លោក Warren Buffett ដែលជាមហាសេដ្ឋីដ៏ល្បីឈ្មោះម្នាក់រកទ្រព្យសម្បត្តិតាមការវិនិយោគ ។ ប៉ុន្តែប្រសិនបើអ្នកសួរលោកថា តើការសម្រេចចិត្តដែលសំខាន់ជាងគេរបស់លោក គឺជាអ្វីនោះ ចម្លើយដែលអ្នកទទួលបានមិនទាក់ទិននឹងការវិនិយោគឡើយ ។
លោកបាននិយាយថា ការសម្រេចចិត្តធំជាងគេក្នុងជីវិតរបស់អ្នក គឺការសម្រេចចិត្តជ្រើសដៃគូជីវិតរបស់អ្នក ។ លោកបាននិយាយថា លោកបានជួបរឿងដែលផ្លាស់ប្តូរជីវិតរបស់លោក២ដង ទីមួយ គឺពេលដែលលោកបានចាប់កំណើត និងទីពីរ គឺពេលដែលលោកបានជួបនឹងភរិយារបស់លោក គឺអ្នកស្រី Susie ដែលបានទទួលមរណភាពនៅឆ្នាំ២០០៤ ។ លោកបានបន្តថា «រាល់អ្វីដែលដែលកើតឡើងក្នុងជីវិតរបស់ខ្ញុំប្រហែលជាមិនអាចកើតមានឡើងទេ ប្រសិនបើមិនមានគាត់។»
ក្នុងកិច្ចសន្ទនាមួយជាមួយនឹងលោក Bill Gates កាលពីឆ្នាំ២០១៧ លោកក៏បានលើកឡើងថា មនុស្សដែលសំខាន់ គឺដៃគូជីវិតរបស់អ្នក ។ ក្នុងកិច្ចប្រជុំប្រចាំឆ្នាំរបស់ក្រុមហ៊ុន Berkshire Hathaway របស់លោកកាលពីឆ្នាំ ២០០៩ លោកក៏បាននិយាយដែរថា រៀបអាពាហ៍ពិពាហ៍ជាមួយនឹងមនុស្សដែលត្រឹមត្រូវនឹងធ្វើឲ្យជីវិតរបស់អ្នកផ្លាស់ប្តូរជាក់ជាមិនខាន ។
យោងទៅតាមការសិក្សាមួយរបស់អ្នកជំនាញចិត្តវិទ្យានៅសាកលវិទ្យាល័យ Carnegie Mellon University យល់ស្របនឹងគំនិតនេះ ដោយរកឃើញថា មនុស្សដែលមានស្វាមីភរិយាដែលតែងតែគាំទ្រដល់ពួកគេមានឱកាសច្រើនជាងអ្នកដទៃក្នុងការជោគជ័យពេលដែលធ្វើអ្វីមួយ ។ Brooke Feeney ដែលជាប្រធានអ្នកស្រាវជ្រាវក្នុងការសិក្សាខាងលើបានឲ្យដឹងថា «ដៃគូជីវិតអាចជួយឲ្យអ្នកជោគជ័យតាមរយៈការចាប់យកឱកាស ។ ឬពួកគេអាចបង្កការប៉ះពាល់ដល់ឱកាសក្នុងការជោគជ័យរបស់អ្នកបានដោយធ្វើឲ្យអ្នកមិនចង់ចាប់យកឱកាសក្នុងការលូតលាស់» ៕ កែសម្រួលដោយ ៖ សុឃាក់
ចែករំលែកព័តមាននេះ