រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នារីវ័យក្មេងម្នាក់ទើបរៀបការបានជាង១ខែប៉ុណ្ណោះ សង្ស័យតូចចិត្តរឿងប្តីហាមឃាត់មិនឲ្យលេងហ្វេសប៊ុក និងលេងហ្គេម ព្រោះយប់ជ្រៅណាស់ទៅហើយ ប៉ុន្តែនាងមិនស្ដាប់ទើបមានការឈ្លោះប្រកែកគ្នាមួយប្រាវ ហើយក្រោយមកបែរជានាងសម្រេចចិត្តធ្វើអត្តឃាតដោយចងកសម្លាប់ខ្លួនបណ្ដាលឲ្យស្លាប់តែម្តង។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង១១និង១៥នាទីព្រឹកថ្ងៃទី១៧ ខែកក្កដា ឆ្នាំ២០១៩ នៅក្នុងបន្ទប់ជួលលេខ១៧ មានទីតាំងស្ថិតនៅតាមផ្លូវបេតុង ក្រុម១ ភូមិព្រៃព្រីងជើង១ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
នារីវ័យក្មេងដែលស្លាប់ឈ្មោះ ងឿន សុខលីដា អាយុ១៩ឆ្នាំ មុខរបរកម្មការិនីរោងចក្រ មានប្តីឈ្មោះ មុត សុខណា អាយុ២៧ឆ្នាំ មុខរបរកម្មកររោងចក្រ មានស្រុកកំណើតនៅក្នុងភូមិរបស់ខ្ទុម ឃុំដំបូកខ្ពស់ ស្រុកអង្គរជ័យ ខេត្តកំពត។ ប្តីប្រពន្ធទាំង២នាក់នេះស្នាក់នៅបន្ទប់ជួលកន្លែងកើតហេតុខាងលើ។ នារីរងគ្រោះមានបងប្អូនចំនួន៥នាក់ ហើយនាងគឺជាកូនពៅ ។
តាមប្រភពពីក្រុមគ្រួសារបានប្រាប់ឲ្យនគរបាលដឹងថា នារីរងគ្រោះនិងប្ដីទើបតែរៀបការជាមួយគ្នាបានរយៈពេលជាង១ខែប៉ុណ្ណោះ គឺរៀបការកាលពីថ្ងៃទី៨ ខែមិថុនា ឆ្នាំ២០១៩ ។ ដោយឡែកនៅមុនពេលកើតហេតុ កាលពីយប់ថ្ងៃទី១៦ ខែកក្កដា ឆ្នាំ២០១៩ នារីរងគ្រោះបានដេកកាន់ទូរស័ព្ទចុចលេងហ្វេសប៊ុក និងហ្គេម ពេលនោះដោយសារតែយប់ជ្រៅណាស់ទៅហើយ ទើបបុរសជាប្ដីបានហាមឃាត់ជាច្រើនដង និងឱ្យឈប់លេងតទៅទៀតដើម្បីដេកយកកម្លាំងទៅធ្វើការងារនៅថ្ងៃបន្ទាប់។ ប៉ុន្តែទោះបីជាខំហាមយ៉ាងណា ក៏ប្រពន្ធមិនស្តាប់ដែរ។
តាមប្រភពដដែលបានបន្តថា ខណៈនោះប្តីប្រពន្ធទាំង២នាក់ក៏មានការជជែកគ្នាយ៉ាងតឹងសរសៃកមួយប្រ៉ាវដែរ ទើបស្ងាត់ទៅវិញ ហើយនារីរងគ្រោះឈប់លេងនិងបានចូលទៅដេក ។ លុះមកដល់វេលាព្រឹកថ្ងៃកើតហេតុ នារីរងគ្រោះមិនបានទៅធ្វើការងារនោះទេ ដោយនាងបានប្រាប់ប្ដីនិងបងប្អូនថាចង់ទៅស្រុក ។
បន្ទាប់មកប្តីនិងបងប្អូនក៏នាំគ្នាចេញទៅធ្វើការជាធម្មតា ហើយនារីរងគ្រោះនៅក្នុងបន្ទប់តែម្នាក់ឯង លុះដល់វេលាម៉ោង១១និង៣០នាទី ប្ដីនិងបងប្អូនចេញពីធ្វើការត្រឡប់ទៅដល់បន្ទប់ជួលវិញបើកទ្វារបន្ទប់ចូលទៅ ស្រាប់តែនារីរងគ្រោះយកក្រមាចង.កជាប់ជាមួយចម្រឹងដែកឡៅតឿ បណ្តាលឱ្យស្លាប់បាត់ទៅហើយ ទើបមានការភ្ញាក់ផ្អើលឆោឡោ ព្រមទាំងហួសចិត្តយ៉ាងខ្លាំង ដោយមិននឹកស្មានថា នារីរងគ្រោះសម្រេចចិត្តគិតខ្លីបែបនេះសោះ។
ក្រោយពេលកើតហេតុ ក្រុមគ្រួសាររបស់នារីរងគ្រោះបានរាយការណ៍ជូននគរបាលដើម្បីឲ្យចុះមកពិនិត្យកន្លែងកើតហេតុ និងកោសល្យវិច័យ បន្ទាប់ពីពិនិត្យរួច សមត្ថកិច្ចបានប្រគល់សពនារីរងគ្រោះឱ្យក្រុមគ្រួសារសាច់ញាតិដើម្បីយកទៅធ្វើបុណ្យតាមប្រពៃណីនៅឯស្រុកកំណើត៕ (កែសម្រួលដោយ ៖ ធីតា)
ចែករំលែកព័តមាននេះ