ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា ជនជាតិចិន១៨នាក់ ក្នុងនោះមានចិនតៃវ៉ាន់១២នាក់ ត្រូវបានសមត្ថកិច្ចខេត្តកំពង់ស្ពឺ ប្រតិបត្តិការបង្ក្រាប និងឃាត់ខ្លួន នៅទីតាំងដីចំការស្វាយមួយកន្លែង ស្ថិតនៅក្នុងភូមិចា ឃុំស្វាយចចឹប ស្រុកបរសេដ្ឋ ខេត្តកំពង់ស្ពឺ ពាក់ព័ន្ធនឹងបទល្មើសឆបោកជំរិតទារប្រាក់តាមប្រព័ន្ធបច្ចេកវិទ្យា VOIP ។
នេះបើយោងតាមប្រភពព័ត៌មានរបស់ស្នងការនគរបាលខេត្តកំពង់ស្ពឺ ចុះថ្ងៃទី ២១ ខែកក្កដា ឆ្នាំ២០១៩ នេះ ។
ប្រភពព័ត៌មានដដែលបានបញ្ជាក់ថា ក្នុងប្រតិបត្តិការជាក់ស្តែងវេលាម៉ោង៩និង៣០នាទីព្រឹក នាថ្ងៃទី១៧ ខែកក្កដា ឆ្នាំ២០១៩ កងកម្លាំងនគរបាលនៃស្នងការដ្ឋាននគរបាលខេត្ដកំពង់ស្ពឺ ដឹកនាំដោយលោក ខៃ សម្ជស្ស ព្រះរាជអាជ្ញារង អយ្យការអមសាលាដំបូងខេត្តកំពង់ស្ពឺ និងមានការចូលរួមពីកម្លាំងនគរបាលជំនាញពាក់ព័ន្ធ បានចូលឆែកឆេរទីតាំងដីចំការស្វាយ (ឃ្លាំងប្រក់ស័ង្កសីទំហំ ៤០ គុណ ១០០ ម៉ែត្រ រកឃើញមនុស្ស ជនជាតិ ចិន ១៨នាក់ សញ្ជាតិ តៃវ៉ាន់ ១២នាក់ ។
សម្ភារៈឧបករណ៍បច្ចេកទេសគ្រឿងបំពាក់ Wifi កាមេរ៉ាសុវត្ថិភាពជុំវិញទីតាំង ម៉ាស៊ីនកុំព្យូទ័រ ០៦គ្រឿង ម៉ាស៊ីនភ្ជាប់ដុំ Wifi ៤គ្រឿង ទូរស័ព្ទចល័តដាក់លើតុខ្សែ ៣៣គ្រឿង ទូរស័ព្ទដៃប្រភេទចំរុះ ៣៣គ្រឿង អាយផេត ៤គ្រឿង ម៉ាស៊ីនសឺវឺ មួយឈុត
អង់តែនទាញសេវាទូរស័ព្ទ ឡាំងក្រដាសបិតស្នោរការពារសម្លេងរំខានដាក់លើតុ ចំនួន២០ ម៉ាស៊ីនភ្លើងកំលាំង 150LS ០២គ្រឿង ឯកសារភស្តុតាងភាសាចិន មានរូបថតជនជាតិចិន ឯកសារផ្ទេរប្រាក់តាមធនាគារ ឯកសារភស្ដុតាងរួមផ្សំមួយចំនួនជាច្រើនទៀត។
ដោយមានគោលការណ៍ពីសម្ដេចក្រឡាហោម និងថ្នាក់ដឹកនាំនៃអគ្គស្នងការនគរបាលជាតិ និងមានកិច្ចសហការពីនគរបាលចិន ជនជាតិចិនទាំង១៨នាក់ ត្រូវបានបញ្ជូនខ្លួនរួមជាមួយវត្ថុតាងពាក់ព័ន្ធបទល្មើសឆបោកជំរិតទារប្រាក់តាមប្រព័ន្ធបច្ចេកវិទ្យាVOIP ទៅអគ្គស្នងការដ្ឋាននគរបាលជាតិ ដើម្បីដំណើរការចាត់ការតាមនីតិវិធីបន្ដជាមួយភាគីនគរបាលនៃសាធារណរដ្ឋប្រជាមានិតចិន។
តាមការបញ្ជាក់ពីអោយដឹងពីឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ និងសមត្ថកិច្ចមូលដ្ឋានថា ដីចំការស្វាយគឺជាកម្មសិទ្ធិរបស់លោក ហេ ជីវ អេង មុខរបរជាមេធាវី បានជួលទៅអោយឈ្មោះរ័ត្ន ពិន្ទ (ជាតំណាងឈរឈ្មោះអោយបុគ្គលម្នាក់ទៀតមិនស្គាល់ឈ្មោះ)ក្នុងតម្លៃ ២២០០០ដុល្លារអាមេរិក។
បច្ចុប្បន្នជំនាញខេត្តស្នើសុំកិច្ចចង្អុលការក្នុងការដឹកនាំស្រាវជ្រាវរកអ្នកពាក់ព័ន្ធ និងករណីដែលផ្ដល់ទីតាំងអោយជនជាតិចិនប្រព្រឹត្ដបទល្មើសនៅចំណុចខាងលើ ធ្វើការផ្ដន្ទាទោសតាមច្បាប់ជាធរមាន៕ (កែសម្រួលដោយ ៖ បុប្ផា)
ចែករំលែកព័តមាននេះ