រាជធានីភ្នំពេញ ៖ បុរស២នាក់បានស្លាប់លើផ្លូវដែកនៅចំណុច២ផ្សេងគ្នា ដែលម្នាក់ត្រូវបានកិនដាច់ក្បាល និងម្នាក់ទៀតបុកហើយកិន ។ នេះជាហេតុការណ៍គួរឱ្យសោកស្តាយ ដែលបុរសទាំង២នាក់ស្លាប់ដោយ សាររថភ្លើងកិន និងធ្វើឱ្យមានការភ្ញាក់ផ្អើល…
រាជធានីភ្នំពេញ ៖ បុរស២នាក់បានស្លាប់លើផ្លូវដែកនៅចំណុច២ផ្សេងគ្នា ដែលម្នាក់ត្រូវបានកិនដាច់ក្បាល និងម្នាក់ទៀតបុកហើយកិន ។ នេះជាហេតុការណ៍គួរឱ្យសោកស្តាយ ដែលបុរសទាំង២នាក់ស្លាប់ដោយ សាររថភ្លើងកិន និងធ្វើឱ្យមានការភ្ញាក់ផ្អើល នាព្រឹកថ្ងៃទី២២ ខែកក្កដា ។ ខាងក្រោមនេះ ជាសេចក្តីរាយ
ការណ៍ទាំង២ករណី ជុំវិញហេតុការណ៍ដ៏រន្ធត់នេះ ក្នុងគោលបំណងអំពាវនាវដល់បងប្អូនប្រជាពលរដ្ឋពុំគប្បីទៅដេក ឬទៅអង្គុយលើផ្លូវដែក ដែលនាំឱ្យមានគ្រោះថ្នាក់បែបនេះឡើយ ។
រថភ្លើងកិនបុរសម្នាក់ដាច់ក្បាលចេញពីដងខ្លួន សពបុរសម្នាក់ត្រូវបានអ្នកភូមិប្រទះឃើញនៅលើផ្លូវដែក ស្ថិតក្នុងសភាពដាច់ក្បាលចេញពីដងខ្លួន ដោយក្បាលស្ថិតនៅក្នុងគន្លងផ្លូវដែកឯដងខ្លួនស្ថិតនៅក្រៅគន្លង ដែលស្ថានភាពបែបនេះច្បាស់ណាស់ថា បុរសដែលស្លាប់ដោយដាច់កនេះគឺត្រូវរថភ្លើងកិន ប៉ុន្តែមិនមានអ្នកណាម្នាក់បានដឹងថា គាត់ដេកកើយផ្លូវដែកហើយលង់លក់ជ្រុលទើបត្រូវរថភ្លើងកិនឬបែបណានោះឡើយ។ ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោងប្រមាណ៦និង៥០នាទីព្រឹកថ្ងៃទី២២ ខែកក្កដា នៅផ្លូវរថភ្លើងខ្សែភ្នំពេញ-កំពត ស្ថិតក្នុងភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ ។
បុរសរងគ្រោះឈ្មោះ លី លាភ អាយុ៣៧ឆ្នាំ ជាកម្មករនៅយានដ្ឋានរថយន្តដឹកប្រេង មានស្រុកកំណើតនៅក្នុងឃុំទួលសុភី ស្រុកអូរាំងឪខេត្តត្បូងឃ្មុំ និងមានទីលំនៅអចិន្ត្រៃយ៍នៅភូមិឈើទាលភ្លោះក្រោម ឃុំកញ្ជរ ស្រុកឆ្លូង ខេត្តក្រចេះ ប្រពន្ធឈ្មោះ យ៉េន សីយ៉ាន អាយុ៣៩ឆ្នាំ ជាកម្មការិនីរោងចក្រ មានកូនស្រី៤នាក់ នៅក្នុងបន្ទុក និងស្នាក់នៅផ្ទះជួលក្នុងភូមិកើតហេតុខាងលើ ។
