ពេលវេលាមិនឈប់ចាំមនុស្សទេ ជាពិសេសនៅពេលដែលអ្នកឈានចូលអាយុ៣០ឆ្នាំ ។ វាជាអាយុមួយដែលមនុស្សភាគច្រើនកាន់តែដាក់សម្ពាធលើខ្លួនបន្ថែមទៀត ក្នុងការរកលុយ ឬបង្កើនទ្រព្យសម្បត្តិ ។ តើអ្នកគិតថា ខ្លួនកំពុងតែស្ថិតក្នុងស្ថានការមួយដែលល្អ ឬនៅ ឬអ្នកនៅមិនទាន់ពេញចិត្តនឹងស្ថានការនេះទេ ? ខាងក្រោមនេះ គឺជាសំណួរមួយចំនួនដែលអ្នកគួរតែឆ្លើយបានពេលដែលឈានចូលអាយុ៣០ឆ្នាំ ៖
១. តើអ្នកបានវិនិយោគលើអ្វីខ្លះ ?
ពេលដែលឈានចូលអាយុ៣០ឆ្នាំ អ្នកប្រហែលជាបានវិនិយោគលុយលើអ្វីមួយហើយ មិនថាជាអាជីវកម្ម ឬអចលនទ្រព្យឡើយ ។ វាជាពេលមួយដែលអ្នកគួរតែមើលលើអ្វីដែលអ្នកវិនិយោគឡើងវិញ ដើម្បីស្វែងរកវិធីបង្កើនប្រាក់ចំណូល ។ តើការវិនិយោគរបស់អ្នកកំពុងតែរកប្រាក់ចំណូលដល់អ្នកច្រើនទេ ? តើអ្នកបានផ្លាស់ប្តូរការវិនិយោគអ្នកទេ ?
២. តើអ្នកមានលុយសន្សំទុកពេលអាសន្នប៉ុន្មាន ?
អ្នកប្រហែលជាគិតថា ទោះជាអាយុ៣០ឆ្នាំ ពិតមែន តែអ្នកមានសុខភាពល្អ និងរាងកាយមាំមួនដដែល ។ ប៉ុន្តែចូរចងចាំថាជីវិត គឺពោរពេញទៅដោយភាពភ្ញាក់ផ្អើល ដូច្នេះអ្នកគួរតែមានថវិកាសន្សំទុកពេលមានអាសន្នដូចជា ថវិកាសម្រាប់បង់ថ្លៃព្យាបាលជំងឺប្រចាំកាយ ជួសជុលរថយន្ត ឬសម្ភារៈផ្សេងៗដែលចាំបាច់ជាដើម ។ តើអ្នកគិតថា អ្នកមានថវិកាគ្រប់គ្រាន់ ដើម្បីចំណាយលើស្ថានការខាងលើនេះទេ ប្រសិនបើវាកើតមានឡើងពិតមែន ?
៣. អ្នកមានធានារ៉ាប់រងទេ?
ការបង្កើនប្រាក់ចំណូល គឺសំខាន់ហើយ ប៉ុន្តែការការពារទ្រព្យសម្បត្តិក៏សំខាន់ដែរ ។ ធានារ៉ាប់រង គឺជាមធ្យោបាយមួយដែលអ្នកអាចការពារទ្រព្យសម្បត្តិ និងក្រុមគ្រួសារអ្នកបានប្រសិនបើជួបនឹងបញ្ហាណាមួយដែលអ្នកមិនចង់ឲ្យកើតមានឡើង ។ តើអ្នកមានធានារ៉ាប់រងអាយុជីវិតទេ ? តើអ្នកមានធានារ៉ាប់រងដែលការពាររថយន្តទេ ?
៤. តើគណនីសន្សំរបស់អ្នកល្អសម្រាប់អ្នកទេ ?
អ្នកប្រហែលជាមនុស្សដែលចូលចិត្តទុកលុយក្នុងគណនីសន្សំតាំងពីចេញធ្វើការដំបូងមក ប៉ុន្តែតើអ្នកដែលគិតពីការប្រាក់ដែលអ្នកទទួលបានទេ ? តើអ្នកដឹងពីថ្លៃសេវាដែលអ្នកបង់ទៅធនាគារពីមួយឆ្នាំទៅមួយឆ្នាំទេ ? ប្រសិនបើអ្នកឈានចូលអាយុ៣០ឆ្នាំ ហើយអ្នកគួរតែយល់ដឹងឲ្យច្បាស់ពីការទុកដាក់លុយរបស់អ្នក និងគួរតែស្វែងរកធនាគារដែលផ្តល់ជម្រើសល្អជាងគេដល់អ្នក ៕ កែសម្រួលដោយ ៖ សុឃាក់
ចែករំលែកព័តមាននេះ