រាជធានីភ្នំពេញ ៖ ចាប់ពីថ្ងៃនេះ ដល់ថ្ងៃទី២៩ កក្កដានេះ ភ្លៀងនឹងធ្លាក់ក្នុងកម្រិតពីមធ្យមទៅច្រើន ខណៈបាតុភូតផ្គររន្ទះ និងខ្យល់កន្ត្រាក់មានសភាពធូរស្រាលជាងមុន ។ នេះបើតាមក្រសួងធនធានទឹក និងឧត្តនិយម ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមនៅថ្ងៃទី២៣ ខែកក្កដានេះ បានព្យាករណ៍ថា ចាប់ពីថ្ងៃនេះដល់ថ្ងៃទី២៩ ខែកក្កដា ឆ្នាំ២០១៩ ភ្លៀងនឹងបន្តធ្លាក់បានល្អ ក្នុងកម្រិតពីមធ្យមទៅច្រើន និងរាយប៉ាយបានប្រសើរ ខណៈបាតុភូតផ្គររន្ទះ និងខ្យល់កន្ត្រាក់ មានសភាពធូរស្រាលជាងមុន ។
ក្រសួងធនធានទឹកបានបញ្ជាក់ថា ជ្រលងសម្ពាធទាបដែលកន្លងមកស្ថិតនៅភាគខាងលើកម្ពុជាបច្ចុប្បន្នបានរំកិលចុះមកក្រោមទន្ទឹម នឹងខ្យល់មូសុងនិរតីបាន និងកំពុងមានឥទ្ធិពលក្នុងកម្រិតមធ្យម លក្ខណៈបែបនេះធ្វើឲ្យក្នុងអំឡុងចាប់ពីថ្ងៃទី២៣ ដល់ថ្ងៃទី២៩ ខែកក្កដា ស្ថានភាពអាកាសធាតុនឹងមានភាពវិជ្ជមានឡើងវិញ ដោយបណ្តាខេត្តភាគខាងលើភ្លៀងនឹងធ្លាក់បានល្អ ក្នុងកម្រិតពីមធ្យមទៅច្រើន ។ ឯភាពរាយប៉ាយក៏បានប្រសើរឡើងផងដែរ ហើយ បណ្តាខេត្ត និងរាជធានីនៅទំនាបកណ្តាលភាគខាងក្រោម និងមានភ្លៀងក្នុងកម្រិតពីតិចទៅបង្គួរ ចំពោះបណ្តាខេត្តជាប់សមុទ្រនឹងអាចមានភ្លៀង ក្នុងកម្រិតពីតិចទៅមធ្យម ។
ជាមួយគ្នានោះដែរ ក្រសួងក៏បានជម្រាបដល់សាធារណជនមានការប្រុងប្រយ័ត្នចំពោះ បាតុភូតផ្គររន្ទះ និងខ្យល់កន្ត្រាក់ ទោះបីជាមានសភាពធូរស្រាលជាងមុនហើយក៏ដោយ ៕ កែសម្រួលដោយ ៖ សុឃាក់
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