រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ស្ត្រីជាជនសង្ស័យម្នាក់ត្រូវបានក្រុមសន្តិសុខយាមរោងចក្រកាត់ដេរហុងវ៉ាធ្វើការចាប់ខ្លួន រួចនាំទៅប្រគល់ជូននគរបាលប៉ុស្តិ៍ចោមចៅ១ដើម្បីធ្វើការសាកសួរនិងចាត់ការតាមច្បាប់ បន្ទាប់ពីស្ត្រីជាជនសង្ស័យប្រើល្បិចធ្វើជាដើរបុកស្ត្រីចំណាស់ម្នាក់ធ្វើការផ្នែកអនាម័យក្នុងរោងចក្រ ហើយឆ្លៀតឱកាសបន្លំលូកកាបូបយកកាតការងារដែលស្ត្រីរងគ្រោះទុកលុយក្នុងកាតនោះ ប៉ុន្តែត្រូវបានស្ត្រីរងគ្រោះឃើញទាន់ក៏ស្រែកផ្អើលឆោឡោដល់សន្តិសុខជួយចាប់ខ្លួនបានភ្លាមៗតែម្ដង។
ហេតុការណ៍ខាងលើបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី២៤ ខែកក្កដា ឆ្នាំ២០១៩ នៅមុខរោងចក្រកាត់ដេរហុងវ៉ា ស្ថិតនៅតាមបណ្ដោយផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ស្ត្រីជាសង្ស័យឈ្មោះទូច ស្រីអូន អាយុ៣៣ឆ្នាំ មុខរបរមិនពិតប្រាកដ មានទីលំនៅភូមិបាក់ខែង សង្កាត់ព្រែកលៀប ខណ្ឌជ្រោយចង្វារ និងស្នាក់នៅផ្ទះជួល ក្នុងភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ ។ ចំណែកស្ត្រីរងគ្រោះឈ្មោះអុិន សុខលីម អាយុ៥៧ឆ្នាំ ជាកម្មការិនីផ្នែកអនាម័យក្នុងរោងចក្រ មានទីលំនៅក្នុងភូមិពងទឹក សង្កាត់ពងទឹក ខណណ្ឌដង្កោ រាជធានីភ្នំពេញ ។ ដោយឡែកនៅក្នុងកាតការងារនោះមានទុកលុយចំនួន៣០០ដុល្លារ និង១៦ម៉ឺនរៀលផងដែរ។
លុះពេលមន្ត្រីនគរបាលនាំទៅដល់ប៉ុស្តិ៍ ស្ត្រីសង្ស័យបានស្រែកយំអង្វរដល់ស្ត្រីរងគ្រោះសុំកុំប្ដឹងផ្ដល់អី ខ្លួនមិនចង់ជាប់គុកនោះទេ ព្រោះមានកូនប្រុសស្រីចំនួន៨នាក់កំពុងរង់ចាំនៅឯផ្ទះ ប៉ុន្តែស្ត្រីរងគ្រោះមិនព្រមឡើយ និងបានសំណូមពរសុំឲ្យនគរបាលចាត់ការតាមច្បាប់ ព្រោះកន្លងមកមានកម្មការិនីច្រើននាក់មកហើយដែលត្រូវបានរងគ្រោះបាត់លុយប្រាក់ខែ ដោយសារមានជនសង្ស័យលូកហោប៉ៅយកលុយអស់ ដោយអ្នកខ្លះទើបនឹងបើកប្រាក់ខែ រួចដើរចេញពីរោងចក្រមិនទាន់បានដល់ផ្ទះផង ត្រូវជនសង្ស័យលូកយកលុយបាត់ក៏មានដែរ។
តាមប្រភពពីស្ត្រីរងគ្រោះបានឱ្យដឹងថា នៅមុនពេលកើតហេតុ គាត់បានចេញមកក្រៅ និងដើរទៅរកទិញម្ហូបនៅខាងមុខរោងចក្រ ខណៈនោះស្រាប់តែលេចមុខស្ត្រីសង្ស័យម្នាក់ខាងលើដើរមកបុកគាត់ និងបន្លំលូកយកកាតការងារនៅក្នុងកាបូបដែលគាត់ស្ពាយជាប់ខ្លួន ហើយគាត់បានទុកលុយទាំងអស់នៅក្នុងកាតនោះផងដែរ ។
តាមប្រភពដដែលបានបន្តថា ដោយសារកាតមានខ្សែផងនោះ ទើបនៅពេលដែលស្ត្រីជាជនសង្ស័យដើរហួសបន្តិចគាត់ក្រឡេកមើលឃើញស្ត្រីនេះកាន់កាតបម្រុងលាក់ទុកដែរ ប៉ុន្តែលាក់មិនទាន់ ទើបគាត់ដឹងថាជាកាតរបស់គាត់ហើយគាត់ក៏ស្រែកឆោឡោបង្កការភ្ញាក់ផ្អើល ខណៈនោះក្រុមសន្តិសុខយាមរោងចក្រចេញមកជួយចាប់ខ្លួនស្ត្រីជាជនសង្ស័យប្រគល់ជូននគរបាលប៉ុស្តិ៍ចោមចៅ១តែម្ដង។
តាមប្រភពពីនគរបាលបានឱ្យដឹងថា ក្រោយទទួលយកស្ត្រីជាជនសង្ស័យពីសន្តិសុខ ហើយក៏នាំមកដល់ប៉ុស្ដិ៍ដើម្បីធ្វើការសួរនាំ ទើបដឹងថាស្ត្រីម្នាក់នេះគឺមានជំនាញខាងដើរបុកលូកហោប៉ៅនិងកាបូប ហើយតែងតែធ្វើសកម្មភាពបែបនេះញឹកញាប់ ព្រមទាំងបានគេចខ្លួនរួចជាបន្តបន្ទាប់ថែមទៀតផង តែពេលនេះត្រូវបានសមត្ថកិច្ចសាកសួរ និងកសាងសំណុំរឿងចាត់ការតាមច្បាប់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