ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ៣នាក់ ក្នុងនោះមានអ្នកទទួលផលចោរកម្មម្នាក់ត្រូវសមត្ថកិច្ចស្រាវជ្រាវឃាត់ខ្លួនជាបន្តបន្ទាប់ កាលពីរសៀលថ្ងៃទី២៣ ខែកក្កដា ឆ្នាំ២០១៩ ដែលពាក់ព័ន្ធក្នុងករណី «ឆក់ទូរស័ព្ទ»…
ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ៣នាក់ ក្នុងនោះមានអ្នកទទួលផលចោរកម្មម្នាក់ត្រូវសមត្ថកិច្ចស្រាវជ្រាវឃាត់ខ្លួនជាបន្តបន្ទាប់ កាលពីរសៀលថ្ងៃទី២៣ ខែកក្កដា ឆ្នាំ២០១៩ ដែលពាក់ព័ន្ធក្នុងករណី «ឆក់ទូរស័ព្ទ» នៅភូមិជ្រៃកោង សង្កាត់ស្លាកែត ក្រុងបាត់ដំបង។
នាយការិយាល័យព្រហ្មទណ្ឌកំរិតស្រាល លោកឈឿង គឹមសុង បានឲ្យដឹងថា ជនសង្ស័យទាំង៣នាក់នោះ ១-ឈ្មោះ ជេត ណូមន្វណ្ណ អាយុ៣១ឆ្នាំ នៅភូមិកំពង់ក្របី សង្កាត់ស្វាយប៉ោ ២-ឈ្មោះលឿម សុវណ្ណ ហៅ ក្ដី អាយុ៣២ឆ្នាំ នៅភូមិថ្កូវ សង្កាត់ក្ដុលដូនទាវ (២នាក់នេះដៃដល់) និង៣-ឈ្មោះសន បញ្ញា ហៅ ង៉ា អាយុ២៥ឆ្នាំ នៅភូមិកំពង់សំបួរ ឃុំសំរោងក្នុង ស្រុកឯកភ្នំ (អ្នកទទូលផល និងជាម្ចាស់ម៉ូតូ)។
លោកនាយការិយាល័យបានប្រាប់ថា ជនដៃដល់ទាំងនេះ បានធ្វើសកម្មភាព«ឆក់ទូរស័ព្ទ» ពីជនរងគ្រោះឈ្មោះវុន សុធាវី ស្រីអាយុ២៣ឆ្នាំ ខណៈពេលកំពុងឈរចាំដកលុយនៅកន្លែងវេរលុយ «វីង» មួយកន្លែង កាលពីរសៀលថ្ងៃទី២២ កក្កដា នៅចំណុចភូមិ សង្កាត់ខាងលើ រហូតមានការប្រទាញប្រទង់គ្នាទៀតផង តែជនសង្ស័យបានកាន់ទូរស័ព្ទរត់ឡើងម៉ូតូជិះខ្លួនបាត់ លុះមួយថ្ងៃក្រោយទើបត្រូវកម្លាំងជំនាញតាមឃាត់ខ្លួនបានទាំង៣នាក់។
បើតាមនារីរងគ្រោះនិយាយថា ពេលកើតហេតុ នាងឈរកាន់ទូរស័ព្ទនៅកន្លែង «វីង» វេរលុយដោយកាន់ក្រពាត់ដៃមកក្រោយ ស្រាប់មានជនម្នាក់ដើរលបៗមកពីក្រោយឆក់ទូរស័ព្ទពីដៃនាងតែម្ដង។ ពេលនោះនាងព្យាយាមប្រទាញប្រទង់ដណ្ដើមយកទូរស័ព្ទវិញ តែមិនបានហើយហើយជននោះក៏រត់ទៅឡើងជិះម៉ូតូដែលមានគ្នាម្នាក់ទៀតចាំលើម៉ូតូជាស្រេច។
លោក ឈឿង គឹមសុង បាននិយាយអំពីដំណើររឿងនេះថា ជនសង្ស័យទាំង២នាក់ បានជំពាក់លុយម្ចាស់ម៉ូតូឈ្មោះ សន បញ្ញា ហៅ ង៉ា តែពេលនោះសង្ស័យមិនទាន់មានលុយសងទេ ហើយជនទាំង២នេះក៏សុំខ្ចីម៉ូតូពីឈ្មោះ ង៉ា នេះមួយភ្លែតដោយប្រាប់ថា ជិះទៅរកលុយ។ ក្រោយពីបានម៉ូតូជនទាំង២នាក់ ក៏ជិះចេញទៅ ឆក់ទូរស័ព្ទតែម្ដង។ ពេលឆក់បានទូរស័ព្ទជនទាំង២នាក់ ក៏យកទូរស័ព្ទម៉ាកអាយហ្វូននោះមកសងម្ចាស់ម៉ូតូជាថ្នូរនឹងលុយជំពាក់។ ប៉ុន្តែពេលកម្លាំងជំនាញកំណត់បាននូវមុខសញ្ញា ទើបលោកស្នងការខេត្តបញ្ជាឲ្យឃាត់ខ្លួនទាំងជនដៃដល់ ទាំងម្ចាស់ម៉ូតូដែលទទួលផលចោរកម្មនោះតែម្តង។
លោកបញ្ជាក់ទៀតថា ជាមួយនឹងការឃាត់ខ្លួននេះ កម្លាំងជំនាញដកហូតបានម៉ូតូម៉ាក PCX ពណ៌ស១គ្រឿង និងទូរស័ព្ទម៉ាកអាយហ្វូន១គ្រឿង ដែលឆក់បានពីជនរងគ្រោះ។ ពេលនេះមន្ត្រីជំនាញកំពុងសួរនាំជនសង្ស័យទាំង៣នាក់ ដើម្បីកសាងសំណុំរឿងបញ្ជូនទៅតុលាការហើយ។ (កែសម្រួលដោយ ៖ បុប្ផា)
ចែករំលែកព័តមាននេះ