រាជធានីភ្នំពេញ ៖ ក្រសួងធនធានទឹកនិងឧតុនិយមបានឲ្យដឹងថា ស្ថានភាពអាកាសធាតុនឹងមានភាពល្អប្រសើរឡើងវិញនៅចុងខែកក្កដានេះ ខណៈបាតុភូតផ្គរ រន្ទះ និងខ្យល់កន្ត្រាក់ មានសភាពធូរស្រាលជាងមុន ។ តាមសេចក្ដីជូនដំណឹងរបស់ក្រសួងធនធានទឹកនិងឧតុនិយម…
រាជធានីភ្នំពេញ ៖ ក្រសួងធនធានទឹកនិងឧតុនិយមបានឲ្យដឹងថា ស្ថានភាពអាកាសធាតុនឹងមានភាពល្អប្រសើរឡើងវិញនៅចុងខែកក្កដានេះ ខណៈបាតុភូតផ្គរ រន្ទះ និងខ្យល់កន្ត្រាក់ មានសភាពធូរស្រាលជាងមុន ។ តាមសេចក្ដីជូនដំណឹងរបស់ក្រសួងធនធានទឹកនិងឧតុនិយម ដែលបានចេញផ្សាយនៅថ្ងៃទី២៣ ខែកក្កដា បានឲ្យដឹងថា ចាប់ពីថ្ងៃទី២៣ ដល់ថ្ងៃទី២៩ ខែកក្កដា ស្ថានភាពអាកាសធាតុនឹងមានភាពវិជ្ជមានឡើងវិញ ដែលបង្កឲ្យមានភ្លៀងធ្លាក់បានល្អ ក្នុងកម្រិតពីមធ្យមទៅច្រើន និងរាយប៉ាយបានល្អប្រសើរ ។
សេចក្ដីជូនដំណឹងបានឲ្យដឹងទៀតថា ជ្រលងសម្ពាធទាបដែលកន្លងមក ស្ថិតនៅភាគខាងលើកម្ពុជា បច្ចុប្បន្នបានរំកិលចុះមកក្រោម ទន្ទឹមនឹងខ្យល់មូសុងនិរតីបាននិងកំពុងមានឥទ្ធិពលក្នុងកម្រិតមធ្យម ដែលលក្ខណៈបែបនេះធ្វើឲ្យស្ថានភាពអាកាសធាតុនឹងមានភាពវិជ្ជមានឡើង វិញដោយនៅតាមបណ្តាខេត្តភាគខាងលើភ្លៀងនឹងធ្លាក់បានល្អ ក្នុងកម្រិតពីមធ្យមទៅច្រើន និងមានភាពរាយប៉ាយបានប្រសើរឡើងផងដែរ។
ដោយឡែក ចំពោះរាជធានីភ្នំពេញ និងបណ្តាខេត្តនៅទំនាបកណ្តាលភាគខាងក្រោម នឹងមានភ្លៀងក្នុងកម្រិតពីតិចទៅបង្គួរ ។ ឯចំពោះបណ្តាខេត្តជាប់សមុទ្រ នឹងអាចមានភ្លៀងក្នុងកម្រិតពីតិចទៅមធ្យម ។ ដូច្នេះ សូមសាធារណជនមានការប្រុងប្រយ័ត្ន ចំពោះបាតុភូតផ្គរ រន្ទះនិងខ្យល់កន្ត្រាក់ ទោះបីជាមានសភាពធូរស្រាលជាងមុនក្តី ។ ( សម្រួលដោយ៖ ស្រីណា)
ចែករំលែកព័តមាននេះ