រាជធានីភ្នំពេញ ៖ ដោយសារការលះបង់ចំពោះប្រទេសជាតិ និងការចូលរួមកសាងនីតិរដ្ឋនៅកម្ពុជាសាកលវិទ្យាល័យឆាត្រាប៉ាទី សាហ៊ុ ជី មហារាជ (CHHATRAPATI SHAHU JI MAHARAJ UNIVERSITY) នៃសាធារណរដ្ឋឥណ្ឌាបានសម្រេចប្រគល់សញ្ញាបត្រកិត្តិយសថ្នាក់ក្រោយបណ្ឌិត ផ្នែកវិទ្យាសាស្ត្រសង្គមជូនលោកបណ្ឌិត ងួន ញ៉ិល អនុប្រធានទី១ រដ្ឋសភានៃព្រះរាជាណាចក្រកម្ពុជា ។
លោកបណ្ឌិត ណារ៉េស ម៉ាលហូត្រា តំណាងសាកលវិទ្យាល័យ ឆាត្រាប៉ាទី សាហ៊ុ ជីមហារាជ (CHHATRAPATI SHAHU JI MAHARAJ UNIVERSITY) បានលើកឡើងក្នុងពីធីប្រគល់ និងទទួលសញ្ញាបត្របានរៀបចំធ្វើនៅវិមានរដ្ឋសភានាព្រឹកថ្ងៃទី១៧ ខែកក្កដា ឆ្នាំ២០១៩ ថា ដោយបានមើលឃើញពីការលះបង់ ការតស៊ូ និងពលីកម្មរបស់លោកបណ្ឌិត ងួន ញ៉ិល នៅក្នុងការចូលរួមកសាងអភិវឌ្ឍន៍ប្រទេសកម្ពុជា តាំងពីដើមរហូតមក ពិសេសការចូលរួមកសាងនីតិរដ្ឋនៅកម្ពុជា តាមរយៈការអនុម័តច្បាប់នៅក្នុងរដ្ឋសភា ទើបសាកលវិទ្យាល័យលោក សម្រេចប្រគល់សញ្ញាបត្រថ្នាក់ក្រោយបណ្ឌិតនេះជូនលោកអនុប្រធានទី១រដ្ឋសភា ។
លោកបានគូសបញ្ជាក់ថា «ការសម្រេចផ្តល់សញ្ញាបត្រកិត្តិយសថ្នាក់ក្រោយបណ្ឌិត ផ្នែកវិទ្យាសាស្ត្រសង្គមជូនដល់ឯកឧត្តមបណ្ឌិត ងួន ញ៉ិល នាពេលនេះមិនមែនជាការចៃដន្យនោះទេ តែបានកើតឡើងពីការស្រាវជ្រាវ និងវាយតម្លៃពីគុណបំណាច់ដ៏ធំធេងរបស់ឯកឧត្តមអនុប្រធានទី១ នៃរដ្ឋសភាដែលបានបំពេញភារកិច្ចជូនជាតិ និងមាតុភូមិតាំងពីដើមមក» ។ លោកបន្ថែមលោកបណ្ឌិតងួន ញ៉ិល បានលះបង់កម្លាំងកាយចិត្តប្រាជ្ញា ដើម្បីសង្គមជាតិច្រើនជាងការគិតពីប្រយោជន៍ផ្ទាល់ខ្លួន ។
ចំណែកនៅក្នុងតួនាទីជាតំណាងរាស្ត្រ និងជាថ្នាក់ដឹកនាំរដ្ឋសភាមួយរូបនោះបានចូលរួមកសាងនីតិរដ្ឋនៅកម្ពុជា ។ រដ្ឋសភាកម្ពុជាបានតាក់តែង និងអនុម័តច្បាប់ប្រមាណ៥០០ច្បាប់ ។ លោកបន្ថែមទៀតថា បើតាមការវាយតម្លៃរបស់តំណាងសាកលវិទ្យាល័យ ឆាត្រាប៉ាទី សាហ៊ុ ជី មហារាជ លោកបណ្ឌិត ងួន ញ៉ិល ក៏បានកសាងកិត្យានុភាពដល់រដ្ឋសភា កម្ពុជានៅលើឆាកអន្តរជាតិយ៉ាងច្រើនផងដែរ ។ រដ្ឋសភាកម្ពុជាដែលរួមចំណែកដឹកនាំដោយលោកបណ្ឌិត ងួន ញ៉ិល បានរៀបចំកិច្ចប្រជុំ និងមហាសន្និបាតនៃវេទិកាអន្តរសភាជាច្រើននៅកម្ពុជា និងបានចូលរួមប្រជុំក្រៅប្រទេសជាច្រើនផងដែរដូចជា នៅក្នុងតួនាទីជាសមាជិកអន្តរសភាអាស៊ាន សភាតំបន់អាស៊ី និងវេទិកាសភាអាស៊ី-ប៉ាស៊ីហ្វិកជាដើមនោះ ។
ក្នុងឱកាសនោះដែរលោកបណ្ឌិត ងួន ញ៉ិល ចាត់ទុកការផ្តល់សញ្ញាបត្រជូនលោកនៅពេលនេះជាការលើកទឹកចិត្ត និងបានវាយតម្លៃយ៉ាងខ្ពស់ចំពោះកិច្ចខិតខំប្រឹងប្រែងតស៊ូលះបង់របស់ឯកឧត្តម ដើម្បីប្រទេសជាតិនាពេលកន្លងមក ។ ជាពិសេស គឺនៅក្នុងការបំពេញតួនាទី ក្នុងនាមជាថ្នាក់ដឹករដ្ឋសភាមួយរូប ក្រោមការដឹកនាំរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា ។ លោកបណ្ឌិតបានបន្តថា ការផ្តល់សញ្ញាបត្រនេះក៏បានវាយតម្លៃពីការចូ លរួមចំណែករបស់លោកក្នុងការកសាង និងអភិវឌ្ឍន៍ប្រទេសកម្ពុជាក្រោយថ្ងៃ៧ មករា ឆ្នាំ១៩៧៩ ជាមួយនឹងថ្នាក់ដឹកនាំកំពូលៗដែលមានសម្តេចអគ្គមហាធម្មពោធិសាល ជា ស៊ីម សម្តេចអគ្គមហាពញាចក្រី ហេង សំរិន និងសម្តេចអគ្គមហាសេនាបតីតេជោ ហ៊ុន សែន ជាដើម ។
លោកគូសបញ្ជាក់ថា ៖ «ការផ្តល់សញ្ញាបត្រនេះ ពិតជាមានអត្ថន័យយ៉ាងជ្រាលជ្រៅបំផុតចំពោះខ្ញុំ និងក្រុមគ្រួសារ និងស្ថាប័នរដ្ឋសភា មន្ត្រីរាជការគ្រប់លំដាប់ថ្នាក់ និងប្រជាជនខ្មែរទាំងមូល ។ នេះជាការផ្តល់នូវកម្លាំងចិត្ត និងស្មារតីដល់ខ្ញុំឱ្យកាន់តែខិតខំបន្តសកម្មភាពបម្រើសង្គមទ្វេដងបន្ថែមទៀត ពិសេសការរួមចំណែកក្នុងកិច្ចការដឹកនាំស្ថាប័នរដ្ឋសភាប្រកបដោយវឌ្ឍនភាព និងភាពសុខដុមរម្យនា» ។ ចំណែកលោក ឡេង ប៉េងឡុង អគ្គលេខាធិការរដ្ឋសភា និងដែលជាតំណាងឲ្យមន្ត្រីអគ្គលេខាធិការដ្ឋានរដ្ឋសភាទាំងអស់នោះបានអបអរសាទរចំពោះកិត្តិយសជាសកល ដែលលោកបណ្ឌិត ងួន ញ៉ិល ទទួលបាននាឱកាសនេះ ។ លោកបានគូសបញ្ជាក់ថា «ជោគជ័យដែលឯកឧត្ដមបណ្ឌិតទទួលបាននាឱកាសនេះ គឺជាកិត្យានុភាពនៃព្រះរាជាណាចក្រកម្ពុជាទាំងមូល ហើយក៏ជាជោគជ័យនៃប្រជាពលរដ្ឋខ្មែរគ្រប់រូប»៕ កែសម្រួលដោយ ៖ សុឃាក់
ចែករំលែកព័តមាននេះ