ស្ត្រីជាប្រពន្ធនិយាយថា ប្ដីគាត់ទើបមកធ្វើជាកម្មករនៅយានដ្ឋានរថយន្តដឹកប្រេងរយៈពេលប្រមាណ១ឆ្នាំប៉ុណ្ណោះ ហើយចំពោះការស្លាប់របស់ប្ដីបែបណានោះរូបគាត់មិនបានដឹងទេ ព្រោះភាគច្រើនគាត់និងប្ដីស្នាក់នៅបែកគ្នា មិនសូវជាបានជួបគ្នាឡើយ ។ ប៉ុន្តែគាត់មិនបានប្រាប់ថា មូលហេតុអ្វីទើបស្នាក់នៅបែកគ្នាទេ ដោយគ្រាន់តែប្រាប់ថា ប្ដីគាត់ស្នាក់នៅកន្លែងធ្វើការឬស្នាក់នៅជាមួយបងប្អូន ចំណែករូបគាត់ស្នាក់នៅផ្ទះជួលជាមួយកូនៗ រហូតដល់ព្រឹកថ្ងៃកើតហេតុទើបទទួលដំណឹងថាប្ដីត្រូវរថភ្លើងកិនដាច់ក្បាលស្លាប់បាត់ទៅហើយ ។
ដោយឡែកសាច់ញាតិបានឲ្យដឹងថា កាលពីយប់ថ្ងៃទី២១ ខែកក្កដា បុរសគ្រោះបានជួបជុំគ្នាផឹកសុីជាមួយបងប្អូន២នាក់ទៀត ដោយផឹកស្រាថ្នាំអស់កន្លះលីត្រ រួចក៏ចែកផ្លូវគ្នាចូលសម្រាករៀងៗខ្លួន ហើយបុរសរងគ្រោះបានដេកនៅផ្ទះរបស់គាត់(ផ្ទះសាច់ញាតិ) ។ លុះក្រោយមកមិនមានអ្នកណាម្នាក់ដឹងថា បុរសរងគ្រោះចេញទៅក្រៅតាំងពីពេលណាឡើយ រហូតដល់ព្រឹកឡើងថ្ងៃទី២២ ខែកក្កដា ស្រាប់តែអ្នកភូមិប្រទះឃើញស្លាប់ដោយត្រូវរថភ្លើងកិនដាច់ក្បាលចេញពីដងខ្លួនបាត់ទៅហើយ ។
តាមប្រភពព័ត៌មាននៅកន្លែងកើតហេតុឲ្យដឹងថា ខណៈនោះបង្កឲ្យមានការភ្ញាក់ផ្អើលយ៉ាង ខ្លាំង ហើយនៅពេលកំពុងមានមនុស្សទៅចោមរោមមើលយ៉ាងច្រើន ហើយសពកំពុងស្ថិតនៅកន្លែងកើតហេតុនៅឡើយនោះ ស្រាប់តែមានរថភ្លើង១ខ្សែផ្សេងទៀតដឹកសុទ្ធតែទូកុងតឺន័រ បើកបរក្នុងទិសដៅពីខាងត្បូងទៅខាងជើង គឺពីខេត្តកំពតឆ្ពោះចូលមករាជធានីភ្នំពេញបានមកដល់ ។ ខណៈនោះដោយខ្លាចត្រូវរថភ្លើងកិនថែមទៀតអាចខ្ទេចសព ទើបអ្នកភូមិនាំគ្នាឈរឃាត់ឲ្យរថភ្លើងឈប់ ហើយរថភ្លើងនោះក៏បានឈប់រហូតសាច់ញាតិបានលើកសពចេញពីកន្លែងកើតហេតុរួចរាល់ ទើបរថភ្លើងបន្តដំណើរទៅមុខទៀត ។
