រាជធានីភ្នំពេញ ៖ ការពារកុំឲ្យមូសខ្លាខាំ និងការលុបបំបាត់ជម្រកមូស គឺជាវិធានការដ៏សំខាន់បំផុតសម្រាប់ប្រយុទ្ធនឹងជំងឺគ្រុនឈាមឆ្នាំ២០១៩ ។ នេះបើលោកស្រីបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានថ្លែងក្នុងឱកាសបើកកិច្ចប្រជុំជាមួយដៃគូពាក់ព័ន្ធស្តីពីវិ ធានការប្រយុទ្ធនឹងជំងឺគ្រុនឈាមឆ្នាំ២០១៩ ។
លោកស្រីបន្តថា ការពារកុំឲ្យមូសខ្លាខាំ និងការលុបបំបាត់ជម្រកមូស គឺជាវិធានការដ៏សំខាន់បំផុតសម្រាប់ប្រយុទ្ធនឹងជំងឺគ្រុនឈាម ក្នុងឆ្នាំ២០១៩ ដូច្នេះសូមអំពាវនាវដល់ប្រជាពលរដ្ឋ អាជ្ញាធរគ្រប់លំដាប់ថ្នាក់ ស្ថាប័នពាក់ព័ន្ធ និងដៃគូសុខាភិបាលទាំងអស់សហការរួមគ្នាធ្វើសកម្មភាពចាំបាច់នេះ ដើម្បីទប់ស្កាត់ការចម្លងជំងឺគ្រុនឈាមនៅក្នុងមូលដ្ឋានរបស់ខ្លួន ។
ជាមួយគ្នានោះដែរ លោកស្រីរដ្ឋលេខាធិការក្រសួងសុខាភិបាលក៏បានជម្រុញឱ្យមន្ទីរសុខាភិបាលរាជធានី-ខេត្តទាំងអស់បន្ដយកចិត្ដទុក្ខដាក់លើការធ្វើសកម្មភាពការងាររបស់ខ្លួនឱ្យបានច្បាស់លាស់ និងចំគោលដៅក្នុងការប្រយុទ្ធនឹងជំងឺគ្រុនឈាមឆ្នាំ២០១៩ នេះ ព្រមទាំងតាមដានការងារនៅក្នុងដែនសមត្ថកិច្ចរបស់ខ្លួនប្រកបដោយប្រសិទ្ធភាពខ្ពស់ ។
លោកស្រីវេជ្ជបណ្ឌិត ឱ វណ្ណឌីន បានថ្លែងបញ្ជាក់ផងដែរថា ក្រសួងសុខាភិបាលបានយកចិត្តទុកដាក់ខ្ពស់ ជាពិសេសលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានចង្អុលបង្ហាញដល់គ្រប់ខេត្ត- រាជធានី អនុវត្តកិច្ចអន្តរាគមន៍ជាបន្ទាន់ចាប់តាំងពីដើមខែឧសភាហើយកំពុងបន្ដការងារជាបន្តបន្ទាប់រហូតមកដល់ពេលនេះយ៉ាងហ្មត់ចត់ ព្រមទាំងយកចិត្ត ទុកដាក់ពីកម្មវិធីជាតិប្រយុទ្ធប្រឆាំងនឹងជំងឺគ្រុនឈាម អនុគណៈកម្មការគ្លីនិក មន្ទីរសុខាភិបា លខេត្ត-រាជធានី រួមទាំងកិច្ចគាំទ្រពីគណៈអភិបាលខេត្ត និងដៃគូរពាក់ព័ន្ធ ជាពិសេសអាជ្ញាធរមូលដ្ឋានក្នុងការដាក់ថ្នាំសម្លាប់ដង្កូវទឹក និងថ្នាំការពារកុំឲ្យកើតដង្កូវទឹកក្នុងអាង ឫពាងទឹក នៅក្នុងតំបន់ដែលប្រឈមខ្ពស់នឹងជំងឺគ្រុនឈាម ។
