បន្ទាយមានជ័យ ៖ សេចក្តីរាយការណ៍បឋមបានឲ្យដឹងថា យុវជន២នាក់ជួបគ្រោះថ្នាក់ចរាចរណ៍ម្នាក់ស្លាប់នៅនឹងកន្លែង និងម្នាក់ស្លាប់នៅមន្ទីរពេទ្យ ខណៈពេលជិះម៉ូតូបុករថយន្ត ហើយរថយន្ត និងម៉ូតូ២គ្រឿងផ្សេងទៀតបុកបន្ថែម ដែលហេតុការណ៍ខាងលើកើតឡើងនៅដងផ្លូវជាតិលេខ៥ មុខសាលារៀនខ្មែរចិន…
បន្ទាយមានជ័យ ៖ សេចក្តីរាយការណ៍បឋមបានឲ្យដឹងថា យុវជន២នាក់ជួបគ្រោះថ្នាក់ចរាចរណ៍ម្នាក់ស្លាប់នៅនឹងកន្លែង និងម្នាក់ស្លាប់នៅមន្ទីរពេទ្យ ខណៈពេលជិះម៉ូតូបុករថយន្ត ហើយរថយន្ត និងម៉ូតូ២គ្រឿងផ្សេងទៀតបុកបន្ថែម ដែលហេតុការណ៍ខាងលើកើតឡើងនៅដងផ្លូវជាតិលេខ៥ មុខសាលារៀនខ្មែរចិន ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត នារសៀលថ្ងៃទី១៧ កក្កដា ។
ជនរងគ្រោះទាំង២ ម្នាក់ឈ្មោះ វិមាន សង្ហា អាយុ១៨ឆ្នាំ ស្លាប់នៅនឹងកន្លែង និងម្នាក់ឈ្មោះ សួស ចាន់រ៉ូស្សា អាយុ១៦ឆ្នាំ ស្លាប់នៅមន្ទីរពេទ្យ ហើយជនរងគ្រោះទាំង២ រស់នៅក្នុងភូមិសង្កាត់កើតហេតុ ។ ករណីគ្រោះថ្នាក់នេះបុកប៉ះគ្នាជាបន្តបន្ទាប់ ម៉ូតូបុកបញ្ឆាកជញ្ជាំងរថយន្តមួយគ្រឿង លុះដួលត្រូវរថយន្តមួយគ្រឿងទៀតបុក ។ មិនតែប៉ុណ្ណោះក៏មានម៉ូតូមួយគ្រឿងទៀត បុកម៉ូតូរងគ្រោះទី០១ ថែមទៀត បង្កឲ្យអ្នកបើកបររងរបួសដែរ ។
នគរបាលជំនាញនៃអធិការដ្ឋាននគរបាលក្រុងប៉ោយប៉ែតប្រាប់ថា ដំបូងម៉ូតូម៉ាកសង់សេ 125ពណ៌ខ្មៅ ពុំមានស្លាកលេខ បើកបរដោយជនរងគ្រោះទី០១ ដឹកជនរងគ្រោះទី២ ក្នុងទិសដៅពីកើតទៅលិចលុះដល់ចំណុចកើតហេតុឡើងជែងរថយន្តស្របទិសក្នុងល្បឿនលឿនក៏រ៉េចង្កូតទៅបុកជញ្ជាំងរថយន្តបញ្ច្រាស់ទិស១គ្រឿងម៉ាកតូយ៉ូតាហាវ៉ាន់ស្សា ពណ៌ខ្មៅ ពាក់ស្លាកលេខបន្ទាយមានជ័យ 2A-6104 ហើយខណៈម៉ូតូជនរងគ្រោះដួលក៏ត្រូវរថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2Y-0996 បើកបរមកពីទិសខាងលិចបុកបន្ថែម ហើយបើករថយន្តគេចបាត់ តែបន្សល់នៅកាងមុខរថយន្តភ្ជាប់ជាមួយស្លាកលេខ ។
មិនតែប៉ុណ្ណោះមានម៉ូតូមួយគ្រឿងទៀត ម៉ាកសង់ 125 ពណ៌ខ្មៅពាក់ស្លាលេខបន្ទាយមានជ័យ 1T-1777 បើកបរមកពីទិសខាងកើតបុកម៉ូតូរងគ្រោះទី០១ បន្ថែមទៀត ។ យ៉ាងណាក៏ដោយអ្នកបើកបរម៉ូតូទី២ សមត្ថកិច្ចអះអាងថា មិនស្គាល់អត្តសញ្ញាណនៅឡើយទេ ព្រោះរងរបួស ហើយគេដឹកទៅមន្ទីរពេទ្យបាត់ ។ សមត្ថកិច្ចបានប្រម៉ាញ់តាមរករថយន្តម៉ាកហាយឡែនឌ័រដែលពាក់ព័ន្ធ ប៉ុន្តែមិនទាន់រកឃើញទេ ហើយយានយន្តពាក់ព័ន្ធ៣គ្រឿង (ម៉ូតូ២គ្រឿងនិងរថយន្តម៉ាកតូយ៉ូតាហាវ៉ាន់ស្សា) ត្រូវបាននាំយកទៅអធិការដ្ឋាននគរបាលក្រុងប៉ោយប៉ែតដើម្បីបន្តនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