ទាក់ទងទៅនឹងហេតុការណ៍នេះ នគរបាលប៉ុស្តិ៍កន្ទោក និងនគរបាលចរាចរណ៍ខណ្ឌពោធិ៍សែនជ័យ បានចុះទៅធ្វើការស្រាវជ្រាវនិងចាត់ការតាមជំនាញ ។ប្រទះឃើញបុរសម្នាក់ត្រូវរថភ្លើងបុកស្លាប់ដែរបុរសម្នាក់ជាកម្មករសំណង់នៅការដ្ឋានស្ពាន អាកាសចោមចៅ ខណៈទៅលេងផ្ទះប្អូនភ្លោះរបស់ខ្លួន ហើយមានការផឹកសុីជុំគ្នារហូតដល់ស្រវឹងនោះប្អូនប្រុសក៏បានដេកទៅ ។
ចំណែករូបគាត់បានដើរចេញពីផ្ទះប្អូនតាមផ្លូវរថភ្លើង ស្រាប់តែវង្វេងបាត់១យប់ ខណៈនោះប្អូនប្រុសស្មានថាបងប្រុសរបស់ខ្លួនវិលទៅកាន់ការដ្ឋានសំណង់វិញហើយទើបមិនបានតាមរក ។ លុះដល់វេលាថ្ងៃត្រង់ ទើបទទួលដំណឹងថា បងប្រុសរូបនេះស្លាប់នៅកណ្ដាលផ្លូវដែកចម្ងាយប្រមាណ៤គីឡូម៉ែត្រពីផ្ទះ ដែលសង្ស័យត្រូវរថភ្លើងបុកកាលពីវេលាយប់ ។សពបុរសរងគ្រោះ ត្រូវបានអ្នកភូមិប្រទះឃើញកាលពីវេលាម៉ោងប្រមាណ៧ព្រឹកថ្ងៃទី២២ខែកក្កដា នៅលើផ្លូវដែកស្ថិតក្នុងភូមិប្រទះឡាង សង្កាត់ប្រទះឡាង ខណ្ឌកំបូល ។ បុរសរងគ្រោះខាងលើឈ្មោះ ចេង ហុំ អាយុ៤០ឆ្នាំ មានទីលំនៅក្នុងភូមិកំពង់អុស ឃុំកំពង់អុស ស្រុកជលគិរី ខេត្តកំពង់ឆ្នាំង ។
បុរសជាប្អូនភ្លោះឈ្មោះ ចេង ហាន និយាយថា រូបគាត់និងបងប្រុសដែលស្លាប់គឺជាបងប្អូនភ្លោះ ហើយគាត់ក៏ជាកម្មករសំណង់ដែរប៉ុន្តែធ្វើការនៅការដ្ឋានផ្សេង និងស្នាក់នៅផ្សេងពីគ្នា។បងប្រុសគាត់ម្នាក់នេះមានប្រពន្ធនិងកូន៤នាក់ប៉ុន្តែបានលែងលះគ្នា២ឆ្នាំមកហើយ និងក្រោយមកបានមកស្នាក់នៅជាមួយម្ដាយ ដោយគាត់គ្មានផ្ទះសម្បែងផ្ទាល់ខ្លួនឡើយ ។ បុរសជាប្អូននិយាយទៀតថា ទោះជាលែងលះគ្នាជាមួយប្រពន្ធមែន ប៉ុន្តែគាត់នៅតែប្រឹងធ្វើការរកសុីផ្ដល់លុយដល់កូនៗទាំង៤នាក់ដែរ ។
