ខេត្តតាកែវ ៖ បើតាមសេចក្តីរាយការណ៍បឋមបានឱ្យដឹងថា រថយន្ត២គ្រឿងបើកបញ្ច្រាស់ទិសគ្នា រួចក៏រ៉េចង្កូតទៅបុកគ្នាចំពីមុខដូចរន្ទះធ្វើឱ្យមានអ្នករងរបួសធ្ងន់-ស្រាល៦នាក់ បង្កឱ្យមានការភ្ញាក់ផ្អើលកាលពីម៉ោង៦និង១៥នាទីព្រឹក ថ្ងៃ២១ ខែកក្កដា ឆ្នាំ២០១៩ តាមបណ្តោយផ្លូវជាតិលេខ៣ ចន្លោះបង្គោលគីទ្បូម៉ែត្រ៥៧-៥៨ ស្ថិតក្នុងភូមិត្រពាំងឃ្លោក ឃុំខ្វាវ ស្រុកសំរោង ខេត្តតាកែវ ។
បើតាមប៉ូលិសចរាចរណ៍ស្រុកសំរោង បានឱ្យដឹងថា រថយន្ត១គ្រឿង ម៉ាកហ៊ីយ៉ាន់ដាយកូរ៉េ ពណ៌ខៀវ ពាក់ស្លាកលេខ ភ្នំពេញ 2T-8166 បើកដោយឈ្មោះ ឃួន រ៉ាឌី ភេទប្រុស អាយុ៣៥ឆ្នាំ មានលំនៅភូមិព្រៃនប់ ឃុំស្នំក្រពើ ស្រុកគងពិសី ខេត្តកំពង់ស្ពឺ ធ្វើដំណើរពីជើងទៅត្បូង (អ្នកបើកបររងរបួសធ្ងន់) និងអ្នករួមដំណើរ ១-ឈ្មោះ ង៉ែត គឹមអូន ភេទស្រី ត្រូវជាប្រពន្ធអ្នកបើកបរ រស់នៅជាមួយគ្នា (របួសធ្ងន់) និង២.កូនស្រីឈ្មោះ ប៉ែឌី នីតា ភេទស្រី អាយុ៦ឆ្នាំ រងរបួសធ្ងន់។
ចំណែករថយន្តមួយគ្រឿងទៀត ម៉ាកសាំយ៉ុង ពណ៌សំបកឱទ្បឹក គ្មានស្លាកលេខ ក្រោយកើតហេតុអ្នកបើកបរបានបើកទ្វាររថយន្តចុះរត់គេចខ្លួនបាត់ បន្សល់ទុករថយន្តនៅនឹងកន្លែងកើតហេតុ និងអ្នករួមដំណើរ ១-ឈ្មោះ ហែម វុទ្ធី ភេទប្រុស អាយុ៤៦ឆ្នាំ រស់នៅឃុំពពេល ស្រុកត្រាំកក់ ខេត្តតាកែវ (របួសស្រាល)
ទី២-ឈ្មោះ ហាន ស្រីនាង ភេទស្រី អាយុ១៣ឆ្នាំ រស់នៅភូមិឃុំជាមួយ និងទី៣-ឈ្មោះ ស៊ន ហ៊ួយ ភេទស្រី អាយុ២៩ឆ្នាំ រស់នៅភូមិត្រពាំងឈូក ឃុំសំរោង ស្រុកតាំងកក់ ខេត្តតាកែវ។
ក្រោយពេលកើតហេតុ សមត្ថកិច្ចបានចុះវាស់វែង និងប្រញាប់ប្រញាល់បញ្ជូនជនរងគ្រោះមកកាន់មន្ទីពេទ្យបង្អែកខេត្តដើម្បីសង្គ្រោះ ចំណែកវត្ថុតាងរថយន្តទាំង២គ្រឿងត្រូវបានយកទៅរក្សាទុកនៅអធិការដ្ឋាននគរបាលស្រុកសំរោង រង់ចាំដោះស្រាយគ្នានៅពេលក្រោយ។ (កែសម្រួលដោយ ៖ បុប្ផា)
ចែករំលែកព័តមាននេះ