ខេត្តរតនគិរី ៖ គំនរឈើជាច្រើនកំណាត់ដែលក្រុមឈ្មួញលាក់ទុកក្នុងព្រៃ បានត្រូវកម្លាំងចម្រុះស្រុកអូរយ៉ាដាវរុករកឃើញ និងប្រមូលដឹកជញ្ជូនយកមករក្សាទុក ។ ការចុះប្រមូលដឹកជញ្ជូនឈើនេះ សមត្ថកិច្ចបានធ្វើឡើងកាលពីវេលាម៉ោងប្រមាណ១០ព្រឹកថ្ងៃទី២០ ខែកក្កដា នៅភូមិសោមគល់ ឃុំសោមធំ ស្រុកអូរយ៉ាដាវ ។
ការបង្ក្រាបនេះ មានការចូលរួមពីលោក ហ៊ី សុភាព អធិការរងនគរបាលស្រុក ដឹកនាំដោយលោក រចំ ហ្វា អភិបាលរងស្រុកអូរយ៉ាដាវ និងលោក ខៀវ ចន្ទី នាយសង្កាត់រដ្ឋបាលព្រៃឈើស្រុកអូរយ៉ាដាវ និងកម្លាំងកងរាជអាវុធហត្ថស្រុក បានរុករកឃើញឈើចំនួន១៦កំណាត់ដែលឡាំងបួនជ្រុងប្រវែង៣ម៉ែត្រ នៅក្នុងភូមិសាស្ត្រខាងលើ ។
ក្រោយពេលបង្ក្រាបរឹបអូស សមត្ថកិច្ចបានដឹកជញ្ជូនកំណាត់ឈើទាំងនេះ យកទៅរក្សាទុកនៅអធិការ
ដ្ឋាននគរបាលស្រុកអូរយ៉ាដាវ ដើម្បីធ្វើកំណត់ហេតុប្រគល់ឱ្យខាងរដ្ឋបាលព្រៃឈើចាត់ការបន្ត ។ (សម្រួលដោយ៖ ស្រីណា)
ចែករំលែកព័តមាននេះ