ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា ប្រជាពលរដ្ឋបានប្រទះឃើញគ្រាប់មិនទាន់ផ្ទុះបន្សល់ពីសង្គ្រាមសរុប១១គ្រាប់កប់ក្នុងដីចំការនៅទីតាំង៣កន្លែងផ្សេងគ្នា នាតំបន់អតីតសមរភូមិ ក្នុងស្រុកស្វាយចេក ខេត្តបន្ទាយមានជ័យ ត្រូវបានកម្លាំងនគរបាលមូលដ្ឋានចុះទៅប្រមូលយក ដើម្បីរក្សាទុករង់ចាំប្រគល់ឱ្យមន្ត្រីស៊ីម៉ាក ឬហេឡូត្រាក់យកទៅបំផ្លាញចោលបញ្ចៀសការគ្រោះថ្នាក់អាយុជីវិតប្រជាពលរដ្ឋជាយថាហេតុអាក្រក់ណាមួយកើតឡើង ។
យោងតាមរបាយការណ៍បានបង្ហាញឱ្យដឹងថា កម្ពុជាក្នុងរយៈពេល៦ខែ ដើមឆ្នាំ២០១៩ ជនរងគ្រោះដោយសារគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះបន្សល់ពីសង្គ្រាមមានចំនួន៦១នាក់ដែលចំនួននោះមានការកើនឡើង៣០នាក់ បើប្រៀបធៀបនឹងរយៈពេលដូចគ្នា ក្នុងឆ្នាំ២០១៨ដែលមានជនរងគ្រោះចំនួនតែ៣១នាក់ប៉ុណ្ណោះ ។ ការប្រទះឃើញគ្រាប់មីន និងគ្រាប់មិនទាន់ផ្ទុះនៅក្នុងស្រុកស្វាយចេក ខេត្តបន្ទាយមានជ័យ នៅព្រឹកថ្ងៃទី១៨ ខែកក្កដា ឆ្នាំ២០១៩នៅចំណុចដីចំការដំឡូងមីមួយកន្លែង ក្នុងភូមិពន្សាយជើង ឃុំស្វាយចេក និងចំណុចដីចំការមួយកន្លែងទៀត នៅភូមិអូរវែងជើង នៅភូមិតាអុងលិច ឃុំស្វាយចេក ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេកប្រាប់ថា គ្រាប់មីន និងគ្រាប់មិនទាន់ផ្ទុះ១០គ្រាប់ខាងលើ គឺគ្រាប់មីនស្គរប្រឆាំង និងមនុស្សមាន៩គ្រាប់ និងគ្រាប់កាំភ្លើងត្បាល់១គ្រាប់ ប្រភេទ១៣០មីលីម៉ែត្រ ។ ការប្រទះឃើញគ្រាប់ទាំងនោះមានប្រជាពលរដ្ឋ៣នាក់ ទៅធ្វើដីចំការដំឡូងមី និងធ្វើស្រែប្រទះឃើញ ខណៈដែលមានការដកស្មៅដំឡូងមី និងភ្ជួររាស់ដី ។ លោកអធិការបញ្ជាក់ទៀតថា គ្រាប់ទាំងនោះបានយកមករក្សាទុកកន្លែងសុវត្ថិភាពនោះហើយ ដើម្បីរង់ចាំប្រគល់ឱ្យមន្ត្រីជំនាញស៊ីម៉ាកយកទៅកម្ទេចចោល ។
សូមរំលឹកថា នៅខេត្តបន្ទាយមានជ័យនេះផងដែរ កាលពីថ្ងៃទី៨ ខែកក្កដា កន្លងទៅនេះបានប្រគល់គ្រាប់យុទ្ធភ័ណ្ឌមិនទាន់ផ្ទុះជាប្រភេទគ្រាប់ប្រឆាំង និងយន្តហោះ និងគ្រាប់ប្រឆាំង និងមនុស្សចំនួន៤១៤គ្រាប់ ទៅឱ្យមន្ត្រីជំនាញដោះមីនហេឡូត្រាក់ ដើម្បីយកទៅរក្សាទុកនៅកន្លែងសុវត្ថិភាព ។ ក្រោយប្រជាពលរដ្ឋនៅស្រុកភ្នំស្រុកបានប្រទះឃើញគ្រាប់ទាំងនោះកប់ក្នុងដីចំការមួយកន្លែង ដែលជាអតីតបន្ទាយកងទ័ព ក្នុងតំបន់អតីតសមរភូមិសង្គ្រាម ក្នុងភូមិត្រពាំងថ្មខាងជើង ឃុំប៉ោយចារ ស្រុកភ្នំស្រុក ។
សូមបញ្ជាក់ថា កម្ពុជាទោះបីបញ្ចប់សង្គ្រាមទាំងស្រុងនោះក៏ពិតមែន ប៉ុន្តែគ្រាប់មីន និងកាកសំណល់ពីសង្គ្រាមនៅតែមានកប់រាយប៉ាយនៅក្នុង និលើដីក្នុងតំបន់ដែលមិនទាន់ធ្វើការបោសសំអាតរួចរាល់ ដែលជាបញ្ហាប្រឈមបង្កគ្រោះថ្នាក់ដល់អាយុជីវិតប្រជាពលរដ្ឋ ។ ជុំវិញបញ្ហានេះកម្ពុជានៅមានផ្ទៃដីរងនូវការគម្រាមពីមីន និងគ្រាប់មិនទាន់ផ្ទុះប្រមាណ២ពាន់១៤៨គីឡូម៉ែត្រក្រឡា ។ រាជរដ្ឋាភិបាលបានកំណត់យកឆ្នាំ២០២៥ ជាឆ្នាំដែលធ្វើអោយកម្ពុជាអស់ការគម្រាមកំហែងដោយសារមីន និងគ្រាប់យុទ្ធភ័ណ្ឌមិនទាន់ផ្ទុះទាំងនោះ ៕ កែសម្រួលដោយ ៖ សុឃាក់
ចែករំលែកព័តមាននេះ