រាជធានីភ្នំពេញ ៖ សេចក្តីរាយការណ៍បឋម យ៉ាងហោចណាស់ មានបុរស២នាក់បានស្លាប់នៅកន្លែងគៀបជាប់ក្នុងរថយន្ត និង៦នាក់ទៀតបានរងរបួសធ្ងន់ និងស្រាលនៅក្នុងហេតុការណ៍គ្រោះថ្នាក់ដ៏រន្ធត់រវាងរថយន្តដឹកអុសមួយគ្រឿងបានបើកបោះពួកបុករថយន្តកូរ៉េ ខ្លះថា គោយន្តកែច្នៃចំកណ្តាលរថយន្ត ហើយរ៉េចង្កូតទៅបុកដើមអំពិលទឹកបារាំងមួយដើមធំពេញទំហឹង…
រាជធានីភ្នំពេញ ៖ សេចក្តីរាយការណ៍បឋម យ៉ាងហោចណាស់ មានបុរស២នាក់បានស្លាប់នៅកន្លែងគៀបជាប់ក្នុងរថយន្ត និង៦នាក់ទៀតបានរងរបួសធ្ងន់ និងស្រាលនៅក្នុងហេតុការណ៍គ្រោះថ្នាក់ដ៏រន្ធត់រវាងរថយន្តដឹកអុសមួយគ្រឿងបានបើកបោះពួកបុករថយន្តកូរ៉េ ខ្លះថា គោយន្តកែច្នៃចំកណ្តាលរថយន្ត ហើយរ៉េចង្កូតទៅបុកដើមអំពិលទឹកបារាំងមួយដើមធំពេញទំហឹង ។
សេចក្តីរាយការណ៍បានបន្តថា គ្រោះថ្នាក់ចរាចរណ៍ដ៏រន្ធត់នោះបានកើតឡើងកាលពីវេលាម៉ោងប្រមាណ១២និង១៥នាទីថ្ងៃត្រង់ ទី១៨ ខែកក្កដានេះ នៅតាមមហាវិថីឈ្នះឈ្នះ ក្នុងភូមិព្រែកតាសេក សង្កាត់ព្រែកតាសេក ខណ្ឌជ្រោយចង្វារ ។ រថយន្តដែលបង្កគ្រោះថ្នាក់ម៉ាកFUSO ពាក់ស្លាកលេខ តាកែវ ៣A-១១១០ ជារថយន្តដឹកអុសរបស់ក្រុមហ៊ុន L.M,H ដឹកជញ្ជូន អ្នកបើកបរដោយបុរសម្នាក់បានរត់គេចខ្លួនបាត់ ។ ចំណែករថយន្តមួយគ្រឿងទៀតម៉ាកទីតាន់ពណ៌ខៀវ ពាក់ស្លាកលេខ ង.៩២៦៩ភព២ អ្នកបើកបរស្លាប់នៅក្រោយកង់រថយន្ត និងស្ត្រីជាប្រពន្ធ និងកូនតូចបានរងរបួស ។
តាមនគរបាលបានអោយដឹងថា នៅក្នុងហេតុការណ៍គ្រោះថ្នាក់បណ្តាលអោយមនុស្សស្លាប់២នាក់ និងរបួសធ្ងន់ស្រាល៦នាក់ ដែលក្នុងនោះរថយន្តដឹកអុសស្លាប់ព្រូម្នាក់ កៀបជាប់ក្នុងរថយន្ត និងរបួស៤នាក់ ។ រីឯរថយន្តតូចស្លាប់អ្នកបើកបរម្នាក់ និងរបួស២នាក់ ក្នុងនោះមានក្មេងតូចម្នាក់ ។ ដោយឡែករថយន្តរងការខូចខាតធ្ងន់ធ្ងរ ។
