រាជធានីភ្នំពេញ៖ ហិរញ្ញប្បទានរបស់ជប៉ុននេះសម្រាប់អនុវត្ត «គម្រោងកែលម្អ និងស្ដារប្រព័ន្ធស្រោចស្រព និងប្រព័ន្ធដោះទឹកភាគខាងលិចបឹងទន្លេសាប ជំហានទី២» និងហិរញ្ញប្បទានឥតសំណង សម្រាប់អនុវត្ត «គម្រោងអភិវឌ្ឍន៍ប្រព័ន្ធផ្លាស់ប្ដូរទិន្នន័យអគ្គិសនីនៅកំពង់ផែ ដើម្បីធ្វើទំនើបកម្មកំពង់ផែ» និងជួសជុលផ្លូវថ្នល់នៅកម្ពុជា ។
ក្នុងរយៈពេល ៧ ខែដើមឆ្នាំ ២០១៩ នេះ រាជរដ្ឋាភិបាលកម្ពុជា និងរដ្ឋាភិបាលជប៉ុន បានចុះហត្ថលេខាលើលិខិតប្តូរសារ និងកំណត់ហេតុ នៃការពិភាក្សាស្ដីពីហិរញ្ញប្បទានរបស់ជប៉ុន ជាបន្តបន្ទាប់ចំនួន ០៣ លើកចាប់ពីដើមឆ្នាំ២០១៩ សរុបចំនួន ៤.៩៣៩ លានយ៉េន (ប្រមាណ ៤៣,៣៦ លានដុល្លារអាមេរិក) ។
ថ្លែងក្នុងពិធីចុះហត្ថលេខាទទួលជំនួយនាព្រឹកថ្ងៃទី១៧ កក្កដា នេះលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសបានបានបញ្ជាក់ថា ការចុះហត្ថលេខានៅថ្ងៃនេះ ហិរញ្ញប្បទានឥតសំណងដែលមានទឹកប្រាក់សរុបចំនួនជិត ៥០០ លានយ៉េន (ប្រមាណ ៤,៦ លានដុល្លារអាមេរិក) សម្រាប់អនុវត្ត «គម្រោងកម្មវិធីអភិវឌ្ឍន៍សេដ្ឋកិច្ច និងសង្គម» តាមរយៈការផ្តល់គ្រឿងចក្រ Stabilizer (ប្រមាណ ១៥ គ្រឿង) សម្រាប់ជួសជុលផ្លូវថ្នល់នៅកម្ពុជា ។
លោកឧបនាយករដ្ឋមន្ត្រី ប្រាក់ សុខុន បន្តថា ៖ ហិរញ្ញប្បទានឥតសំណង ក៏ដូចជាឥណទានសម្បទានរបស់ជប៉ុន ដែលត្រូវបានចុះហត្ថលេខាកន្លងមក និងនៅថ្ងៃនេះ រួមចំណែកយ៉ាងសំខាន់នាំមកនូវជោគជ័យក្នុងការអនុវត្តគោលនយោបាយអភិវឌ្ឍន៍សេដ្ឋកិច្ច-សង្គម និងកាត់បន្ថយភាពក្រីក្ររបស់ប្រជាជនកម្ពុជា ហើយនឹងជួយជម្រុញឲ្យកម្ពុជាសម្រេចបាននូវឋានៈជាប្រទេសមានចំណូលមធ្យមកម្រិតខ្ពស់ នៅឆ្នាំ ២០៣០ ។
លោក ប្រាក់ សុខុន បានសម្តែងនូវការអរគុណ និងវាយតម្លៃខ្ពស់ចំពោះការឧបត្ថមគាំទ្ររបស់រដ្ឋាភិបាល និងប្រជាជនជប៉ុន ដល់ដំណើរការ អភិវឌ្ឍន៍សេដ្ឋកិច្ច-សង្គមនៅកម្ពុជា ដែលមកដល់បច្ចុប្បន្ននៅតែរក្សាបានកំណើនសេដ្ឋកិច្ចក្នុងរង្វង់ជាង ៧% ។
ជាការលើយតបលោក ហូរីណូជិ ហ៊ីដេហ៊ីហ្សា HORINOUCHI Hidehisa ឯកអគ្គរដ្ឋទូតជប៉ុនប្រចាំកម្ពុជាហិរញ្ញប្បទានឥតសំណង ក៏ដូចជាឥណទានសម្បទានរបស់ជប៉ុនជាង៤លាន៥សែនដុល្លារអាមេរិកដែលបានចុះហត្ថលេខានៅថ្ងៃទី១៧ កក្កដា នេះជប៉ុននឹងផ្តល់ឧបករណ៍មួយចំនួនសម្រាប់ជួសជុលផ្លូវថ្នល់បន្ថែមទៀត។
គួរបញ្ជាក់ថាកាលពីថ្ងៃទី៣១ ខែឧសភា ឆ្នាំ២០១៩ នៅទីក្រុងតូក្យូ ក្រោមអធិបតីភាពសម្តចតេជោនាយករដ្ឋមន្ត្រី និងឯកឧត្តម ABE Shinzo នាយករដ្ឋមន្ត្រីជប៉ុន គឺស្តីពីការផ្តល់ហិរញ្ញប្បទានឥតសំណងសរុប ៥៣៩ លានយ៉េន (ប្រមាណ ៤,៨ លានដុល្លារអាមេរិក) ៕
កែសម្រួលដោយ ៖ សំណាង
ចែករំលែកព័តមាននេះ