រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា កម្ពុជាគ្រោងបញ្ជូនកាកសំណល់ប្លាស្ទិកទាំង៨៣កុងតឺន័រទៅប្រភពដើមវិញ នៅពេលឆាប់ៗនេះបន្ទាប់ពីសមត្ថកិច្ចជំនាញស្រាវជ្រាវរកប្រភពនៃការនាំចូលកាកសំណល់ប្លាស្ទិកនេះរួចរាល់។
លោក នេត្រ ភក្ត្រា អ្នកនាំពាក្យក្រសួងបរិស្ថាន បានអោយដឹងថា ក្រសួងបរិស្ថាននិងអគ្គនាយកដ្ឋានគយនិងរដ្ឋាករនៃក្រសួងសេដ្ឋកិច្ចនិងហិរញ្ញវត្ថុ និងស្ថាប័នពាក់ព័ន្ធកំពុងធ្វើការស៊ើបអង្កេតឲ្យកាន់តែស៊ីជម្រៅបន្ថែមទៀតលើករណីទូរកុងទឺន័រចំនួន៨៣ទូដែលផ្ទុកទៅដោយកាកសំណល់សំរាម ដើម្បីស្វែងរកប្រភពដើមថាទំនិញហាមឃាត់ទាំងនេះមកពីប្រភពណាហើយនឹងត្រូវបញ្ជូនទៅប្រភពដើមវិញរួចធ្វើការផាកពិន័យលើក្រុមហ៊ុនដែលនាំចូលមកនោះតាមច្បាប់ជាធរមាន។
លោកបានអះអាងថា រាជរដ្ឋាភិបាលមានវិធានការច្បាស់លាស់គឺមិនឲ្យមានការយកសំរាមនិងសំណល់ប្លាស្ទិកផ្សេងមកចាក់ចោលនៅកម្ពុជាឡើយ ដើម្បីទប់ស្កាត់ការបំពុលបរិស្ថានពីសំណល់ដែលមានជាតិពុលទាំងនេះ ។ រហូតមកដល់ពេលនេះមន្ត្រីជំនាញបាននិងកំពុងបន្តធ្វើការស៊ើបអង្កេតបន្ថែមទៀតដើម្បីបញ្ជាក់ឲ្យបានកាន់តែច្បាស់ថាតើប្រភពសំរាមដែលជាថង់ប្លាស្ទិកនេះនាំចូលមកពីប្រទេសណាឲ្យពិតប្រាកដថាតើនរណានៅពីក្រោយការនាំចូល និងជាពិសេសគឺក្រុមហ៊ុន ពីព្រោះថាកុងតឺន័រដែលត្រូវបានចាត់ទុកនេះត្រូវបានបញ្ជូនពីបរទេសណាមកពេលស្គេនទៅឃើញថាមានសំណល់ប្លាស្ទិកនៅក្នុងហ្នឹងយើងរង់ចាំមើលក្រុមហ៊ុនដែលមកទទួលយកហើយមិនឃើញនោះទេយើងកំពុងតែបន្តការស៊ើបអង្កេតដើម្បីឈានទៅដល់នីតិវិធីទីមួយគឺការរៀបចំបញ្ជូននៅសំណល់ប្លាស្ទិកទាំងអស់នេះទៅប្រទេសដើមវិញ និងទី២ធ្វើការផាកពិន័យទៅលើក្រុមហ៊ុនណាដែលនាំចូល ។
លោកបានអោយដឹងទៀតថា កន្លងមកសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានគូសបញ្ជាក់ជាច្រើនលើករួចមកហើយថា ប្រទេសកម្ពុជាមិនអនុញ្ញាតឲ្យមានជាដាច់ខាតចំពោះការនាំចូលសំណល់ប្លាស្ទិកមកកែច្នៃនៅកម្ពុជា។ ព្រោះថា កម្ពុជាមិនមែនជាធុងសំរាមសម្រាប់ការបោះចោលបច្ចេកវិទ្យាហួសសម័យនោះទេ ហើយរដ្ឋាភិបាលជំទាស់ជានិច្ចនឹងការនាំចូលសំណល់ប្លាស្ទិក និងប្រេងម៉ាស៊ីនមកកែច្នៃនៅកម្ពុជា ។
សូមបញ្ជាក់ថា កាលពីថ្ងៃទី១៦ ខែកក្កដា ឆ្នាំ២០១៩ ក្រសួងបរិស្ថាន និងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ និងស្ថាប័នពាក់ព័ន្ធ បានរកឃើញកុងទឺន័រចំនួន៨៣ទូ ដែលមានផ្ទុកកាកសំណល់សំរាមនៅកំពង់ផែខេត្តព្រះសីហនុដែលនាំចូលមកពីបរទេស ៕ (កែសម្រួលដោយ ៖ ធីតា)
ចែករំលែកព័តមាននេះ