ជនរងគ្រោះដែលបានស្លាប់១- ឈ្មោះណាវី សុធី ប្រមាណ៤០ឆ្នាំ ជាអ្នកបើកបររថយន្តដឹកទំនិញ មានលំនៅភូមិតានន ឃុំត្នោត ស្រុកបាទី ខេត្តតាកែវ បានស្លាប់នៅក្រោមកង់រថយន្តនិង២- ឈ្មោះ ម៉ាត់ តុញ អាយុប្រមាណ៣២ឆ្នាំ ជាព្រូរថយន្ត មានលំនៅភូមិទួលបេង ឃុំក្រឡា ស្រុកកំពង់សៀម ខេត្តកំពង់ចាម បានកៀបជាប់ស្លាប់ក្នុងរថយន្តដឹកអុស ។ ចំណែកអ្នករងរបួសពុំត្រូវបានស្គាល់ឈ្មោះនៅឡើយ ។
តាមសាក្សីបានអោយដឹងថា នៅមុនពេលកើតហេតុគេឃើញរថយន្តទាំងពីគ្រឿង បើកស្របទិសដៅគ្នាក្នុងទិសដៅពីកើតទៅលិច ដោយរថយន្តតូចដឹកមុខ ។ ខណៈពេលធ្វើដំណើរមកដល់កន្លែងកើតហេតុ មិនដឹងមូលហេតុអ្វីនោះ ស្រាប់តែរថយន្តកូរ៉េដឹកទំនិញក៏បានរ៉េចង្កូតឡើងកង់ម្ខាងទៅលើសួនច្បារ ខណ្ឌចែកផ្លូវ ប្រមាណ២០ម៉ែត្រ ក៏បានចុះមកវិញមកទទឹងផ្លូវ ក៏ត្រូវបានរថយន្តដឹកអុសដែលបើកបរក្នុងល្បឿនលឿនបុកចំកណ្តាលរថយន្តពេញទំហឹងតែម្តង ។
តាមសាក្សីបានអោយដឹងទៀតថា បន្ទាប់ពីពេញទំហឹងរហូតដឹកអុសបានរ៉េចង្កូតទៅស្តាំដៃបុកដើមអំពិលទឹកបារាំងមួយដើមធំ បណ្តាលអោយស្រុញជាប់ ហើយព្រូឡានម្នាក់កៀបជាប់ស្លាប់ក្នុងរថយន្ត និងម្នាក់ទៀតកៀបជាប់ដៃត្រូវបានសង្គ្រោះ ។ នៅក្នុងរថយន្តដឹកអុសមានព្រូនិងកម្មករជិះ៦នាក់ បានស្លាប់ម្នាក់ របួស៤នាក់ តាកុងបានរត់គេចខ្លួនបាត់ ។ ចំណែករថយន្តតូចបានដាច់ជាពីកំណាត់អ្នកបើកបរស្លាប់ក្រោមកង់រថយន្ត ឯស្ត្រីជាប្រពន្ធរួមដំណើរបានរងរបួសធ្ងន់ និងកូនប្រុសតូចបានរងរបួសស្រាល ។
តាមព័ត៌មានអោយដឹងទៀតថា បន្ទាប់ពីគ្រោះថ្នាក់នគរបាលការិយាល័យបង្ការពន្លត់អគ្គិភ័យ និងសង្គ្រោះបានយកឧបករណ៍កន្ត្រៃកាត់ដែកទៅសហការណ៍ជាមួយនគរបាលមូលដ្ឋាន និងនិងនគរបាលការិយាល័យចរចរណ៍ផ្លូវគោកព្រមទាំងយករថយន្តទៅស្ទួច ដើម្បីកាត់គាស់ ដើម្បីយកសពចេញ ។ សពត្រូវបាននគរបាលប្រគល់អោយក្រុមគ្រួសារនាំយកទៅធ្វើបុណ្យតាមប្រពៃណី ចំណែករថយន្តទាំង២ ត្រូវបាននគរបាលនាំយកទៅរក្សាទុកនៅការិយាល័យ ចរាចរណ៍ដើម្បីដោះស្រាយ ៕ កែសម្រួលដោយ ៖ សុឃាក់
ចែករំលែកព័តមាននេះ