ប្រទេសកូរ៉េខាងជើង ៈ ក្នុងវីដេអូមួយដែលទើបចេញផ្សាយ គេឃើញមេដឹកនាំកូរ៉េខាងជើងលោកគីមជុងអ៊ុននៅក្បែរនាវាមុជទឹកមួយគ្រឿងកំពុងកសាង តែនឹងដាក់ឲ្យប្រើប្រាស់ក្នុងពេលដ៏ឆាប់ខាងមុខនេះ។
ពួកអ្នកជំនាញការជាច្រើនយល់ថា នោះជានាវាមុជទឹកអាចបំពាក់មីសីុលបាលីស្ទិក ដែលបង្ហាញពីភាពជឿនលឿននៃកម្មវិធីនុយក្លេអ៊ែរកូរ៉េខាងជើង ខណៈមានភាពទ័លច្រកនៃការចរចាជាមួយក្រុងវ៉ាស៊ិនតោន។ ពេលដែលការចរចារវាងក្រុងវ៉ាសិុនតោននិងក្រុងព្យុងយ៉ាង ស្ដីពីនុយក្លេអ៊ែរកូរ៉េខាងជើង ស្ថិតក្នុងភាពទ័លច្រក ចាប់តាំងពីការជួបគ្នាកំពូលនៅក្រុងហាណូយមក មេដឹកនាំកុំមុយនីស្តលោកគីមជុងអ៊ុនបានមកពិនិត្យនាវាមុជទឹកថ្មីនោះដែលកំពុងសាងសង់ ក្នុងឱកាសនៃទស្សនកិច្ចមួយ ដែលចេញផ្សាយជាសាធារណៈកាលពីថ្ងៃទី២៤កក្កដា។
ចំពោះអ្នកជំនាញការភាគច្រើនយល់ថា នាវាមុជទឹកនេះ អាចបំពាក់បណ្ដាមីសីុលបាលីស្ទិកមានក្បាលគ្រាប់នុយក្លេអ៊ែរ។ បែបនេះបញ្ជាក់ថាក្រុងព្យុងយ៉ាងស្វែងរកនាវាមុជទឹកដែលបំបាក់អាវុធនុយក្លេអ៊ែរ តំណាងឲ្យការប្រឈមថ្មីនៃការសាយភាយនុយក្លេអ៊ែរ។
ដោយពុំផ្ដល់ភាពលម្អិតច្បាស់ពីនាវាមុជទឹកនេះឬកន្លែងដែលលោកគីមចុះទៅទស្សនា ទីភ្នាក់ងារព័ត៌មានផ្លូវការកូរ៉េខាងជើងKCNA គ្រាន់តែនិយាយថា នាវាមុជទឹកនោះនឹងដាក់ពង្រាយក្នុងសមុទ្រខាងកើត ដែលគេស្គាល់ក្រោមឈ្មោះសមុទ្រជប៉ុន រួចជិតដាក់ឲ្យដំណើរការនិងថា លោកគីមជុងអ៊ុនផ្ដោតការចាប់អារម្មណ៍ពិសេសចំពោះការកសាងនាវាមុជទឹកថ្មី។ លោកពោលថា សមត្ថភាពប្រតិបត្តិការរបស់នាវាមុជទឹកមួយ ជារឿងសំខាន់នៃកិច្ចការពារប្រទេសរបស់យើង ដែលស្ថិតនៅជាប់សមុទ្រទាំងផ្នែកខាងកើតនិងទាំងផ្នែកខាងលិច។
កូរ៉េខាងជើងមាននាវាមុជទឹកច្រើន ប្រហែលជាច្រើនសិបគ្រឿងតែមានទំហំតូចៗ ហើយមួយចំនួនមានប្រវែងពី២០ទៅ៤០ម៉ែត្រ៕ (កែសម្រួលដោយ ៖ បុប្ផា)
ចែករំលែកព័តមាននេះ