ដោយឡែក នៅមុនពេលកើតហេតុគឺនៅថ្ងៃទី២១ ខែកក្កដា បងប្រុសគាត់បានមកលេងផ្ទះគាត់នៅក្នុងភូមិភ្លើងឆេះរទេះ សង្កាត់ភ្លើងឆេះរទេះ ខណ្ឌកំបូល និងបានជួបជុំគ្នាផឹកសុីមានគ្នា៦ទៅ៧នាក់ ផឹកអស់ស្រាបៀរចំនួន២កេស ។ លុះពេលស្រវឹងហើយ ក៏ចែកផ្លូវគ្នាចូលសម្រាក ។ប្រភពដដែលបន្តថា នៅមុនពេលចូលដេកគាត់បានប្រាប់ឲ្យប្អូនម្នាក់ទៀតជិះម៉ូតូឌុបបងប្រុសខាងលើទៅកាន់តំបន់សេដ្ឋកិច្ចពិសេសភ្នំពេញ
ដើម្បីជិះរថយន្តឈ្នួលបន្តដំណើរទៅការដ្ឋានសំ ណង់ស្ពានអាកាសចោមចៅវិញ ។
បន្ទាប់ពីចាត់ចែងរួច គាត់បានចូលដេកហើយក្រោយមកឮប្រពន្ធគាត់ប្រាប់ថា ប្អូនប្រុសម្នាក់ទៀតមិនបានឌុបបងប្រុសម្នាក់នេះទៅទេ ព្រោះពេលរៀបចំដឹកទៅស្រាប់តែបាត់បងប្រុសរកមិនឃើញ ហើយម្នាក់ៗស្មានថា បងប្រុសធ្វើដំណើរទៅកន្លែងធ្វើការបាត់ហើយទើបអត់ដើររក ។ លុះដល់វេលាថ្ងៃត្រង់ថ្ងៃទី២២ ខែកក្កដា ស្រាប់តែទទួលបានព័ត៌មានថា បងប្រុសត្រូវរថភ្លើងបុកស្លាប់ ទើបទៅមើលឃើញពិតជាស្លាប់មែននៅចម្ងាយជាង៤គីឡូម៉ែត្រពីផ្ទះរបស់គាត់ ជាហេតុធ្វើឲ្យគាត់តក់ស្លុតជាខ្លាំងដែលមិន គួរណាបងប្រុសត្រូវស្លាប់ពេលមកលេងផ្ទះគាត់សោះ ។
អ្នកភូមិនិយាយថា កាលពីព្រលប់ថ្ងៃទី២១ខែកក្កដា ពួកគាត់បានឃើញបុរសខាងលើដើរតែម្នាក់ឯងលើផ្លូវដែកក្នុងទិសដៅពីខាងជើងទៅ ខាងត្បូង ហើយពួកគាត់បានសួរនាំដែរប៉ុន្តែបុរសនេះអត់និយាយអ្វីទាំងអស់ ។ ខណៈនោះដោយសារតែមើលទៅឃើញបុរសនេះមានសភាពស្រវឹងផងទើបមិនបានដេញដោលសួរទៀត ហើយក៏មិនបានចាប់អារម្មណ៍ថាគាត់ជួបរឿងអកុសលបែបនេះទេ ។
លុះដល់ព្រឹកឡើង ពេលពួកគាត់ធ្វើដំណើរឆ្លងកាត់ទីនោះ ស្រាប់តែប្រទះឃើញបុរសខាងលើស្លាប់នៅកណ្ដាលផ្លូវដែក ដោយមានស្នាមរយះក្បាល បែកមុខ និងស្នាមនៅលើដងខ្លួនជាច្រើនកន្លែងទៀត ក្រោយពីទទួលបានដំណឹងនេះភ្លាម នគរបាលប៉ុស្ដិ៍ប្រទះឡាង និងនគរបាលព្រហ្មទណ្ឌខណ្ឌដង្កោ ដែលតំណាងឲ្យនគរបាលខណ្ឌកំបូលដែលមិនទាន់រៀបចំរដ្ឋបាលរួចរាល់នៅឡើយនោះ បានទៅពិនិត្យមើលជាក់ស្ដែង និងប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (សម្រួលដោយ៖ ស្រីណា)
ចែករំលែកព័តមាននេះ