ខេត្តពោធិ៍សាត់ ៖ តាមសេចក្តីរាយការណ៍បឋមបានឱ្យដឹងថា បុរសជាព្រូម្នាក់ត្រូវរថយន្ដបុកខ្ទេចមួយកំណាត់ខ្លួន បណ្ដាលឲ្យស្លាប់ភ្លាមៗនៅនឹងកន្លែងកើតហេតុ ខណៈពេលជនរងគ្រោះកំពុងជួសជុលរថយន្តមួយគ្រឿងដែលខូចចតតាមផ្លូវ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១៩៩ ២០០ ស្ថិតក្នុងភូមិក្ដីឈ្នួល…
ខេត្តពោធិ៍សាត់ ៖ តាមសេចក្តីរាយការណ៍បឋមបានឱ្យដឹងថា បុរសជាព្រូម្នាក់ត្រូវរថយន្ដបុកខ្ទេចមួយកំណាត់ខ្លួន បណ្ដាលឲ្យស្លាប់ភ្លាមៗនៅនឹងកន្លែងកើតហេតុ ខណៈពេលជនរងគ្រោះកំពុងជួសជុលរថយន្តមួយគ្រឿងដែលខូចចតតាមផ្លូវ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១៩៩ ២០០ ស្ថិតក្នុងភូមិក្ដីឈ្នួល ឃុំត្រពាំងជង ស្រុកបាកាន ខេត្តពោធិ៍សាត់ កាលពីវេលាម៉ោង១១និង៤៥នាទីយប់ថ្ងៃទី១៧ ខែកក្កដាឆ្នាំ២០១៩ ។
ភាគីខាងរថយន្ដមួយគ្រឿងដែលខូចតាមផ្លូវ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ ៣D-២២៥៣ បើកបរដោយបុរសម្នាក់ មិនស្គាល់អត្តសញ្ញាណ បានរត់គេចខ្លួនបាត់ និងអ្នករួមដំណើរម្នាក់ជាព្រូឈ្មោះ ថម ផល ភេទប្រុស អាយុ៣៥ឆ្នាំ រស់នៅក្នុងភូមិឃុំកើតហេតុខាងលើ បានស្លាប់នៅនឹងកន្លែងកើតហេតុ ។ ចំណែកភាគីខាងរថយន្ដមួយគ្រឿងទៀតម៉ាកហ៊ីយ៉ាន់ដាយ ពណ៌ស គ្មានស្លាកលេខ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពពីសមត្ថកិច្ចបានឲ្យដឹងថា មុនកើតហេតុ មានរថយន្ដមួយគ្រឿងម៉ាកហ៊ីយ៉ាន់ដាយ ពណ៌ខៀវ ធ្វើដំណើរក្នុងទិសដៅពីលិចទៅកើត លុះមកដល់ចំណុចកើតហេតុខាងលើ រថយន្ដនោះក៏ខូចហើយចតតាមផ្លូវដើម្បីជួសជុល ។
តាមប្រភពដដែលបានបន្តថា ស្របពេលបុរសរងគ្រោះជាព្រូកំពុងជួសជុលរថយន្តទាំងកណ្ដាលយប់ ស្រាប់តែមានរថយន្ដមួយគ្រឿងទៀតម៉ាកហ៊ីយ៉ាន់ដាយ ពណ៌ស ធ្វើដំណើរក្នុងល្បឿនយ៉ាងលឿនពីលិចទៅកើត បានមកបុកពីក្រោយយ៉ាងពេញទំហឹង បណ្ដាលឲ្យរថយន្តដែលខូចក្រឡាប់ធ្លាក់ចេញពីផ្លូវ ហើយបុរសរងគ្រោះជាព្រូខ្ទេចមួយកំណាត់ខ្លួនស្លាប់ភ្លាមៗនៅនឹងកន្លែងកើតហេតុ ។ ចំណែករថយន្ដបង្កបានរងការខូចខាតផ្នែកខាងមុខយ៉ាងដំណំ រីឯម៉ូតូ២គ្រឿងផ្សេងទៀតដែលចតក្បែររថយន្ដនោះក៏ត្រូវរងការខូចខាតយ៉ាងដំណំផងដែរ។
ក្រោយពេលកើតហេតុ រថយន្ដទាំង២គ្រឿងខាងលើត្រូវបានសមត្ថកិច្ចយកមករក្សាទុកនៅស្នងការដ្ឋាននគរបាលខេត្តពោធិ៍សាត់ ដើម្បីដោះស្រាយទៅតាមច្បាប់នៅពេលក្រោយ។ ចំណែកសពជនរងគ្រោះត្រូវបានប្រគល់ឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