ខេត្តកំពត ៖ នេះជាប្រសាសន៍លើកឡើងរបស់លោក ជាវ តាយ អភិបាលនៃគណអភិបាលខេត្តថ្លែងកាលពីរសៀលថ្ងៃទី១៦ ខែកក្កដា ឆ្នាំ២០១៩ ក្នុងឪកាសដែលលោកអញ្ជើញចូលរួមជាអធិបតីពិធីបើកការដ្ឋានសាងសង់ផ្លូវបេតុងសរសៃដែកមួយខ្សែប្រវែង១០៩១ម៉ែត្រ ទទឹង១១.២ម៉ែត្រ កំរ៉ាស់០.១៥ម៉ែត្រ ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ។
នាឱកាសដ៏ថ្លៃថ្លានេះលោកអភិបាលខេត្តបានមានប្រសាសន៍ថា ការបើកការដ្ឋានសាងសង់ផ្លូវ១ខ្សែនេះ គឺអនុវត្តតាមផែនការអភិវឌ្ឍន៍ខេត្ត ដើម្បីរួមចំណែកសម្រាល និងបំពេញតម្រូវការរបស់ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរឆ្លងកាត់ដែលកន្លងមកតែងតែជួបការលំបាក និងរួមចំណែកកែលម្អសោភណ្ឌភាពក្នុងក្រុងយើងផងដែរ ។
ព្រមជាមួយនោះដែរលោកអភិបាលខេត្តក៏បានឯកភាព និងវាយតម្លៃខ្លស់ចំពោះសមិទ្ធផលទាំងឡាយ ដែលរដ្ឋបាលក្រុងកំពតសម្រេចបាន ដែលកើតចេញពីការរួបរួមសាមគ្គីគ្នារវាងថ្នាក់ដឹកនាំ មន្ត្រីរាជការក្រុង-សង្កាត់ទាំង៥ ពិសេសការចូលរួម និងសហការបានល្អរបស់បងប្អូនប្រជាពលរដ្ឋទាំងអស់ និងបានផ្តាំផ្ញើដល់ក្រុមហ៊ុនទទួលម៉ៅការសាងសង់ត្រូវធានាឲ្យបានតាមបទដ្ឋានបច្ចេកទេសឲ្យបានត្រឹមត្រូវ ដើម្បីផ្លូវមានគុណភាព និងប្រើប្រាស់យូរអង្វែង ត្រូវធ្វើឲ្យជាប់កុំធ្វើជាប់រហូតបានន័យថា ឃើញតែជួសជុលរហូត ផ្លូវក្រាលកៅស៊ូក្នុងក្រុងកន្លងមក ។
ដូច្នេះចាប់ពីពេលនេះទៅមុខផ្លូវដែលរងការខូចខាតកន្លងមកនៅក្នុងក្រុង បើត្រូវកសាងវិញលោកសំរេចថាត្រូវតែធ្វើផ្លូវបេតុងទាំងអស់ទើបធានាគុណភាពជាងផ្លូវចាក់កៅស៊ូ កុំឲ្យឃើញតែជួសជុលរហូតនោះ ។ លោកអភិបាលក៏បានក្រើនរំលឹកដល់ក្រុមហ៊ុនម៉ៅការត្រូវសាងសង់កុំអូសបន្លាយ ហើយត្រូវបញ្ចប់ការសាងសង់តាមផែនការកំណត់ និងគ្រប់អ្នកពាក់ព័ន្ធទាំងអស់ត្រូវដើរតួនាទីជាអ្នកត្រួតពិនិត្យគុណភាពផ្លូវឲ្យបានហ្មត់ចត់បំផុត ៕
កែសម្រួលដោយ ៖ សំណាង
ចែករំលែកព័តមាននេះ