រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ស្ត្រីម្នាក់កំពុងជិះកង់ធ្វើដំណើរតែម្នាក់ឯង ស្រាប់តែត្រូវរថយន្តលាយបេតុងមួយគ្រឿងបើកកៀរ បណ្ដាលឲ្យដួលរួចកិនស្ត្រីរងគ្រោះចំពាក់កណ្ដាលខ្លួនបែកពោះ ដាច់ពោះវៀនស្លាប់ភ្លាមៗមួយរំពេច ស្របពេលនោះដែរក៏មានរថយន្តមួយគ្រឿងផ្សេងទៀតម៉ាកស្តារិចទៅពីក្រោយកិនស្ត្រីរងគ្រោះថែម១តង់ទៀតផងដែរ ក្រោយពេលកើតហេតុអ្នកបើកបររថយន្តទាំង២នាក់បានរត់គេចខ្លួនបាត់ស្រមោល បន្សល់ទុកតែរថយន្ត២គ្រឿងនៅកន្លែងកើតហេតុ។
គ្រោះថ្នាក់ចរាចរណ៍គួរឱ្យរន្ធត់ខាងលើនេះបានកើតឡើងកាលពីវេលាម៉ោង៩ព្រឹកថ្ងៃទី១៩ ខែកក្កដា ឆ្នាំ២០១៩ នៅលើកណាត់មហាវិថីសហព័ន្ធរុស្សុី ត្រង់ចំណុចភ្លើងស្តុបកែងផ្លូវ លេខ២០០៤ ស្ថិតនៅក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះម្នាក់ដែលស្លាប់ខាងលើ មិនស្គាល់អត្តសញ្ញាណនោះទេ មានអាយុប្រហែលជាង៥០ឆ្នាំ គាត់ជិះកង់១គ្រឿង។
ចំណែករថយន្តទាំង២គ្រឿងខាងលើ ក្នុងនោះរថយន្តមួយគ្រឿងជាប្រភេទលាយបេតុង ពណ៌ស ពាក់ស្លាកលេខ ភ្នំពេញ ៥A-២៣៨៦ បើកបរដោយបុរសម្នាក់ បានរត់គេចខ្លួនបាត់ស្រមោល និងរថយន្តមួយគ្រឿងទៀតម៉ាកស្តារិច ពណ៌ទឹកប្រាក់ ពាក់ស្លាកលេខលេខ ភ្នំពេញ ២AM-៦២៣៤ បើកបរដោយជនជាតិចិនម្នាក់ មិនស្គាល់អត្តសញ្ញាណ បានរត់គេចខ្លួនបាត់ស្រមោល ។
តាមប្រភពព័ត៌មានបានឲ្យដឹងថា នៅមុនពេលកើតហតុ ស្ត្រីរងគ្រោះបានជិះកង់១គ្រឿងធ្វើដំណើរក្នុងទិសដៅពីកើតទៅលិច ចេញពីទិញម្ហូបនៅផ្សារសុិនជូរីផ្លាហ្សា លុះពេលទៅដល់ត្រង់ចំណុចកើតហេតុ ស្រាប់តែមានរថយន្តលាយបេតុង១គ្រឿង បើកបរក្នុងទិសដៅពីត្បូងទៅជើងមកដល់បានកៀរកង់ស្ត្រីរងគ្រោះ បណ្ដាលឲ្យដួល រួចកិនស្ត្រីរងគ្រោះចំពាក់កណ្ដាលខ្លួនបែកពោះដាច់ពោះវៀនជាកង់ៗស្លាប់ភ្លាមៗនៅនឹងកន្លែង ។ បន្ទាប់មកស្រាប់តែមានរថយន្តម៉ាកស្តារិចមួយគ្រឿងទៀត បើកបរដោយជនជាតិចិនម្នាក់ បានមកដល់ ហើយមើលមិនទាន់ក៏ជ្រុលកិនសពស្ត្រីរងគ្រោះបន្ថែម១តង់ទៀត បន្ទាប់មកអ្នកបើកបររថយន្តទាំង២គ្រឿងបានចុះរត់គេចខ្លួនបាត់ស្រមោលតែម្ដង។
ក្រោយពេលកើតហេតុ នគរបាលចរាចរណ៍ខណ្ឌពោធិ៍សែនជ័យបានចុះទៅអន្តរាគមន៏សម្រួលមិនឲ្យមានការកកស្ទះ រួចហើយបានរាយការណ៍ជូនទៅខាងការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីចុះទៅធ្វើការវាស់វែង និងនាំយករថយន្តទាំង២គ្រឿង ព្រមទាំងកង់របស់ស្ត្រីរងគ្រោះទៅរក្សាទុក ដើម្បីរង់ចាំការដោះស្រាយតាមច្បាប់នៅពេលក្រោយ ព្រមទាំងធ្វើការស្រាវជ្រាវរកសាច់ញាតិរបស់ស្ត្រីរងគ្រោះផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