តំបន់អាស៊ីខាងត្បូង ៖ បើអាជ្ញាធររាយការណ៍កាលពីថ្ងៃទី១៥កក្កដាថា មនុស្សជាង៧៥០នាក់ បានត្រូវស្លាប់ដោយសារទឹកជំនន់ ក្នុងរដូវមូសុងប្រចាំឆ្នាំនៅឥណ្ឌា នេបាល់ និងបង់ក្លាដែសហើយយមនុស្សជាង១លាននាក់ត្រូវភៀសខ្លួនចេញខណៈទឹកឡើងកាន់តែខ្ពស់ដោយសារភ្លៀងធ្លាក់ខ្លាំង។
ទឹកជំនន់និងការបាក់ដីកើតមាននៅតំបន់នោះ ចាប់តាំងពីសប្ដាហ៍ទី២មកម៉្លេះ ខណៈភ្លៀងមូសុងវាយប្រហារខ្លាំងបណ្ដាផ្នែកភាគខាងជើងនិងភាគខាងកើតនៃតំបន់នេះ។ តុល្យការលើកមុនចេញផ្សាយកាលពី១៣កក្កដា រៀបរាប់ពីមនុស្សស្លាប់៦០០នាក់តែនាថ្ងៃទី១៤កក្កដា អាជ្ញាធរឥណ្ឌានិងបង់ក្លាដែសជំរឿងឃើញអ្នកស្លាប់ជាង១០០នាក់ថែមទៀតក្នុងប្រទេសទាំង២នេះ។
ក្នុងរដ្ឋប៊ីហាឥណ្ឌាសាកសពមនុស្ស៥៣នាក់ទៀតត្រូវបានរកឃើញ ខណៈកម្រិតទឹកចាប់ផ្ដើមស្រកចុះ។ ចំនួនសរុបនៃអ្នកស្លាប់នៅរដ្ឋប៊ីហាមានជាង២០០នាក់។ អ្នកជួយសង្គ្រោះនិងទាហានប្រមាណជា១០.០០០នាក់បានខិតខំជួួយប្រជាជនដែលរងការប៉ះពាល់។ ក្នុងរដ្ឋអុតតាប្រាដេស្តជិតខាង មនុស្ស៦៩នាក់បានត្រូវស្លាប់ហើយមនុស្ស២លាននាក់រងការប៉ះពាល់ដោយទឹកជំនន់។
រដ្ឋប៊ីហានិងរដ្ឋអុតតាប្រាដេស្តសុទ្ធតែមានព្រំដែនជាប់ជាមួយនេបាល់ ដែលក្នុងប្រទេសនេះទឹកជំនន់សម្លាប់មនុស្សយ៉ាងតិច១៣៥នាក់។ យោងតាមអ.ស.បថា ក្នុងប្រទេសនេះប្រជាជនយ៉ាងតិច២០%ក្នុងចំណោមប្រជាជនទាំង២៨លាននាក់រងការប៉ះពាល់ដោយទឹកជំនន់ ដែលអាក្រក់បំផុតពុំធ្លាប់មានចាប់តាំងពី១៥ឆ្នាំមកហើយ។ នៅភាគខាងត្បូងឥណ្ឌាមនុស្សយ៉ាងតិច១២២នាក់បានត្រូវស្លាប់ ក្នុងរដ្ឋអាសាមនិងបឹងហ្គាល់ខាងលិច។ ចំណែកមនុស្សយ៉ាងតិច១១៥នាក់ស្លាប់នៅបង់ក្លាដែសជិតខាង ដែលនៅទីនោះមនុស្សជិត៦លាននាក់រងការប៉ះពាល់ដោយទឹកជំនន់។
ក្នុង១ឆ្នាំៗមនុស្សច្រើនរយនាក់ស្លាប់ដោយសារការបាក់ដីនិងទឹកជំនន់បណ្ដាលមកពីភ្លៀងមូសុង ដែលវាយប្រហារចាប់ពីដើមខែមិថុនាទៅនៅភាគខាងត្បូងឥណ្ឌានិងតំបន់អាសីុខាងត្បូងក្នុងរយៈពេល៤ខែ៕ (កែសម្រួលដោយ ៖ បុប្ផា)
ចែករំលែកព័តមាននេះ