រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្រី្ត រដ្ឋមន្ត្រីក្រសួងមហាផ្ទៃបានអំពាវនាវដល់ភាគីពាក់ព័ន្ធរាយការណ៍អំពីវត្តមានជនបរទេសរស់នៅកម្ពុជា ដើម្បីងាយស្រួលគ្រប់គ្រង ។ យោងតាមសេចក្តីណែនាំរបស់ក្រសួងមាហាផ្ទៃចេញផ្សាយ កាលពីថ្ងៃទី១៩ កក្កដា បានឲ្យដឹងថា កន្លងមកនេះក្រសួងមហាផ្ទៃបានចេញសេចក្តីណែនាំលេខ០០៩សណន ចុះថ្ងៃទី២៥ ខែមីនា ឆ្នាំ២០១០ ស្តីពីការគ្រប់គ្រងវត្តមានជនបរទេស ក្នុងព្រះរាជាណាចក្រកម្ពុជា ក្នុងគោលបំណងអនុវត្តមាត្រា១៨ មាត្រា២០ និងមាត្រា២២ នៃច្បាប់ស្តីពីអន្តោប្រវេសន៍ឱ្យមានប្រសិទ្ធភាព ។
ប្រភពបានបន្តថា ក្រោយចេញសេចក្តីណែនាំខាងលើរួចមកក្រសួងមហាផ្ទៃ បានពិនិត្យឃើញថា មានម្ចាស់ ឬអ្នកកាន់កាប់លំនៅដ្ឋានគ្រប់ប្រភេទជាច្រើន បានអនុវត្តតាមសេចក្តីណែនាំដោយស្មារតីភ្ញាក់រលឹករួសរាន់ និងការទទួលខុសត្រូវខ្ពស់ ប៉ុន្តែនៅមានម្ចាស់ ឬអ្នកកាន់កាប់លំនៅដ្ឋានមួយចំនួនពុំទាន់យល់អំពីកាតព្វកិច្ច និងអនុវត្តត្រឹមត្រូវតាមការកំណត់នៃច្បាប់ និងលិខិតបទដ្ឋានគតិយុត្តិនៅឡើយ ។ សម្តេចបានបញ្ជាក់ថា ដើម្បីពង្រឹងការអនុវត្តច្បាប់ស្តីពីអន្តោប្រវេសន៍សំដៅបង្កើនការគ្រប់គ្រងវត្តមាននៃការស្នាក់នៅរបស់ជនបរទេសឱ្យមានប្រសិទ្ធភាពខ្ពស់ ធានាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមក៏ដូចជា សុវត្ថិភាពផ្ទាល់របស់ជនបរទេសគ្រប់រូបដែលស្នាក់នៅក្នុងព្រះរាជាណាចក្រកម្ពុជា ក្រសួងមហាផ្ទៃ សូមធ្វើការណែនាំដូចខាងក្រោម ៖ ១- ម្ចាស់ ឬអ្នកកាន់កាប់លំនៅដ្ឋានគ្រប់ប្រភេទត្រូវរាយការណ៍អំពីវត្តមានជនបរទេសដែលបានចូលមកស្នាក់នៅក្នុងទីតាំងរបស់ខ្លួន ដល់ប៉ុស្តិ៍នគរបាលរដ្ឋបាលឃុំ-សង្កាត់នៅក្នុងមូលដ្ឋាននោះ តាមរយៈគំរូរបាយការណ៍ ឬប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងវត្តមានជនបរទេស ដែលរៀបចំដោយអគ្គនាយកដ្ឋាន អន្តោប្រវេសន៍ មិនឱ្យលើសពីរយៈពេល២៤ម៉ោង ។
ក្នុងករណីម្ចាស់ ឬអ្នកកាន់កាប់លំនៅដ្ឋានគ្រប់ប្រភេទជាជនបរទេសត្រូវរាយការណ៍បន្ថែមអំពីវត្តមានរបស់ខ្លួនឯង និងសមាជិកដែលជាជនបរទេសក្នុងបន្ទុក ក្នុងរយៈពេលមិនលើសពី២៤ម៉ោងដូចគ្នា ។ ២-ខ្លឹមសារនៃសេចក្តីរាយការណ៍ ត្រូវបញ្ជាក់ច្បាស់អំពីរយៈពេលស្នាក់នៅរយៈពេលបន្តការស្នាក់នៅ និងឧប្បទ្ទវហេតុនានាលើជនបរទេស ដើម្បីកម្លាំងសមត្ថកិច្ចមានវិធានការសមស្របទាន់ពេលវេលា ។ ៣-ចំពោះម្ចាស់ ឬអ្នកកាន់កាប់លំនៅដ្ឋានណាដែលមិនបានរាយការណ៍ពីវត្តមាននៃការស្នាក់នៅរបស់ជនបរទេសតាមការកំណត់នៃច្បាប់ និងបទដ្ឋានគតិយុត្តនានានឹងត្រូវផ្តន្ទាទោសតាមបទប្បញ្ញតិដែលមានចែងក្នុងច្បាប់ស្តីពីអន្តោប្រវេសន៍ និងច្បាប់ផ្សេងៗទៀតនៃព្រះរាជាណាចក្រកម្ពុជា ។
