ខេត្តបាត់ដំបង ៖ តាមសេចក្តីរាយការណ៍បឋមបានឱ្យដឹងថា «យើងរួមគ្នាទប់ស្កាត់រាល់ព័ត៌មានក្លែងក្លាយលើគ្រប់បណ្តាញពីក្រុមមួយចំនួន» នេះជាការលើកឡើងរបស់លោកអភិបាលរងខេត្ត នៅក្នុងពិធីប្រកាស សមាសភាពគណៈកម្មាធិការគ្រប់គ្រងមជ្ឈមណ្ឌល ពិភពនៃក្តីសង្ឃឹម (អប់រំ កែប្រែ បន្សាបគ្រឿងញៀន ) និងចាត់តាំងប្រធាន អនុប្រធាន សមាជិក ដែលបានធ្វើនៅព្រឹកថ្ងៃទី១៧ ខែកក្កដា ឆ្នាំ២០១៩ ។
ក្នុងពិធីខាងលើនេះដែរ លោក ស៊ូ អារ៉ាហ្វាត់ អភិបាលស្តីទី នៃគណៈអភិបាលខេត្តបាត់ដំបង តំណាងដ៏ខ្ពង់ខ្ពស់ លោក ងួន រតនៈ អភិបាលនៃគណៈអភិ បាលខេត្តបាត់ដំបងបានអញ្ជើញជាអធិបតី ក្នុងពិធីប្រកាសសមាសភាពគណៈកម្មាធិការគ្រប់ គ្រងប្រធាន អនុប្រធាន និងសមាជិក មជ្ឈមណ្ឌលពិភពនៃក្តីសង្ឃឹម ដែលមានទីតាំងស្ថិតនៅភូមិដំណាក់ដង្កោ ឃុំក្តុលតាហែន ស្រុកបវេល ខេត្តបាត់ដំបង ដែលបានធ្វើឡើងនៅក្នុងបរិវេណស្នងការដ្ឋាននគរបាលខេត្តបាត់ដំបង និងមានការចូលរួមពីលោក លោកស្រី ជាប្រធានមន្ទីរ អង្គភាព ពាក់ព័ន្ឋជុំវិញខេត្ត មន្ត្រីរដ្ឋបាលខេត្តបាត់ដំបង ស្នងការស្តីទី ស្នងការរង អនុប្រធានផែន នាយការិយាល័យជំនាញ មេបញ្ជាការវរសេនាតូចនគរបាលការពារព្រំដែនគោក អធិការ អធិការរងនគរបាលក្រុង ស្រុក និងកង កម្លាំងនគរបាលចំណុះស្នងការដ្ឋាននគរបាលខេត្តបាត់ដំបងបានមកចូលរួម។
លោក ស៊ូអារ៉ាហ្វាត់ អភិបាលរងខេត្ត តំណាងលោក ងួន រតនៈ អភិបាលនៃគណៈអភិបាលខេត្តបាត់ដំបងឲ្យមកជាអធិបតីក្នុងពិធីនាពេលនេះ ដោយបានលើកឡើងនូវបញ្ហា មួយចំនួនទាក់ទងនឹងកិច្ចប្រតិបត្តិការរបស់កងកម្លាំងនគរបាលជាតិ ក្នុងនោះការថែរក្សាការពារឲ្យបាននូវសន្តិសុខ សណ្តាប់ធ្នាប់សង្គមការប្រយុទ្ឋប្រឆាំងជាមួយក្រុមជនអគតិ ដែលព្យាយាមប៉ុនប៉ងបំផ្លិចបំផ្លាញនូវសុខសន្តិភាព ឬមានមហិច្ឆិតាចង់ផ្តួលរំលំរាជរដ្ឋាភិបាលស្របច្បាប់ដោយការរៀបចំធ្វើបដិវត្តពណ៌តាមគ្រប់ទម្រង់ ។
លោកអភិបាលរងខេត្តបានបន្តថា ក្នុងនាមលោកតំណាងអភិបាលខេត្ត សូមស្នើឲ្យអស់លោក លោកស្រីជាកងកម្លាំងនគរបាលត្រូវតាមដាននិងក្តាប់ជាប់ជាប្រចាំ នូវសភាពការណ៍វិវត្តនៃស្ថានការសន្តិសុខក្នុងតំបន់ និងលើពិភពលោក ហើយការប្រយុទ្ឋប្រឆាំងជាមួយនឹង (ព័ត៌មានក្លែងក្លាយ) គឺជារឿងសំខាន់និងចាំបាច់បំផុតរបស់យើងទាំងអស់គ្នាក្នុងពេលបច្ចុប្បន្ននេះ ។
លោកអភិបាលរងខេត្តបន្តទៀតថា សូមឲ្យយើងទាំងអស់គ្នាទាំងនៅទីនេះ ក៏ដូចជាប្រជាពលរដ្ឋនៅមូលដ្ឋានសូមចូលរួមទាំងអស់គ្នាក្នុងការលុបបំបាត់បញ្ហាគ្រឿងញៀនគ្រប់ទម្រង់ដូចអនុសាសន៍ណែនាំថ្មីៗ នេះបន្ថែមទៀតរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ការពិនិត្យបង្ក្រាបលើទីតាំងក្លិបកំសាន្តនានាដើម្បីកុំឲ្យបញ្ហានេះរីករាលដាលធ្ងន់ធ្ងរដែលនាំទៅដល់ស្ថានភាពមួយដែលយើងមិនអាចចាត់វិធានការបានលើរឿងនេះ។
ជាមួយនឹងការកែសម្រួលផ្លាស់ប្តូរ សមាសភាព គណៈកម្មាធិការគ្រប់គ្រងមជ្ឈមណ្ឌលពិភពនៃក្តីសង្ឃឹមនាពេលនេះលោកសង្ឃឹម និងមានជំនឿយ៉ាងមុតមាំថា សកម្មភាពការងារទាំងការគ្រប់គ្រងដឹកនាំនៅទីនោះនឹងទទួលបានជោគជ័យល្អប្រសើរថែមមួយកំរិតធំទៀតចំពោះអ្វីដែលយើងមានស្រាប់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