្កាត់ មានផ្ទៃដីចំនួន៤.៣៧៦ហិកតា ។
លោក ប៉ាង វណ្ណាសេដ្ឋ បានបញ្ជាក់ថា គ្រោះរាំងស្ងួតដែលអូសបន្លាយរហូតដល់ថ្ងៃទី២៤ ខែកក្កដា ឆ្នាំ២០១៩ ដែលបណ្តាលប៉ះពាល់ស្រូវប្រឈមការខូចជាបណ្តើរៗបើគ្មានភ្លៀងធ្លាក់ ។ ដោយបានយកចិត្តទុកដាក់លោកឧបនាយករដ្ឋមន្ត្រី កែ គឹមយ៉ាន ប្រធានថ្នាក់ជាតិចុះជួយមូលដ្ឋានខេត្តបន្ទាយមានជ័យបានណែនាំអោយអភិបាលខេត្តបន្ទាយមានជ័យលោក អ៊ុ រាត្រី ដឹកនាំមន្ត្រីជំនាញចុះពិនិត្យ និងជួយអន្តរាគមន៍ និងសង្គ្រោះដោយចុះកាយប្រព័ន្ធ និងបូមទឹកសង្គ្រោះជាបណ្តើរៗដែលតំបន់រងគ្រោះធ្ងន់ធ្ងរ ៕ កែសម្រួលដោយ ៖ សុឃាក់
ចែករំលែកព័តមាននេះ