ប៉ូលិសនៅក្នុងប្រទេសប្រេស៊ីលបានបិទរោងចក្រលាក់លាមមួយ ដែលផលិតរថយន្តស្ព័រតម្លៃថ្លៃ Ferrari និង Lamborghini ក្លែងក្លាយ នៅក្នុងរដ្ឋភាគខាងត្បូងនៃ Santa Catarina ប្រទេសប្រេស៊ីល។…
ប៉ូលិសនៅក្នុងប្រទេសប្រេស៊ីលបានបិទរោងចក្រលាក់លាមមួយ ដែលផលិតរថយន្តស្ព័រតម្លៃថ្លៃ Ferrari និង Lamborghini ក្លែងក្លាយ នៅក្នុងរដ្ឋភាគខាងត្បូងនៃ Santa Catarina ប្រទេសប្រេស៊ីល។
យោងតាមភ្នាក់ងារព័ត៌មាន AP បានឱ្យដឹងថា ឪពុកនិងកូនប្រុស ដែលជាម្ចាស់រោងចក្រ កំពុងដាក់លក់រថយន្តក្នុងប្រព័ន្ធផ្សព្វផ្សាយសង្គមក្នុងតម្លៃ ៤៥០០០ដុល្លារទៅ ៦០០០០ដុល្លារ។ ការវាយឆ្មក់របស់ប៉ូលិសបានរកឃើញ រថយន្តចំនួន៨គ្រឿង កំពុងតែធ្វើការតម្លើង។ មន្ត្រីប៉ូលិសកំពុងស៊ើបអង្កេត ដើម្បីរកឱ្យឃើញច្បាស់ថា តើរថយន្តប៉ុន្មានគ្រឿងទៀត ដែលផលិតរួចរាល់។
បើតាមរូបថតដែលគេថតបាន យើងអាចដឹងច្បាស់ថា រថយន្តទាំងនោះមិនមែនជារថយន្តចម្លងគុណភាពដូចទៅនឹងរថយន្តដើមនោះទេ។ តែបើត្រឹមតែមើលតួខ្លួនខាងក្រៅ វាអាចធ្វើឱ្យយើងចាញ់បោកដែរ។ តាមរបាយការណ៍ដែលគេយកបាន វានៅមានភាពមិនទាន់ច្បាស់លាស់នៅឡើយ ថាតើនរណាគឺជាគោលដៅទីផ្សារសម្រាប់រថយន្តទាំងនេះ។ តើគេផលិតសម្រាប់លក់ទៅឱ្យ អ្នកដែលមានលុយល្មមៗ តែចង់ធ្វើខ្លួនជាសេដ្ឋី ឬក៏យ៉ាងណា?
តាមកាសែត Folha de São Paulo ដែលបានធ្វើបទសម្ភាសជាមួយនឹងម្ចាស់រោងចក្រនោះបានឱ្យដឹងថា រថយន្តទាំងនោះប្រើប្រាស់ម៉ាស៊ីនរថយន្ត V6 មកពីរោងចក្រ General Motors។ ក្រៅពីនោះ គឺសុទ្ធតែជារូបរាងខាងក្រៅក្លែងក្លាយ សម្រាប់បន្លំភ្នែកមនុស្សទូទៅប៉ុណ្ណោះ។
ជាក់ស្ដែង Ferrari និង Lamborghini សប្បាយរីករាយនឹងការបញ្ឈប់ខ្សែចង្វាក់ផលិតកម្មលួចលាក់នេះ។ តាមប្រភពនៅកន្លែងកើតហេតុ គេថាក្រុមហ៊ុនទាំងពីរនេះហើយ ដែលជាអ្នកប្រាប់ប៉ូលិសឱ្យមកចុះចាប់។
ពាក្យបណ្តឹងនេះបានធ្វើឡើងតាមរយៈក្រុមហ៊ុនច្បាប់មួយនៅទីក្រុងសៅប៉ូឡូ ដែលតំណាងឱ្យក្រុមហ៊ុនរថយន្ត Ferrari និង Lamborghini។ ក្រៅពីមានពាក្យបណ្តឹងពីក្រុមហ៊ុនរថយន្តទាំងពីរនេះ គេក៏មានពាក្យមកពីអតិថិជនរបស់រោងចក្រលួចលាក់ផងដែរ។ អតិថិជននោះប្តឹងដោយសារតែមិនទទួលបានរថយន្តតាមការបញ្ជាទិញ ទាន់ពេលវេលា។ នាពេលនេះ ប៉ូលិសក៏ធ្វើការស៊ើបអង្កេតលើអ្នកទិញផងដែរ៕
ប្រភព ៖ Carbuzz , កែសម្រួលដោយ ៖ សំណាង
ចែករំលែកព័តមាននេះ