ខេត្តប៉ៃលិន ៖ បើតាមប្រភពចេញពីសាលាដំបូងខេត្តប៉ៃលិនបានបង្ហើបឱ្យដឹងថា រហូតមកដល់ព្រឹកថ្ងៃទី២៤ ខែកក្កដានេះ ស្ត្រីជាមន្ត្រីសុរិយោដីដែលឆបោកប្រាក់រាប់ម៉ឺនដុល្លារ ដើម្បីយកទៅសង់ផ្ទះសំណាក់ផ្ទាល់ខ្លួន និងទិញដីជាច្រើនកន្លែងដោយដាក់ឈ្មោះខ្លួនឯង ត្រូវបានបញ្ជូនទៅពន្ធនាគារហើយព្រឹកមិញនេះ ។ តែទោះបីជាយ៉ាងណា ស្ត្រីខិលខូចដែលពូកែប្រើល្បិចខាងលើមិនព្រមទទួលសងប្រាក់រាប់ម៉ឺនដុល្លារទាំងនោះទេ គឺសុខចិត្តជាប់ពន្ធនាគារជំនួសវិញ ដោយចង់បានទ្រព្យសម្បត្តិគេខ្លាំងពេក តែចាំមើល តើអាចលេបរបស់ទ្រព្យគេដ៏ស្រួលបែបនេះ ឬទេ ។
សូមបញ្ជាក់ថា ស្ត្រីឆបោកប្រាក់គេខាងលើមានឈ្មោះ រឿន ចរិយា អាយុ៣២ឆ្នាំ ជាមន្ត្រីសុរិ យោដី រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ដោយធ្លាប់ជាប់ពន្ធនាគារម្តងរួចទៅហើយ កាលពីប៉ុន្មានឆ្នាំមុន ពាក់ព័ន្ធនឹងករណីជម្លោះដីធ្លី ។ ចំណែកឯជនរងគ្រោះមិនបញ្ចេញឈ្មោះ ភេទស្រី អាយុជាង៤០ឆ្នាំ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយត្រូវគេបោកលុយអស់ជាង២០ម៉ឺនដុល្លារ ខណ:ជនរងគ្រោះបានពឹងពាក់ឱ្យស្ត្រីឆបោកខាងលើយកលុយទៅរកទិញដីតម្លៃជាង៣០ម៉ឺនដុល្លារ លុះម្ចាស់ប្រាក់ទើបតែប្រគល់ឱ្យជាង២០ម៉ឺនដុល្លារ ដើម្បីយកទៅកក់ថ្លៃដី និងរត់ការប្លង់រឹង ស្រាប់តែស្ត្រីខាងលើមិនដាក់ឈ្មោះម្ចាស់ប្រាក់នោះទេ ដោយដាក់ឈ្មោះខ្លួនឯងជំនួស ហើយតែងតែនិយាយកុហកបង្វិលម្ចាស់ប្រាក់ និងម្ចាស់ដីដោយបង្វែរទិសដៅមិនឱ្យពួកគេជួបគ្នាអស់រយ:ពេលជាច្រើនខែ ហើយគេចមុខថែមទៀត លុះម្ចាស់ប្រាក់សង្ស័យក៏តាមរហូតដល់ជួបម្ចាស់ដី ទើបដឹងរឿងពិតប្រាកដថា ស្ត្រីជាមន្ត្រីសុរិយោដីខាងលើជាជនឆបោកអស់រាប់ម៉ឺនដុល្លារ ។
បើតាមប្រភពព័ត៌មានពីស្ត្រីម្ចាស់ប្រាក់មិនបញ្ចេញឈ្មោះបានឱ្យដឹងតាមទូរស័ព្ទកាលពីវេលាម៉ោង១១ និង៣០នាទីព្រឹក ថ្ងៃទី២៤ ខែកក្កដានេះថា រហូតមកដល់ព្រឹកថ្ងៃដដែលនេះ ស្ត្រីកំពូលខូចជាជនឆបោកប្រាស់បានបោកលុយគាត់អស់ជាង២០ម៉ឺនដុល្លារ ខណ:រាប់អានគ្នាចេញចូលហូបបាយស្ទើរតែចានមួយពីរនាក់រហូតធ្វើឱ្យគាត់ទុកចិត្តក៏ប្រែជាហុតទឹកសម្លឹកកាកទៅហើយ ។ គាត់បញ្ជាក់ថា ស្ត្រីរូបនេះបានបោកលុយអ្នកធំៗជាច្រើននៅក្នុងខេត្តប៉ៃលិន បើគិតទៅអស់រាប់សែនដុល្លារឯណោះ ដោយយកទៅទិញដីនៅព្រំដែនខេត្តប៉ៃលិនទិញដីលំនៅឋាន និងទិញដីចម្ការនៅក្នុងក្រុងប៉ៃលិនជាច្រើនកន្លែងរហូតដល់ខេត្តបាត់ដំបងថែមទៀតផង ។
បើតាមប្រភពព័ត៌មានពីលោក នូ ចាន់ដេត មេធាវី ការពារក្តីរបស់ស្ត្រីជនរងគ្រោះខាងលើ បានឱ្យដឹងកាលពីវេលាម៉ោង១និង២០នាទីរសៀលថ្ងៃទី២៤ ខែកក្កដានេះថា រហូតមកដល់ពេលនេះខាងម្ចាស់ប្រាក់បានដាក់ពាក្យបណ្តឹងបន្ថែមពីលើបទរំលោភទំនុកចិត្ត ដោយប្តឹងឱ្យរក្សាការពារដីធ្លីចំនួន៤កន្លែង នៅក្នុងខេត្តប៉ៃលិន និងរក្សាការពារផ្ទះសំណាក់យីហោ «កូឡាបប៉ៃលិន» ដើម្បីទុកលក់សម្រាប់សងបំណុលជនរងគ្រោះ ៕ កែសម្រួលដោយ ៖ សុឃាក់
ចែករំលែកព័តមាននេះ