ខេត្តឧត្តរមានជ័យ ៖ សេចក្តីរាយការណ៍បឋម មនុស្ស៣នាក់រងរបួសធ្ងន់ ខណៈបើកបររថយន្តក្នុងល្បឿនលឿនចុះពីលើកំពូលភ្នំដងរ៉ែក រ៉េចង្កូតធ្លាក់ពីលើផ្លូវជាតិទៅខាងស្តាំដៃក្រឡាប់ជាច្រើនត្រឡប់ កាលពីថ្ងៃទី១៨ កក្កដា ២០១៩ ដែលហេតុការណ៍នេះកើតឡើងនៅចំណុចចង្កេះភ្នំ តាមបណ្តោយផ្លូវជាតិលេខ៦៧B ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
សេចក្តីរាយការណ៍ជនរងគ្រោះនៅក្នុងហេតុការគ្រោះថ្នាក់ចរាចរណ៍មាន១-ឈ្មោះឈួន អូរភេទប្រុស អាយុ២៣ឆ្នាំ ជាអ្នកបើកបររថយន្តម៉ាកត្រៃណូ ពណ៌លឿង ពាក់ស្លាកលេខ៥A-០៨.២៩ រងរបួសធ្ងន់ ២-ឈ្មោះ កែង ផ្លូវ ភេទប្រុស អាយុ៤០ឆ្នាំ រងរបួសធ្ងន់ និងម្នាក់ទៀតឈ្មោះ លិញ ម៉ៅ ភេទប្រុស អាយុ១៨ឆ្នាំ រងរបួសធ្ងន់ជាអ្នករួមដំណើរ ត្រូវបាននាំយកមកធ្វើការសង្គ្រោះនៅក្នុងមន្ទីរពេទ្យបង្អែកស្រុកអន្លង់វែងទាំង៣នាក់នេះរស់នៅក្នុងភូមិសាវាំង ឃុំស្វាយជ្រុំ ស្រុកមេសាង ខេត្តព្រៃវែង ។
ប៉ូលិសផ្នែកចរាចរណ៍ស្រុកអន្លង់វែងបានឱ្យដឹងថា មុនពេលកើតហេតុរថយន្តមួយគ្រឿងនេះបានបើកបរចេញពីមាត់ច្រកទ្វារអន្តរជាតិជាំ លុះបើកបរមកដល់ចង្កេះភ្នំដងរ៉ែករថយន្តបានដាច់ហ្វាំងជាន់មិនជាប់ក៏បោលចុះយ៉ាងលឿន ហើយបានរ៉េចង្កូតទៅបុករនាំងផ្លូវផ្លោងទៅម្ខាងរនាំងផ្លូវក្រឡាប់ជាច្រើនត្រឡប់ បណ្តាលឱ្យមនុស្ស៣នាក់រងរបួសធ្ងន់ ចំណែករថយន្តខូចខាតទាំងស្រុង ។
គួរំលឹកថា ផ្លូវជាតិលេខ៦៧B ត្រង់ចំណុចចង្កេះភ្នំដងរ៉ែក ដែលមានរូបចម្លាក់យោធាស្ពាយកាំភ្លើង និងរូបនារីទូលជម្រោងនេះ ជាទីតាំងចំណុចគ្រោះថ្នាក់ជាញឹកញាប់ផងដែរកន្លងមកនេះ ៕ កែសម្រួលដោយ ៖ សុឃាក់
ចែករំលែកព័តមាននេះ