គូស្វាមីភរិយាចែករំលែកលំនៅដ្ឋាន និងគ្រែគេង ប៉ុន្តែការរស់នៅជាមួយនឹងដៃគូជីវិតដែលគ្រប់គ្រងអ្នកពេកទាក់ទិននឹងការចាយវាយរបស់អ្នកអាចធ្វើឲ្យអ្នកមានអារម្មណ៍ដូចត្រូវបានឃុំឃាំង ដែលមិនល្អឡើយសម្រាប់ទំនាក់ទំនងអ្នកទាំងពីរ ។ ប៉ុន្តែអ្នកអាចចាកចេញពីស្ថានការនេះបាន ។ ប្រសិនបើអ្នកគិតថា អ្នកកំពុងតែមានករណីដូចខាងលើអ្នកអាចសាកល្បងធ្វើតាមចំណុចខាងក្រោមនេះបាន ៖
១. ស្វែងរក និងយល់ដឹងពីមូលហេតុ
អ្នកគួរតែមានការសន្ទនាស្មោះត្រង់មួយជាមួយនឹងដៃគូរបស់អ្នកពីការគ្រប់គ្រងលុយ ។ ពេលខ្លះទម្លាប់គ្រប់គ្រងជ្រុលនេះ មិនទាក់ទិននឹងការដែលពួកគេមិនជឿជាក់អ្នកទេ តែអាចនឹងទាក់ទិននឹងការព្រួយបារម្ភពីអ្វីមួយដែលកើតមានឡើង ព្រោះតែស្ថានការរស់នៅរបស់ដៃគូអ្នក ។ ឧទហករណ៍ដូចជា ពួកគេភ័យខ្លាចថា នឹងអស់លុយសម្រាប់ការប្រើអនាគត ។
២. ចូលរួមរំលែកសម្ពាធ
ទម្លាប់គ្រប់គ្រងហួសហេតុរបស់ដៃគូអ្នកអាចមកពីសម្ពាធក្នុងការគ្រប់គ្រងលុយម្នាក់ឯង ។ អ្នកអាចចូលរួមចែករំលែកសម្ពាធនេះបាន ដើម្បីបង្កើនភាពជឿជាក់លើអ្នក និងបង្ហាញដៃគូអ្នកថា អ្នកទាំងពីរអាចសហការគ្នាបាន ហើយដៃគូអ្នកមិនមែនរ៉ាប់រងតួនាទីនេះម្នាក់ឯងទេ ។
៣. បង្ហាញពីអារម្មណ៍របស់អ្នក
ប្រសិនបើការគ្រប់គ្រងហួសព្រំដែនរបស់ដៃគូអ្នក ធ្វើឲ្យអ្នកមិនពេញចិត្តខ្លាំង អ្នកគួរតែពន្យល់ប្រាប់ឲ្យបានច្បាស់លាស់ ។ វាអាចបង្កឲ្យមានជម្លោះក្នុងអាពាហ៍ពិពាហ៍របស់អ្នកពិតមែន ប៉ុន្តែវាជាវិធីមួយដែលធ្វើឲ្យពួកគេដឹងពីឥទ្ធិពលនៃទម្លាប់នេះ ។ យ៉ាងណាក្តី អ្នកមិនត្រូវចោទប្រកាន់ដល់ដៃគូអ្នកទាំងស្រុងទេ ។ អ្នកត្រូវប្រាប់គាត់ថា អ្នកដឹងថា គាត់មិនចង់គ្រប់គ្រងអ្នកទេ ប៉ុន្តែសកម្មភាពរបស់ដៃគូអ្នកកំពុងតែប៉ះពាល់អ្នកជាដើម ។
៤. ហៅភាគីទីបីមកចូលរួមការសន្ទនា
តើដៃគូរបស់អ្នកឆ្លើយតបនឹងអ្នកដូចម្តេច ? តើពួកគេដឹងខុស ឬទេ? ឬពួកគេមិនព្យាយាមយល់ពីអារម្មណ៍ និងមូលហេតុរបស់អ្នក ? ប្រសិនបើអ្នកបានព្យាយាមអស់ពីសមត្ថភាពហើយ អ្នកអាចសាកល្បងនិយាយជាមួយមនុស្សដែលមានឥទ្ធិពលលើដៃគូអ្នកបានដូចជា ឪពុកម្តាយ និងបងប្អូនរបស់ពួកគេជាដើម ដែលអាចពន្យល់ប្រាប់ពួកគេដោយស្ងប់អារម្មណ៍បាន ៕ កែសម្រួលដោយ ៖ សុឃាក់
ចែករំលែកព័តមាននេះ