៤-ស្នងការដ្ឋាននគរបាលរាជធានី-ខេត្ត ត្រូវផ្តល់គំរូរបាយការណ៍ និងពាក្យស្នើសុំបង្កើតគណនីប្រើប្រាស់ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងវត្តមានជនបរទេសដែលរៀបចំដោយអគ្គនាយកដ្ឋានអន្តោប្រវេសន៍ដល់ម្ចាស់ ឬអ្នកកាន់កាប់លំនៅដ្ឋានគ្រប់ប្រភេទ ដើម្បីធ្វើសេចក្តីរាយការណ៍ប្រចាំថ្ងៃ និងត្រូវបូកសរុបរបាយការណ៍ផ្ញើមកអគ្គនាយកដ្ឋានអន្តោប្រវេសន៍ ។ ៥-ស្នងការដ្ឋាននគរបាលរាជធានី-ខេត្ត ត្រូវរាយការណ៍មកក្រសួងមហាផ្ទៃតាមរយៈអគ្គនាយកដ្ឋានអន្តោប្រវេសន៍ អំពីមរណៈភាព ការបាត់ខ្លួន និងឧប្បទ្ទវហេតុនានារបស់ជនបរទេស និងត្រូវទទួលខុសត្រូវក្នុងការត្រួតពិនិត្យជនបរទេសអន្តោប្រវេសន៍ ដែលបានមកតាំងទីលំនៅ ឬទើបមកតាំងទីលំនៅក្នុងដែនដីក្រោម សមត្ថកិច្ចរបស់ខ្លួន ។ ៦-អគ្គនាយកដ្ឋានអន្តោប្រវេសន៍ត្រូវរៀបចំផែនការអនុវត្ត និងផ្សព្វផ្សាយណែនាំដល់ម្ចាស់ ឬអ្នកកាន់កាប់លំនៅដ្ឋានគ្រប់ប្រភេទស្នងការដ្ឋាននគរបាលរាជធានី-ខេត្ត សមត្ថកិច្ចពាក់ព័ន្ធ និងសាធារណៈជន និងចាត់តាំងមន្ត្រីជំនាញចុះត្រួតពិនិត្យការអនុវត្តសេចក្តីណែនាំនេះព្រមទាំងធ្វើការបូកសរុបវាយតម្លៃរាយការណ៍ជូនក្រសួងមហាផ្ទៃ ដើម្បីមានគោលការណ៍ដឹកនាំ ។ ៧-ក្រសួងមហាផ្ទៃ សូមអំពាវនាវដល់សាធារណៈជន មន្ត្រីរាជការគ្រប់លំដាប់ថ្នាក់ កងកម្លាំងមានសមត្ថកិច្ចគ្រប់ប្រភេទត្រូវចូលរួមចំណែកផ្តល់ព័ត៌មាន និងរាយការណ៍ដល់សមត្ថកិច្ចពាក់ព័ន្ធអំពីវត្តមានជនបរទេសដែលស្នាក់នៅក្នុងមូលដ្ឋានរបស់ខ្លួន ។
ជាមួយគ្នានោះដែរសម្តេចក៏បានលើកក្នុងសេចក្តីណែនាំបន្ថែមថា នៅពេលទទួលបានសេចក្តីណែនាំនេះអគ្គលេខាធិការនៃអគ្គលេខាធិការដ្ឋាន អគ្គស្នងការនៃអគ្គស្នងការដ្ឋាននគរបាលជាតិ អគ្គនាយកនៃអគ្គនាយកដ្ឋានអន្តោប្រវេសន៍ អគ្គនាយកនៃអគ្គនាយកដ្ឋានរដ្ឋបាល អគ្គនាយកនៃអគ្គនាយកដ្ឋានអត្តសញ្ញាណកម្ម អភិបាលនៃគណៈអភិបាលរាជធានី-ខេត្ត និងអង្គភាពពាក់ព័ន្ធក្រោមឱវាទក្រសួងមហាផ្ទៃ ត្រូវផ្សព្វផ្សាយ និងចាត់តាំងអនុវត្តឲ្យមានប្រសិទ្ធភាពខ្ពស់ ៕ កែសម្រួលដោយ ៖ សុឃាក់
ចែករំលែកព័តមាននេះ