លោកស្រីគូសបានបញ្ជាក់ថា «ក្នុងរយៈពេលពីខែមករាដល់ខែកក្កដា (គិតត្រឹម២៤សប្តាហ៍) ក្នុងឆ្នាំ២០១៩ មានអ្នកជំងឺគ្រុនឈាមសរុបចំនួន២១.១៣០ ករណី និងស្លាប់ចំនួន២៥នាក់ (អត្រាស្លាប់ គឺ០,១២%)។ តួលេខនេះ មានការកើនឡើងប្រហែលជា៥ដង ច្រើនជាងឆ្នាំ២០១៨ ដែលមានអ្នកជំងឺគ្រុនឈាមតែ៣.៩២៦ ករណី និងស្លាប់០៧នាក់ ។
ស្ថានភាពជំងឺ នេះ បានកើនឡើងក្នុងរាជធានី-ខេត្តនៅឆ្នាំ២០១៩នេះ បើប្រៀបធៀបទៅនឹងឆ្នាំ២០១៨ ប៉ុន្តែមិនមែនបានន័យថា ជំងឺគ្រុនឈាមមាននៅគ្រប់កន្លែងទូទាំងប្រទេសនោះទេ គឺកើតមាន រាយប៉ាយដុំៗតាមមួយភូមិ ឬពីរភូមិនៃភូមិសាស្ត្រឃុំ-សង្កាត់នីមួយៗ ។ ជំងឺគ្រុនឈាមកើតលើគ្រប់ភេទ ស្រី ប្រុស ទាំងក្មេងទាំង ចាស់ ហើយក្នុងក្រុមអាយុពី៥ -១៤ឆ្នាំ ឈឺច្រើនជាងគេ និងអត្រាស្លាប់ខ្ពស់លើក្រុមអាយុក្មេងតិចជាង៥ឆ្នាំ (មាន៩នាក់ ស្លាប់) ។ ជាមួយគ្នានោះដែរលោកស្រីឱ វណ្ណឌីន បានថ្លែងបន្ដថា ដើម្បីទប់ស្កាត់ និងគ្រប់គ្រងហានិភ័យបណ្តាលមកពីការរាតត្បាតជំងឺគ្រុនឈាមជាបន្តទៀតឲ្យបានទាន់ពេលវេលា ។
លោកស្រី បានសំណូមពរដល់លោក-លោកស្រី ដែលបានអញ្ជើញមកពីក្រសួងស្ថាប័នផ្សេង ៗចូលរួមក្នុងកិច្ចប្រជុំនេះបន្តចូលរួមសហការឲ្យបានកាន់តែទូលំទូលាយជាមួយក្រសួងសុខាភិបាលតាមរយៈមន្ទីរសុខាភិបាលទូទាំង២៥ រាជធានី-ខេត្ត បង្កើនសកម្មភាពផ្សព្វផ្សាយ អប់រំសុខភាពតាមរយៈប្រព័ន្ធផ្សព្វផ្សាយ (ទូរទស្សន៍-វិទ្យុ-សារព័ត៌មាន-អប់រំតាមសហគមន៍ សាលារៀន ទីវត្តអារ៉ាម និងអប់រំចល័ត) ស្តីពីវិធានការបង្ការជំងឺគ្រុនឈាម ពិសេសអាជ្ញាធរដែនដី និងក្រសួងពាក់ព័ន្ធ សូមជួយចាត់វិធានការសំអាតការដ្ឋានសំណង់ និងសំបកកង់ឡាន ឬម៉ូតូដែលទុកចោលពាសវាលពាសកាល ដើម្បីកុំឲ្យមានកន្លែងទឹកដក់ដែលជាជម្រកមូសខ្លា៕ កែសម្រួលដោយ ៖ សុឃាក់
ចែករំលែកព័តមាននេះ